#احتويني_ولاتخسريني

احتويني ولاتخسريني 1

🌸عزيزاتي القصه حقيقيه بس الاسماء والاماكن مختلفه والحوارات قسم منها من صاحبة القصه والقسم من وحي خيالي..بس السرد كان كله بااسلوبي الي تحبوا واتمنى تنال اعجابكم🌸
...... ......... .......

صبحج الل بالخير حجيه طيبه
الله يصبحك بالعافيه يا حجينه ياشمعه بيتنا
حضرينه الريوك وسويلي خميعه ويه الريوك شو مشتهيها ..
راح نرجع الى الوراء
اني حجي هاشم عمري 67 سنه جنت متزوج من ام خالد الله يرحمها بنت خالتي واختارتليها حبوبتي واخذتها صغيره وازوجتها..
اهلنا بتكريت بس اني عشت بغداد درست وصرت معلم وجبت بنت خالتي وزوجتها
اول زواجي اجرت غرفه عد ناس واتزوجنا وصار عدنا خالد وبعدين كمت من الراتب اكون نفسي وشويه شويه جمعتلي جم فلس وابويه الله يرحمه وزعلنا الورث كبل ليموت وكدرت اخذلي بيت بغداد..كبل اول الدنيا خير ورخيصه ..
كبر خالد وصار بالمدرسه وراها ماصار عدنا طفل راجعت باام خالد على الاطباء واخذت علاج وصارت حامل والحمدلله
عدت الايام ومشت وصارت موعد ولادتها وقبل ماكو سونار وهالسوالف
حست بوجع وديتها للجده (القابله) يمنه مره جبيره وتجيب النسوان ومعروفه بشطارتها..
ابوخالد:ساعه واني انتظر بالشارع ودكيت الباب،
عيني شخبار زوجتي شو تاخرتي
الجده(القابله):والله مرتك متعسره وجني بيها توم. والله لو توديها للمستشفى لان ذبت دم هوايه واني مااتحمل مسؤليتها
ابو خالد:يمعوده شتحجين كولي غيرها يله حظريها بين مااجيب تكسي ،
جبت التكسي وطلعت ام خالد وياها اختها هم جانت عايشه بغداد واخذناها كبل للمستشفى وهي تنزف
دخلوها صاله العمليات ..
وره شويه طلعت الممرضه كالت اجالك ولد اثنين بس مع الاسف فقدنا الام لان جان عدها نزيف حاد ومرتك جان بيها ابو صفار قوي بالحمل وحالتها متحملت البقيه بحياتك..
ابو خالد:انضربت براسي وحسيت نفسي تايه بغير عالم وحسيت الدنيا ظلمه بعيوني ،راحت الغاليه وعافتلي هم شكبره ..
بقيت اعض اصابعي ندم لان اني مشيت بيها على الاطباء من وره الحباله وتاليها راحت وعافتني..
طلعنا ورحنا لتكريت ودفناها لام خالد هناك يم اهليتنا
اني كرهت نفسي والدنيا شفتها مو حلوه وملت روحي لان جانت كلشي بحياتي وصغيره بعدها وماتت، بس رب العالمين راد امانته واخذهااا...
بقيت اسبوعين يم اهلي وبعدين اخذت خالد ورجعت لبغداد
عفت التوم احمد و حسام يم اختي ام منتظر ارمله وعدها 3 جهال وجبيره بالعمر
كالتلي اني اربيهم ويه جهالي الما تشوفلك بنت اوادم وتزوجها عود اخذهم وياك
بقيت سنه مالي نفس باي مره وره المرحومه وخالد تعبت نفسيته لان واعي وفاهم وجان يظل يبجي ويكلي امي عافتنه بس احنه ليش نعوف اخوتي جيبهم ويانه حتى يعيشون ويانا ويونسونا
ابوخالد:رحت لاهلي وجانت العطله الجبيره وقررت ابقى فتره يم اهلي واخوتي
جانوا التوم كبرانين وديمشون ..اني جنت كل شهرين اجيهم وانطي اختي فلوس واروح
ابو خالد:خيتي ام منتظر شوفيلي مره واعيه وكون جبيره شويه ومتخلف
اريدها تربي جهالي لان خالد فد مره يبجي ويريد اخوته
ام منتظر:يوم المنى خيي والله كافي صبرت هوايه ولدك خطيه هم محتاجيك ولازم تلمهم ولو يعز عليه فراكهم والله يشهد معلكين ويه النفس بس شنسووي لازم نرضه بالمكتوب..
مرت الايام
ام منتظر:عيوني ابوخالد شفتلك شلون مره على المرام دينه وجبيره وبنت بنوت بعدها وعمرها 48 سنه يعني مااتوقع تخلف وحاجه بيت الله ويسموها حجيه طيبه ، سبعه وبقت اتداري امها ومارضت تزوج ..
وامها راحت لدار حقها وهي انكسرت وره امها.
يعني اثنينكم مجروحين واحد يداوي جرح الثاني
بس بيها شغله وحده ..رجلها تكزل شويه عدها خلع بالولاده وهاي بقت يمك اخويه
ابوخالد:يااختي اذا الجوهر اصيل معليه بالمظهر ..اني رايدلي ام حنينه تربي هالايتام،
توكلي بالله ورتبينه الموضوع.

ام منتظر حجت ويه المريه واسمها طيبه وانطت موافقتها
وصارت مشيه الزلم وقروا الفاتحه وفصلوا حك وعقدنا شيخ ومحكمه وصار يوم العرس(ام آيه)
ابوخالد:الزفه بيت اخويه الجبير فرغلنا بيته 3 ايام والجهال يم ام منتظر
حجيه طيبه:مدحولي بابو خالد وباخلاقه وهو مناسب لوضعي ولعمري وفرحت لان راح اربي ولده الايتام حتى احصل الاجر من وراهم..
واني متعلمه على مداراه امي الله يرحمها جانت مقعده وحتى العفو الحاجتين جواها ومتذمرت ومتعبت لان ادور اجر..
صارت الزفه ودخل عليه ابو خالد للغرفه..
ابوخالد:زواج مبارك عليه وعليج ان شاءالله..
اني اختاريتج دونن عن البشر لان عرفتج باره باامج وكلت هاي المره الي راح تربي ولدي الايتام..
حجيه طيبه:ان شاءالله اكون عند ظنك وماخيب املك ابو خالد..
وره 3 ايام جبت التوم وخالد ورجعوا بيت اخويه لبيتهم وبقينه فتره وياهم
وحجيه طيبه مداريتهم وحنينه عليهم بشكل ..
خالد حبها وتعلق بيها ويصيحها ماما واحمد هم حبها ،بس حسام تعبنا هوايه بس يبجي وحتى اكل كطعا...
اجتي ام منتظر وشافها حسام وردت روحه وكام ياكل وبطل يبجي لان متعلق بعمته هوايه
مر اسبوعين على زواجنا ورتبت اموري دنرجع لبغداد
بس حسام قررت اعوفه يم عمته لان خفت عليه يتاذه ويتمرض والطريق بعيد مو مال ارجعه..
رحت لبغداد واخذت خالد واحمد..

🌸🌸
#الكاتبه
همسات الليل(ام آيه)