جانت دنيا صبح ..ورايحه للمعهد ..الجو بارد ..
وبي نثات مطر ...خفيفه ..وامشي بشارع ...وحدي الشارع فارغ ...
كملت فرع بيتنه ..وطلعت ع اليسرة ...
ريحه المطر والتراب ..ترست ..رئتي اعشقها ..
كمت امشي سريع تبللت ..
حتى اوصل ..لراس الشارع يوكفلي ابو الخط ..
ميكدر يفوت كلها مسدودة بصبات ..
جنت لابسة .قميص ابيض ..وتنورة رصاصي وشايله الفكس..بايدي ...
دامشي بسرعه اباع ع الساعه ..7/30..وكع عليها مطر
وكمت امسحها بهدومي ...
هف يادوب الحك ..وعندي امتحان
ماحس بروحي الا تكومت بلكاع بنص طين ..
ع ركبي ..وكعت ..
اسمع واحد يكول الله الله اخيتي خوما صارشي ..
رفعت راسي ..والدمعه بعيني ..
شاب ..لابس شورت وفانيلا ..اسمراني ضخم وطويل ..
اني بقيت صافنه عليه ...
مد ايدة يكومني ..
كتله لا شكرا ...
كمت عدلت روحي ..
ضحك ..كال ماتكومتي الا بهلنكرة ..جان فتي من هينه..
وعبرتي النكرة ...
ماعرف شجاوبه ضجت حيل ....ومقهورة ع روحي ..
هدومي كلها ..طين ومي ..والتنورة ..شويه نشكت ..
كمت اعدل ..بروحي ..
ضحك ..كال ..
ماترهم ..ترحين لدوامج هجي ..
رفعت راسي عليه ..
كتله وانت شعليك جاي تواسيني لو تضحك عليه ..
لا لا اخيتي ..بس حالج مو مال دوام ..
كمت اتلفت بشارع ..يمنى يسرى ..
ماكو ..احد ..
افف ياربي ..ماكو غير حل ارجع للبيت ..
الولد .لم غراضي من الكاع و.انطاني غراضي ..الفكس ..والجنطه ..
باوعت عليه واخذتهن ورجعت ..امشي ..
واعدل بهدومي وانفض بيها ..
صااح يولو ...
انداريت عليه ..
هاذ قلمج ..ويبتسم ..
عفته ومشيت حايرة بدوامي ..
كمت امشي سريع ..وصلت ..للبيت ..
طبيت امي كاعدة ..
ياا شبيج .قمر.وكعت ع حظي وطينت ..
خرب دكومي بدلي ودوامج ..ماما ماعرف ..
بدلي هسة اكعد ابوج يوديج ....
اي ..
طبيت ..بدلت هدومي وغسلت ..
وكعد ابويه ..يحجي علية ...
شبيج ..
بابا تاخرت خلي اغسل اني واكفه بصفه وهوة يغسل ..
عفيه بسرعه عندي امتحان ..
افتهمت انطي صبر ..
كمل ..طلعت ..رحت ..للمعهد ..المعلمات ..
طبيت ..بي ..كوة الحارس دخلني علمود تاخرت..
المديرة ...واكفه بلممر...
عفيه يوميه ..متاخرة ..ست ..قمر
الي يسمع يكول بيتكم بلهند ..
ست والله ضرف ..صار واضطريت ..اتاخر ..
يله يله لصفج ..
اني امشي واقلد عليها لصفج لصفج ام سنون ..
طبيت المحاضرة باديه ..
باوعت عليه ست سناء ..ونزلت المناظر شويه ..ع خشمها
واشرت باديها اتفضلي ..برنسيسة ..مو معهد ..صار ..استراحه ..
طبيت ..
البنات تلكوني ها ..كتلهم اسكت ..اليوم من اوله طين ..
ضحكت استلمي ..ست سناء اطين الباقي ..اليوم..
كملنه المحاضرة ..
ودخلنه ثانيه ..وامتحنت ..وجاوبت الي جاوبته ..
يوم متعب وممل..سنه ثالثه بعد سنتين واتخرج ..
جانت صديقه الي مقربه ..مروة حجيت الها الي صار ..
