#احتويني_ولاتخسريني

الجزء 12

حسام :كبرت المشكله بيناتنه حيل...
واستفزتني وطلكتها وطلعت من البيت اني وعفتها...
كلت خل تبقى وحدها حتى تهدأ...

نجوان:طلعت حركتي وقهرت السنين وبالاخير طلعت اني الغلطانه ...
والله ما ابقى بعد يمه لو حياتي عليه..
خابرت لبيت عمي وجوي اخذوني...

نجوان:رحت لبيت عمي وحجيتلهم كلشي وكتلهم طلكني...

حجي ابو خالد:خرب بصفحته من دون اخوته شالع كلبي النوبه يمشي بالحرام استغفر الله ..

اخو التوم صايم مصلي وهو غركان بالنسوان والحرام..

نجوان:عمي صار اعصاب وخفنه حيل عليه وخابر على حسام
حجي ابو خالد:لك حيوان وين تروح من الله ...
النوبه تزني وتمشي بالحرام
وين اروح من رب العالمين من يحاسبني على اغلاطك ويكولي شنو الي علمته لابنك
مرتك يمي ودير بالك توصل لهذا البيت وتنكسه...

نجوان :خابرت اخويه واجه اخذني لاهلي
رحت لاهلي مكسوره الجناح ساحله جهالي وبطني شعلاتها وفوكاها مطلكه...

تلكتني امي اول يومين زينه وبعدين كلبت عليه
تعجبت امي ليش العمل والحجاب الي سوتليا مجاب نتيجه...
امي عرفت بعدين صوجي لان جنت اقره قران واسبح واستغفر فجاب نتيجه عكسيه..

ابويه زين وحباب ويه جهالي واخوتي هم مداريهم واختي مشفت منها شي ماكو شهر وتزوجت ابن خالتي بغداد لان جانت مخطوبه...

بس امي لعبت بيه طوبه بس تريد ترجعني وذلتني شهرين شوفتني الويل
حسيت عندي ولاده وصار عندي الم قوي
وانقهرت امي عليه بعدين...
ومقبلت توديني للمستشفى تكول البيت احسن وهم جان الوضع موزين ...

جابتلي قابله للبيت وبقيت اتوجع من 10 بالليل الى 7 الصبح وابجي على حظي وعلى رجلي الي مسأل عني وبطلعان الروح  يالله جبت...

جبته ولد بس حيل تعبان لونه ازرك وملفوف الحبل السري على ركبته..
غسلتله امي وبدلتله  بس الولد تعبان وصار لونه اصفر كركم وامي بس تنطي مي وشكر(قنداغ)...

بيت عمي وصلهم الخبر واجه عمي وخالتي
الحجيه طيبه:نجوان بالمبارك عليكم ان شاءالله بشره خير وصلح بينج وبين رجلج..

نجوان:خاله حسام يدري
والله يابنتي ماطب بيتنه من يوم المشكله لان عمج حلف يمين ميدوس عتبه البيت وهو عايش...

بس احمد يروحله ،واني رحتله 3 مرات وحال الضيم حاله ،الله يهديج ويهدي عمج عليه...

نجوان:ابنج شكله تعبان ومو طبيعي حظري دناخذه اني وعمج على الدكتور...

الحجيه طيبه:اخذنا الصغير للطبيب وفحصه وكالنا الطفل صاير بي ابو صفار عالي واصل 20 وضرب الدماغ والحبل السري ملفوف عليه وكاطع الاوكسجين عن خلايا الدماغ
واكو خسفه بجهه كلبه يمكن الام واكعه بالحمل ومضعفه كلبه...
ووالعلم عند الله يمكن ميطول اسبوع...

الحجي :لاحول ولا قوه الابالله العلي العظيم
الحجيه طيبه:طول الطريق ابجي على هالطفل وعلى امه وابو...
اتفقنه اني والحجي منكوللهم ،بس الحجي كال انطي علم لااخويه...

الحجي: ابو غسان اخويه تره الطفل ايام باقيتله والعلم عندالله...
انطيتك علم حتى تكسر على نجوان من تسمع...

حسام:احمد خابرني وبشرني اجاني ولد
فرحت حيل ونويت افوت اسبوعين واروحلهم الما ترتاح وكلت ارجعها...

نجوان :رجعوا بيت عمي والطفل حالته دتسوء صار عمره 5 ايام وكعدت الفجر علمود ارضعه لان راضع من قبل 12...

اجيت عليه صاير ازرك نيل وقطعه ثلج شلته اكلب بي ميكعد افتح بحلكه ماكو...
عرفت بي ميت عطت عيطه والبيت كله كعد وابويه جان ديتوضه وكلهم فوك راسي ومحسيت بعد بشي
ماخذي من بين ايدي ودافني ...

نجوان:صحيت وهو مو يمي، دموعي تجري وصدري يوجعني وحليبي يكت ،ياويلي عليك ياوليدي حليبك يدور عليك اووف يربي شنو هالعذاب والضيم،الحلم الخفت منه تفسر..

حسام:وصلني خبر ابني مات وعرفت هذا انتقام رب العالمين الي وانكسر ظهري ..
تعبت وابتعدت عن كل الناس وشذى طلكتها نهيت كلشي بيناتنه من عرفت هي متقصده تهجم بيتي...

ادمرت حياتي ...خسرت مرتي وجهالي وابني راح مني قبل لاشوفه ،وابويه غضبان عليه...

مرت الايام....
راضيت ابويه ودزيت اهلي يرجعوها لنجوان بس مقبلت،واني عفتها على راحتها وكلت صوابها حار من موت ابنها...

نجوان:مرت شهور على موت ابني واني انكسرت حيل ....ثاري الضنه فراكه يوجع...
حقدت على حسام ،تعبت نفسيتي ودخلت بكآبه وكمت اتعالج واشرب مهدئات...
الصلاه وقوه ايماني صبرتني
ومرت اخويه بنت اوادم وحبابه هوايه ساعدتني...

علا:نجوان حبيبتي انتي بعدج صغيره وحلوه ليش تضيعين شبابج ودافنه نفسج بالحزن عيشي حياتج كافي قهر ترة البعمرج توهن تزوجن...

علا:فاتحين معهد على الشارع العام دوره تعليم خياطه...
تعالي نروح اني وياج نتعلم هم تفيدنا وهم تخيطين لبناتج...

نجوان:عجبتني فكره علا ودخلت بدوره الخياطه خلال 6 اشهر طلعت منها خياطه معدله لان اني جنت ارسم واني بنيه فصارت عندي الخياطه والتصاميم سهله...

بديت اخيط للجوارين واشتغلت بالصعب وكمت اشتري برد ومجلات واني اسوي تصاميم...
انعرفت بالمنطقه ومالحك بعد على الشغل ...

الحمدلله اموري تعدلت وجمعتلي مبلغ مرتب ضميته لبناتي للزمن...
الظروف المريت بيها خلقت مني انسانه قويه وناضجه 22 سنه ،وراحت نجوان الصغيره الي مشتها امها...

حسام:مرت سنتين واني ونجوان متفاركين ومشفتها وحتى من اروح لبناتي ماشوفها وشكد حاولت ارجعها متقبل...

سلمت امري لله وعفت كلشي ورايه
ورجعت عشت بغرفتي يم بيت اهلي
لان خالد رجع واخذ بيته....

#الكاتبه
همسات الليل(ام آيه)