فهيمة

العوده

#فهيمة 4
لأم علي

.
.
بذيج الايام ابوية كان يدور عليه بس بشكل سري ومحد جان يعرف بالموضوع بس امي .. اما بالنسبة الية بذيج الفترة
بعد مارحنه للبيت سعيد اشترالي ملابس وبدى .. يطلعني ويفرني بسياره واخذني للكاظم زورني وحسيت وياه بسعاده غامره واني احبه ، وبعدها ماشفت اي شخص من بيت ام شعر الاصفر او رجال غريب .. سعيد يعاملني بحنيه وشنو اريده يسويلي كام ينطيني فلوس بيدي ، ومن نطلع اني اشتري بيهم خلاني انتبه لمظهري ولجمالي وكمت البس وارتب واهتم اكثر بنفسي واناقتي .. عشت وياه 3 اسابيع مثل الملكه عوضني عن الشهر الي عشته بيت ام ود وسوسه بس مرات اشوف بالحلم اسماء شلون ميته اشوف دمه واكعد مثل المخروعه وهو جان يكعد يهدئني ويمسح على ظهري لحدما ترجع انام واني بين احضانه ..

سعيد جان اكبر مني بااكثر من 15سنه علمني الحياة الزوجيه شلون لازم تكتمل بين الزوج وزوجته .. حبيته وهو جان اول حب بحياتي ، بوقتها  حسيت صار عندي سند وحزام ظهر .. جان احساسي بوقتها انه خلاص لكيت الشخص اللي راح يخلصني من المسؤولية اللي جنت متحملته ببيت اهلي ، وفعلا بهذيج الفترة جان سعيد هو الحايط اللي اسندت نفسي عليه ..  ماجنت اعرف انو ايام السعادة قليلة وايام الحزن والتعاسة تجي بسرعة وتطول فترتها وللاسف اني السعادة اللي جنت حاسة بيهة مدامتلي ..

بعد 3 اسابيع ..

كعدت الصبح لعبان نفس ودايخه بشكل كل عمري ماتمرضت بس مره وحده صارت عندي سخونه قويه ... سعيد واكف بالباب شافني اتقيئ واصيح من راسي .. بقى صافن تعابير وجهه تحجي غير شي عيونه مو نفس النظره ...كالي شبيج ؟؟ كتلة ماادري شو دايخه ونفسي تلعب  فگلي
بدلي هدومج..

هاا نطلع؟
اي نطلع ..

بدلت ملابسي وصعدنه السياره لمن وصلنه لمكان بيت سوسه كتله شنسوي هنا؟
مالج دخل انزلي..
فتحنه الباب ونزلنه جانت سوسه موجوده وصابرين بس..
شافتنه طفرت تبوس بسعيد اني حسيت بالغيرة منها .. فكلتله سوسة

هااسعود شنو  روضتهة لو سوتلك مصيبه ؟؟

كاله تعالي اكولج

طلعوا يم السياره ومدري شيسولفون وشفت سوسه مثل العصبيه وتهز بيدها

اجتني صابرين..
انتي كل وعقلج هذا يحبج
بطرانه على روحج...
اي يحبني وبعد مايضربني ..

هههههههه صدكتي لعد شكد غبيه انتي عموما هسه مااحجي بس ويه الوقت تعرفين شنو اقصد ..

دخلت سوسه تعالي كعدتني بالغرفه وقفلت الباب .. بقيت ادك بالباب ابجي واعيط حبابه عمه والله مسويت شي ، سعيد حباب والله احبك لاتسوي هيج وماكو احد يجاوبني .. بقيت ابجي لمن وكعت من التعب وغفيت يم الباب وفجأه انظربت بشي فتحت شفت دا يفتحون الباب واني نايمه قريبه ماينفتح ...دخلت سوسه وحنان كوموني كتلهم ليش هيج عمه وكمت ابجي كالت اسكتي لاتبجين هسه راح تجي ام رائد تشوفج شبيج ليش مريضه .. وره خمس دقايق دخلت وحده كئنما شايفته..اي شايفته نفسه الي بليل ويه اسماء..كالت تمددي ماما...ولاتخافين بس اني من الخوف لزمتني الرجفه وبالكوة خليتها تفحصني كالت حامل ...
سوسه واكفه خلت ايده على حلكه..كالت شوكت العمليه ؟؟ تسويله هسه ؟؟