كتلها ولهجته ماعرف شلونها يولو ..وهينه وتكومتي ..
هههههه ولج ماعرف بيهن اني ..
اي ولا اني ..
مراوي ميته جوع امشي ناكل ..
جانت اكو كافتريا عود ..صبات ..اسمنت ..وكشك ..
مشلع ..ويبيع علينه لفات وببسي ..والاحلى مغلفي بنايلون ..
واحنه فرحانين بي ..
اكلنه االفات وبقينه نسولف ...
كتله باجر ..امتحان عربي ..هف ياربي شوكت نرتاح من هلضغط اعصابي تعبت والله ..
يلا حبي مضل شي كله كم شهر ونكمل ..
مروة ..عاجبني اصبغ ..احمر ..
صفنت عليه ..اي حلو يلوك الج ..
اني قمر.عمري 17سنه ..طولي 173..مرببه ..بضخامه ..بيضه وشعري ..كاريه ..
عيوني ناعسة ..وشفتي متروسه ..
يكولون حلوة ...
بقينه نسولف اني ومروة كملنه الفرصه ..
وطبينه المحاضرات ..
خلص الدوام ورجعنه ..للبيت ..رجعت وي الخط وكتله تاخر ت بسبب..صار ماكلت وكعت مافشل روحي ..دوامي يخلص ب2الظهر ..
وصلني ..للشارع العام وطبيت ...
براس شارع العام كشك ...ملمومين عليه الجهال يشترون ..
وكفت اخذت ..منه كم شغله تمتوعه لليل ..
وكملت مشيتي ...
وصلت للمكان الي وكعت بي ...
اباع الحفرة ماكو ..
اندار ع البيت ..الباب نفسها..
البيت جان جبير وبناءة حديث دبل فاليوم ..واكو حديقه ..خارجيه مستطيلة ..
والباب سودة وبيها ذهبي ...
شفت ..طابوك ..والحفرة ..مسويها ..
عبرتها ..
اسمع واحد صاح ..يابنت ..
يابنت اكفي ..
انداريت ..نفسه الولد الي صبح شفته ..
نعم ..
كال طميتها ..
نعم ..
النكرة ..طميتها ..
ي والمطلوب شنو ..
صفن عليه ..
كال اني قائد ..
بقيت اباع عليه ..
اخي المطلوب شنو مني ..قائد ع نفسك ..اني شعليه ..
اف ..بقى تتكاونين وياي ..
شنو ..
ماله لازم ..اني طميت الحفرة ..
ي شكرا ..بس مو حفرة ابويه هيه ..والله يالله ..
عفته..ومشيت ..
شبي هذا شديحجي ....بطران ..واذا ماطميتها ..
انتبهت ع شكله ..عيونه كبار ..وشوارب ..عندة ..
هسة اني شعليه موكفني ع حفرة ..
طبيت للبيت ..
سلمت ع اهلي ..وذبيت الغراض ..ماما ميته جوع ..
يلا غسلي وبدلي ..دا صب غدة ..
كمت ..ذبيت هدومي ولبست تراك ..ولزكت بصف الصوبه ..
نعسانه وجوعانه ..وتعبانه ..
صاحتني امي ..كعدت اكل ..
اخويه كلي يكولون اليوم واكعه ..
اني باوعت عليه ولكمه بلحكي ..
ي.
هههههه حيل مامتي شو ..
اهووو ماما ليش كلتي اله هسة يخبلني بسوالفه ..
امي كالت ..ولك ..عوفها ..لا تلح ..احمد ..
حيل والله لو شايفج اموت ضحك ..
مو اكل طلع ..هذا سم ..
اوكفي ..وين وكعتي ..
معليك ..
عليج الله ..
شمدريني ..ودليته ..
هااا يم بيت قتيبة..
منو هذا ..
جماعه مو منا ..كاعدين جديدين ..
ها مين لعد ..من الرمادي ..
هاااا ..
ي ..
كملت الاكل ..وكمت اريد انام ...
رحت للغرفه ..طفيت الضوة ..وخليت راسي ..ع المخدة ..
