My Jamaican Love Triangle

14

Heylow! Thanks to all who's reading even if you don't vote or comment me still love,respect an rate yuh same way, Yuh done know how di thing go but nuh mek it look so mon gimmi di one likkle vote and done nuh mon .

♠Tanya's POV♠

"Wah yuh do!?" Melia she wid fi har loud mouth a loud up mi business. Mi tell di gal seh roshane kiss mi and a pay excitement she pon. A good thing seh we Inna mi room and mi lock di door suh mi madda nah go hear. Mi just can't tek di lecture from mi mada, yuh know how some mada lecture dem pickney wen dem hear seh dem gal pickney a have man, my mada wudda kill mi wid lecture if shi know seh me a have man.

"Mi seh him kiss mi!" Mi whisper shout back to melia who a look pon mi like shi see ghost. Mi did spend most a di day wid roshane an wen a did near time dat school wud a over mi mek him carry mi home

"Suh yuh kiss him back?" Melia com siddung side a me pon me bed. Rite now me just lay down pon mi bed a replay Inna me head wah happen earlier today wid mi an roshane.

"No. Yes. Maybe. Me nu know. Me just did caught up Inna di heat a di moment" me know say me kiss him back, nuff time to. Me nu know but him lips dem soft an nice and mi like how him lips dem taste but me can't tell melia all a dis, she must go say me awful fi do that to Chris. God know me can't believe me self up til now.

"Yuh think mi a idiot,Yuh nuh have to answer still cause me know seh unnu must kiss. Memba seh me know yuh eno. Yuh have sex wid him to?" Hear dis, deh gal yah weh mi fi call niece fass eno

"Well..." Mi tun me head side way fi keep melia in a suspense, a now shi ga wah hear wah happen

"Well Wah? Yuh do it? How was it? How much time yuh do it? It did hot nuh true?.." Melia just a shower mi wid all these questions. All me do thou a kiss roshane.What mi do feel nice yes but god know me feel like a bad person cause me know me hurt Chris. Wonder if me tell him if him would a understand and forgive mi fi me sin.

"Mi neva have sex with him melia. God,a so yuh think low a me?" As much as mi might be horny me nah go just know a guy fi say two months and drop mi draws fi him as him kiss mi. Me can control mi self.

"So how yah mek it sound suh like seh you an him do it" more time mi have to just shake mi head when mi hear melia talk.

"Me nah mek yuh think nothing a just you a think dat we do it, but me an him neva do nothing more than kiss. " me tell melia while me tek up mi phone fi check wah deh gwan pon me Facebook page.

"Anything yuh say den. You fi know how yuh gah work it out between Chris an yuh new man"  and a dat a di thing cah mi nuh know wah fi do rite about now. Mi jus frustrated

"Yuh deh talk bout me, wah bout you? Yuh mek up back wid di maaga bwoy yet or yuh still hate him?" Time fi me step pon melia corn now since she nuh tap step pon mine.

"A me yah talk to?" Melia a gi mi one a har bad eye dem, if eye could a kill, me would a dead right now.

"So who else me a talk?" Just a while ago she did quick fi jump down mi troat wid my love triangle affair but now she see how it feel when yuh caught up over one guy

"Don't ask mi nutten bout dat magic mango bwoy" unda normal circumstance mi would a laugh but rite now me just feel messed up inside

"Him a Neva magic mango couple weeks ago thou.." mi did go say something else but me stop when me see some WhatsApp text com in pon me phone

Please talk to me I'm so sorry.

I have been a fool by hurting your feelings and I want to make it up to you.

I know you're reading my messages and I'm begging you please.. Please Tanya. Talk to me. I love you.

You know I won't stop texting you until you reply to me.

Tanya?

I miss you...

I'm thinking of you..

One afta di Adda me read him text dem. Just in case yah wonda a Chris him a come text mi. Bout one month now me a avoid him. From him tek di Jezebel, Britney side ova me, me just leave him mek him stay. Maybe a dats why me a stray like dis, Chris hurt me an me guess somehow me did want hurt him back so maybe dat a one a di reason why me allow me self fi fall fi roshane.

"Look who a text" me gi melia me smartphone fi look pon di text dem dat Chris send me ova WhatsApp. Me know him can See say me read him text dem an nuh answer but I don't care.

"Oh god. Me feel sorry fi him. Answer him nuh. Stop punish him mon" melia she seem like she pon di two man dem side. She love Chris fi me as Yuh know already but she also rate roshane. If me follow melia man ga kill me eno

"Me just don't know how fi answer him, worst how me diss him by kissing next man. Me just confuse melia" fi real me don't know wah me fi do

"Yuh have to make a choice. Yuh can't keep di two a dem one time suh, Yuh have to let go one a dem eventually and me suggest di sooner yuh do it, di better fi Yuh".

This a di wiser lecture me eva hear from melia an to tell di truth me know all a dis already eno but god it so hard fi choose.

Di big question now is, who me fi choose? God.. It nuh easy!

***