My Jamaican Love Triangle

8

One week later..

♠Tanya POV♠

Mondays can be one a di worst day inna di week but dis ya Monday yah is one a di nicest fimmi cah melia com back a school today, memba seh shi did get one week suspension fra school becah shi did buss fight but a today shi com back a school.

Mi Neva know seh mi wudda miss di gal company suh, every day mi feel lonely cause shi Neva deh deh side a mi, melia a mi adda half eno suh yuh can undastand ,afta all shi a mi family and mi best fren althou sometimes wi can't tek each adda.

Mi mek sure seh mi mek me self busy despite melia Neva deh round. Afta di argument wid me ah Chris me mek sure seh mi teach di gal Britney a lesson. lastweek thursday a school mi guh to har man, Damian an tell him fi warn him gal fi lef mi man alone. Di next day a school,dat a friday mi hear say Damian bax har dung out a school gate, it bun mi how mi neva deh deh fi see it thou. Through melia did a go through fi har Facebook drama wid di gal Kayla mi Neva tell har nutten bout fi mi drama wid di gal Britney

"Yuh know seh yah wicked thou"melia did a laugh when mi a fill har in pon wah happen a school wid di gal Britney and har man.

"Wicked weh? A me tell di gal fi a interfere Inna me an mi man business and a mi tell har man fi bax har dung?" Mi not even care wah happen to dat gal , all me care about is dat shi get har dutty self outta mi and mi man business

" suh shi know seh a you tell har man fi bax har dung?"  Me ah melia did a go home from school Inna Sicky bus as usual, di music did a play kinda loud but wi cudda still hear each Adda

"Mi Neva tell di bwoy fi bax har dung! And who cares if shi wah know seh a me tell har man bout she an mi man, at least shi wi know har space from now on" one thing mi know is dat Britney can't beat mi, a hope shi memba wen mi did tell har seh mi have mi license fi Kill har an mi visa fi bury har suh shi try know how shi approach mi.

"Mi think shi ga wah beat yuh thou wen shi find out dat a you mek har man lick har" a wonda if melia think me an she a di same? Everybody suppose to know seh mi sick Inna mi mentalness suh dem know betta dan fi start war wid mi.

"Yuh know wah mek wi drop dis argument" mi change di topic an start chat bout something else while me an melia mek wi way to wi yard

~•~•~•

In a di evening mi did dung a melia yard a try do wah social studies homework when Alrick, melia big brother and fimmi big nephew come home. Alrick him always pon di road like some street dawg, di bwoy big an wuklist like before him go look wuk do.

"Weh Keisha deh? She cook yet?" Mi an melia did deh pon di verandah siddung wen alrick walk in.

"Yeah, shi lef yuh food Inna di kitchen pon di table" only time alrick com home an a wen him wah sinthing fi nyam. An as soon as him eat dun a gone him gone again an we na see him til late Inna di night

Alrick go fi him dinna an siddung pon di verandah wid we while him eat di food.

"So wat a di latest gossip pon di street?"melia ask har bredda while him full him mouth a food.

Wen we want know di latest news inna di community alrick a di best one fi tell we,him know almost everybody business. But wait de, a wonda if him know di bike bwoy. "Yow Al yo know dis yute,wah bike bwoy " me describe di bwoy to alrick

"A Roshane yah talk mon, A wah bout him?" Roshane. OK a suh him name.

"Suh yuh know if him have a woman?" Alrick gimme one suspicious look an me know seh him a tink seh a want mi wah di bwoy an a dats why mi ask bout him

" me nuh know of him having no personal woman but mi know of sum girls who have a ting fi him" alrick finish eat so him carry him empty plate go put dung round a kitchen, mi tan up an falla back a him.

"Which gal them deh dat yah talk?" Alrick Neva have to tell mi dat cause mi did already know seh adda gal must a look him.

"Tanya roshane a one a mi friend dem but you a mi likkle auntie so as yuh big nephew mi a tell yuh dis, stay weh from roshane, trust mi wen mi seh, him wi only hurt yuh feelings" afta dat, alrick left di house an gone back weh him nable string did cut, dat a pan di road.

Mi just can't help but think ova wah him just seh thou. Him wi only hurt yuh feelings. Mi shake me head an walk go back to weh mi did siddung a do mi homework. God if yah hear mi. Please help mi fi figet bout dis bwoy.

***

I never thought that I would get so much support for this story so I want to thank you guys for reading, voting and commenting! Please feel free to give your views on this story, I don't mind hearing your thoughts (good or bad) ;)