.....ضليت ..اتكلب وبية سوله قبل لا انام العب بشعري ...
سالت روحي بله اني ليش هيج جاوبت الولد..
عيب هوة سوة مساعدة ..
نمت ماحسيت الا امي تكعدني ...
كمت ..من نومي ..غسلت ..وكعدت ادرس ..
وشغلت الاغاني ...
كملت دراستي ..وطلعت ..يم اهلي ..
كعدت اخويه طالع ..بقيت ..يم امي واختي ..
انهار ..جانت ..طالبه كليه ..وهم ملتهيه بدراستها ..
وابويه ..مدمن طوبه ...اربعه وعشرين ساعه يباوع ..
ويعصب ..ويفرح ...هم جنت اتابع ويا الدوري الانكليزي والاسباني ..وكاس العالم ...لان من الصغر تعلمت ع الطوبه والتشجيع ..
سوينه عشا ..ورحت اغسل هدومي واحضرهدوم لثاني يوم ..التنورة انعدمت بعد ..متنلبس بعد نشكت ..
غسلت القميص ..وشريته ..
اذكرت جنت لابسه لفاف اسود صوف وبنهايته وردة ..
دورت ماكو ..اف وينه ..
بس لا وكع يم هذا ابو الهينا ..
لو اطين ..وذبه بلزبل ..
طلعت ..تعشيت ..وي اهلي ...
وكعدنه نسولف ..شويه ...وراها طبيت ..غرفتي ..
اريد انام ..طفيت الاضويه ..وشغلت ...التيبلم ..
وكعدت ..اقرة رواية.
من روايات عبير ..
وادخل بعالمهم ..وانسى ..عالمي ...اقرهه
لحد ماغفى ....
كمت ثاني يوم مثل كل يوم ..
كمت غسلت ..
واجيت احضر روحي اني دائما فاتحه شعري
لان قصير ..وخليت كحل خفيف وبس ..وبدلت هدومي ..
لبست تنورة سودة قصيرة ..وقميص .ابيض وسترة قصيرة..كابوي..
ولفاف ع الركبه ..مهم اعشق الفافات ..
ولبست وبوت .بعدها مغيمه ...وتعطرت وطلعت ....
الكل نايمه ...فتحت الباب ..وقفلته وضميت المفاتح .
ومشيت ..بلطرمه ..طلعت وسديت الباب ..
وطلعت امشي ..الهوى بارد وريحه مطر بلشجر ..وغيم ..
مشيت ..وصلت ..للشارع ..
من وصلت للمكان الي وكعت بي ...
طلعلي جلب .اسود جنه ذيب ...ينبح عليه ..اني عطت بنص ..الشارع وركضت ع الرصيف وكعت الفكس والغراض من ايدي ..
.طلع وراه الولد ..من بيتهم ..
بلاك تعال ولك ..واجه جرة من يمي ..
اني واكفه ولازمه قلبي احسة راح يوكف من الخوف ..
ونفسي سريع ...اجه يمي خوما خوفج ..
رفعت راسي ..عليه ..كوة اجر النفس ..
كتله بربك هاي عمله ناس عاقله ..
ضحك ..لا تخافين مايعض ..يعرف ريحتج وجاج ..
بقيت اباع عليه ..وخرة منا عفيه اريد اولي لدوامي ..
راح اموت ..
اسم الله عليج ..عيني ..
جرة وطببه جوة بلبيت وسد الباب ..
اني رحت اخذت غراضي من الكاع ..
كال اني اسف ..
اني بعصبيه وحديه كتله انت متعمد هيج تسوي ..
هاي اذا ماانت سويت الحفرة ..
ضحك لا يابوي ..هههههه شنو السالفه ..
اخذتهن ومشيت ...واحجي عليه مخبل ..
اسمعه يكول يولو ..
اني منداريت ..
يابنت ..
كلت خاف وكعت شي درت وجهي ..
كال شسمج ..
اني اشرت اله ..بأيدي ..
مخبل ..
ابتسم ..
واني مشيت ...
عفته ومشيت وبكلبي اكول هذا مخبل موطبيعي ..
