فهيمة

البداية

#فهيمة
لكاتبتها ام علي...
الاسم فهيمة ...مواليد 1971  امرأه طويل بيضه حمره شعره طويل جسمه متروس .. ابوها رجال خير وطيب كلش وهي مدللها كلش ، ولان الوحيده جانوا يطلعوها لكل مكان سواء للزياره او لغير محافظه الى ان صار عمره 13سنه وصارت طويله وشكله بين اكبر بسنة 1983نهايته ..

بلسان الشخصيه (فهيمة)

جنت طالعه ويه امي نريد للسوك نشتري كيمر صعدنه ويه واحد سايق ابو سياره جان حلو وطويل وعنده لحيه اسمراني بقى يباوع عليه طول الطريق ويسولف ويه امي ... امي هم تسولف وتضحك وياه الا ان نزلنه .. بقيت اباوع عليه وماشلت عيني من عينه وحسيت بشعور غريب بداخلي ومثل الرجفه لزمتني بجسمي .. بلسوك امشي وره امي ولازمه عبايته وماادري بدنيا شيصير بيه كل تفكيري يم ذاك الرجال بقيت اسبوع اني بس افكر الى ان شفت ماكو فائده من التفكير بطلت افكر ، وبقيت اخلص شغل البيت واهتم باخواني الاصغر مني لان امي حامل وبدت تتوحم ومن الماي نفسه تلعب .. كمت انزل للشط اجيب ماي اصفي بلحب مالت الماي للشرب وباقي الماي نغسل منه ونتوضى للصلاه ..

ابويه رجال هادئ بطبعه وفقير لدرجة صوته من سمعه واخوتي صغار كلشي جان بيدي البيت واهلي بس مسؤلية البيت عليه واني اتعودت الى ان فد يوم نزلت للشط اغسل هدوم بلشط واجه البلم من بعيد شفت واحد كاعد بس كإنما شايفته واعرفه من تقرب طلع هو نفسه سايق السياره تعدى قريب عني بعد متر بلماي وماحجه شي ولافتح حلكه انتضرته يحجي ماحجه ومر من يمي وهو ساكت وابتعد ...اني حسيت روحي سخنت كلش بسرعه فتت للماي بهدومي وكمت اسبح للعلم اني اعرف اسبح بقيت اسبح لمن تعبت شلت هدومي ورجعت للبيت بدلت وكعدت بقيت اروح للشط عشر ايام ويوميه اشوفه ونفس الموقف يتكرر كدامي اخير شي قررت اني احاجيه وفعلا انتضرته لمن اجى بلبلم وصحت منو انت ..هو ابتسم وخله الغرافه (المردي..او المجداف) بالبلم كالي جنت منتضرج تحجين ..ضحك كال اسمي سعيد .. كتله شتريد ..كال اريدج انتي منو غيرج اريد ..حسيت روحي خجلت ونصيت راسي وابتسمت كتله خوش خوش وبنفس اللحظه سمعت امي تصيح كتله اروح اني في امان الله .. هو شال ايده وحرك البلم ذيج الليله بقيت اتكلب وافكر بس بسعيد وعيني ماغمضت ولاساعه وكعدت الصبح منتضره شيجيب العصر انزل للشط اشوفه اول ماالشمس شويه عكست شلت الطشت ورحت اركض وكعدت اغسل هدوم بس مااجة .. انتضرت لمن صار الغروب ومااجة حسيت نفسي كلش ضجت وانقهرت خليت ورجعت للبيت ثاني يوم هم انتظرته وماشفته .. بقيت ايام انتضر وماكو لطيف لمن عبروا شهرين والدنيا بدت تكسر للشتاء يعني نهاية الشهر الثامن جنت نازله بلشط واجة سعيد .. اي رجع شفته كمت على حيلي افرك بعيوني هو لو غيره اي هو من تقرب مني كالي شلونج صحتج احوالج ؟؟ كتله زينه جا وين جنت كال مشغول والله اكلج كتله كول ..كال اذا اني احبج وشاريج شسوين لخاطري كتله شتريد يجرالك هو ضحك ضحكه طويله اني مافهمت ليش هم ضحكت وياه كالي خوش باجر امر واعلمج شسوين وحرك البلم كتله اوكف اشوفك زين كال لا بعدين تشبعين مني وتملين كلش وضحك مره ثانيه وتحرك اني ذيج الليله بقيت افكر شيريد واضحك ويه روحي فرحانه لان شفته ..

كعدت من الصبح خلصت شغل وكمت العب ويه اخواني للعصر نزلت للشط امي ماقبلت بس من وراها رحت اجة سعيد كال بليل تجين للشط تخلين نعالج وربطتج هنا وتلمين هدومج الزينات وتنتضرين عالشارع العام كتله خوش كال رايح ومثل ماعلمتج تسوين ...

لميت هدومي وخليت نعالي عالشط والربطه وشفت كل اهلي نايمين وماحسوا عليه .. طلعت للشارع العام وانتضرت لمن اجت سيارة سعيد  وصعدت وياه هو يسوق ويكولي شلونج ولج اني اكله زينه ....

ماحصل في بيت اهل فهيمة...بلسان ام فهيمة ..
كعدت الصبح كوه اسحل روحي وبطني كبرت ورجليه مورمات من الحمل .. صحت فهيمه فهيمه ماكو .. كلت خاف راحت تكنس الساحه مالت البيت .. بقيت منتظره انوب كمت على حيلي لان عبالي تسويلنه استكان شاي مثل كل مره مالكيته بلمطبخ طلعت للساحه ماكو كلت خاف تترس ماي شفت السطل مال ماي بلباب بمكانه وهي مختفيه رحت للشط كلت اكيد هاي تسبح بلشط .. وصلت للمشرعه.  شفت نعاله وربطته بس هي ماكو .. كمت اصيح والطم ماكو اله نزلت تسبح وغركت كلبت الدنيا والوادم واهل المنطقه فزعوا علينه والشباب نزلوا للشط يدورون عالجثه .. بقينه 3ايام ومالكينه منه شي سوينه فاتحه وعزا واني بنتي الوحيده راحت من ايدي عمت عيني خليته مسؤله عن بيت ، وبقيت الوم بروحي لمن صعد السكر وكمت اخذ ابر للانسولين ورى شهر من موت بنتي فتحت البوفيه مالت فهيمه اريد انطي هدومه بثواب واخلي كم قطعه من ريحة بنتي ، ومن فتحته شفت لاهدوم ولاذهب كلشي ماكو اني عندي نسخه بجيبي للمفتاح ونسخه يم فهيمه لابسته كلاده بركبته شلون من فتحه معقوله انباكن لا لا جان انكسر القفل ... بلحظته ماحسيت الى وكعت على طولي واخواتي دايري والوادم صاحوا سلامات .. بقيت ساكته مااكدر احجي مثل بلاعة الموس والفار يلعب بعبي معقوله تسويه خل تروح الوادم انتظرت لمن طلعوا كل الموجودين ودورت بغراضه شفت كل هدومه الزينات والذهب مختفيات عرفته تركت البيت بس ليش ليش دكيت ولطمت وملخت روحي لمن اجى زوجي وشافني كومني وغسلي وجهي وحجيتله كل شكوكي هو ماحجه شي سكت كال يصير خير كلشي يبين بوكته ..

.
.
.
...