Le Lièvre
Courir me font souvent les chiens
Car a manger suis savoureux :
Tant plus amasse l'on grans biens,
Tant plus engendre d'envieulx.
Le Regnard
Je suis subtil, plain de malice
Pour toutes bestes decepvoir ;
Au corbin je fais la police.
Chascun ne peult pas tout scavoir.
Le Mulet
Je suis pour tracasser habille,
Et pour trahir enfin mon maistre ;
Garde soy du pied qui m'estrille ;
Qui a trompé trompé doit estre.
Le Veau
Je suis le droit filz de la vache,
Des bestes le plus fortuné ;
Car il convient que l'on m'attache
Incontinent que je suis né.
Le Porc
Quant je mange et quant tranglouty
Par gloutonnie ma substance,
A la fange suis endormy ;
Car de la pance vient la dance.
ANONYME