يمه شون جلب هد عليه ..هف ..شجلب بيه وشنو هلسوالف التعبانه ..كملت ...
وصلت ..لراس الشارع ..
صعدت ..السلام هليكم ..
هلو ..قمر..
هلو حبي ..
ابو الخط كال ..قمر دانتظرج هوايه شنو السالفه ..
والله يا ميثم ..مو اني ..بس سوالف تعبانه تصير ..
طلعلي جلب ..وخرعني ..
ضحك ..خوما عضج ..
ههههه لا ..طلع صاحبه وطببه
سلامات سلامات ويضحك ..
مشينه..الجو بارد ..حلو ومغيمه ...
وصلت للمعهد زين طبيت ..وي الدوام متاخرت ..هوايه ..
جان اكو استاذ يجينه ..استاذ لؤي ..
كلنه جنه من نشوفه نفتح حلكنه من الجمال بيوم المحاضرة الكل تبدل وترتب روحها ...
جان كلش حلو ..طول وجسم وابيض ..جميل بمعنى الكلمه ..يشبهه هيثم يوسف ..
فلكل جضر روحه ..اليوم استاذ عمار ..
طبينه للصفوف ..
اكو بنيه ويانه ..اسمها سمرجانت كلش حلوة ..
وتكعد اول ..رحله ..وترفع من تنورتها وتكعد كبال الاستاذ..عود تسويله اغرائات..
طب النه ..
السلام عليكم ..
وعليكم السلام استاذ ..
هاي تكول ياعسل ..وهاي تكول ياكيك ...
تصنيف ...
بدة ويانه بلحصه ..ويشرح النه عن علم النفس بلطفل ..
وهاي سمر ترفع بهدومها ..
والاستاذ يمسح بلعرك ويباع عليها ..
تسطرة سطر ..ويكوم حتى ميعرف يشرح ..
ويترك الدرس علينه مكطم واحنه نضل نضحك ..
لحد ماتخلص الحصة ..
وتكول اجيبه اجيبه ..لهذا العسل ..
سحر جانت كلش بيضة وناعمه وعيونها صفرة عبالك بزونه ..وملامح وجهها كلها نازكه
بزونه ..وملامح وجهها كلها نازكه وناعمه ..
جانت تحب ولد يمنه بلمعهد..
مو راحه مخلة وحدة بينه ما حاول وياها ..
بس شيفيد تحبة هيه ...
كملنه باقي المحاظرات بشقه وسوالف ..
لحد الظهر ..ب2 طلعنه ..
بيتنه جان بعيد ع المعهد ..
علما اوصل اني و3 بلبيت ...
طلعت كعدت بسيارة ..
وبالي يم هذا لا ارجع ..وهم يطلع بسالفه ..
خاف من الجلب ..هف لو شيطلعلي بسالفه ..
تمشي السيارة وعيني ع الشباك ..
وصلني ع الشارع ..نزلت..
ميثم جان عينه عليه ..
هوة طالب بلكلية ..تربيه رياضيات ويشتغل ..بخط ..
سيارته ..جانت بي ام ..ماخذني اني ..واخته وبعد بنات اثنين ويانه من المعهد من غير ..مرحله .
اخته حنين جانت دائما تكولي ..ميثم يسال عليح..
والطريق كله يباع علية بلمرايه ..
شكلة جان عادي بس اكرع ومزين صفر هوة ..
اني بالي لا يمه ولا يم اي احد ..
ابالي ..اتخرج وادخل جامعه ..وراها عود اقرر ..
حياتي حلوة وهادئة ..وجنت اتمنى يجيني هذا الحب ..
الي يهز كياني ويحيني من جديد الي يعيشني بعالم الروايات ...وشويه يبعدني عن الواقع الممل ..واتمنى فديوم قصه حياتي ..
تصير روايه ..
وصلنه نزلت ..مثل كل يوم اروح للكشك اشتري كم حاجه وراها امشي ..هلمرة امشي بقلق لا يطلعلي ..بشي ...
امشي وايدي ع كلبي..واتلفت وافز الف مرة جيت اوكع ...من الخوف .. ..منه ...
الكاتبه :_
سوزان المندلاوي
