المهم هذا ظل كم يوم يباوعلي من بعيد فجاءة راح بعد ماشفته وحتى كام ميجي على خطيبته الي هي صديقتي المهم اني بهاي الفترة والدي كال نسافر نغير جوو وصادف انو هي نص السنه وعطله والدي حب يسفرنه يونسنه اني ماكنت راغبه للسفر واني كنت عندي علاقه كلش قويه بت خالتي فكتلهم مااريد اسافر اروح بيت خالتي احلام وبعد ماقنعتهم بقيت وهما سافرو وبقيت اني بيت خالتي
خالتي كانت عدها اربع بنات ولد صغير كلش
ولمن رحت بقيت انتبهت على جوارينهم كان بيت جوارينهم عدهم ولد شاب يعني يطلع عمرة١٧سنه تقريبا كان يباوع عليه من اطلع للحديقه من كنت اطلع ويا البنات جان شكله حلو وظليت طول الفترت الي بقيت بيها احنا يينا بس نظرات بينه اعجاب مراهقه
وبعدها اهلي رجعو و رجعت للبيت وكنت اتوسل بوالدتي حتىً تخليني اروح يوم الخميس ابات يم بيت خالتي
وكنت فعلا ابات يمهم حتى بس اشوفه كان اسمه محمد
من الاسامي الي نحفرت بداكرتي ومانسيتها وظلينه فترة طويله واحد يباوع على الثاني من بعيد
خلصت السنه ونجحت ورحت للرابع اعدادي كانت مراحل البلوغ وكانت مرحله انو شكلي يتحول الى بنيه شابه وفعلا اصبح شكلي اجمل ومرة من المرات كالمعتاد نويت اروح بيت خالتي ورحت يمهم وكان بيت محمد جوارين بيت خالي هوسه وسيارات بابتهم وناس هوايه بالباب واكفين واحنه كنت اني ولا بنات خالتي عادي نطلع كنه نطلع لاابو محل او نوكف نحجي ويا جوارين عادي جانت الدنيا بخير والناس كانت خوش ناس وعلى نياتهم الا هذا الشخص الي صادفني
بهذا اليوم الي قلب حياتي وغيرها كلها وخلاني اتندم على الساعه الي اجيت بيها لبيت خالتي وشفت
العصر من جنت بيت خالتي
خالتي دزتنه لواحد يبع مواد غذائيه كان محله بدايته الشارع مال بيت خالتي رحنه اني وبت خالتي وبااثناء رجوعنه شفت واحد لابس العسكري وشكله جان غريب او حلو مااعرف شلون وظل هذا الشخص يباوعلي لحد ما دخلت للبيت
ورة اوبع تيام خالتي اتصلت باامي وكلتلها بتج اجوها خطابه امي كلتلها مو تعرفين اني ماازوجهن الا يخلصن السادس اعدادي
كلتلها هسه انتي عرفتي منو كلتلها منو كلتلها بيت ابو محمد اخو ابو قتيبه ابو اخو ضابط قتيبه شاف بتج بيوم الي راحو لاابو المحل وسائل عنها وعارف كلشي عنكم واليوم مرت ابو قتيبه وام محمد واجتي حجيت ويايه بالموضوع كلتلها امي ماادري خلي يجي ابوها واشوف شلون اجه والدي
والدتي فاتحته بالموضوع ورفض الفكرة من الاساس
ردينه خبر للعالم انو ماازوج وبعد اسبوع راح الولد وابو على والدي وطلع ابو صاحب املاك ومعارف
وابنه ضابط والدي تردد يكللهم لا كاللهم اشاور البنيه انشوف شدكول ولمن جه لبيت سمعته ديسولف لوالدتي ديكللها هذا واحد وماريد ندخل وياهم بمشاكل
كلتله والدتي لعد شنو الحل كال ماادري وظلت فترة السالفه سكته وهما هم بعد مااجوي على والدي وكلنا السالفه انست ولكن بعد تقريبا شهر وشويه العصر اجوي على والدي الولد وابو واخوته تلاثه وعمه وحاجين ويا والدي والدي قنع
المهم لمن راحو كال والدي ترة اني خلوني كدام الامر الواقع وماكدرت ارفض وابنهم مابي شي يرفض ومن عائله راقيه وضابط وحلو هوايه بيه شغلات ومومال يرفض
كتله بابا انت دائما جنت دكلينه تصرفو بحريتكم وكنت دائما اشجعنا ناخذ القرارت باانفسنا وهذا قراري اني
شلون اخذته بالنيابه عني كلي شوفي اني فعلا وافقت وكلت اي ولكن اني من اجلكم مستعد احارب الدنيا واذا انتي رافضه هاي الزواجه وهسه كلتيلي لا مااريد ماااخليج تزوجين لو تنكلب الدنيا ولكن لازم اخليكم بالصورة وتاخذون بحسبانكم انو راح نواجه مشاكل لان هذاك الوقت ديكون رفضنه اله انتقاص منه وراح يثور لكرامته فاانتي قرري
ظليت بحيرة مابين وبين ولكن وافقت وبعدني صغيرة وتفكيري مو واعي وقراراتي موصائبه ولكن وافقت وفعلا بعدها بااسبوع صارت الكعدة مال زلم وقرو الفاتحه وكانت كعدت الزلم مالتي المهم انو استمرت خطوبتنه شهرين وبعدها ازوجنه اني وقتيبه
متكلمت عنه اسمه قتيبه
قتيبه كان وسيم وشخصيه وكاريزمه قويه
محطات من حياتي من محمد والشخص الي كان يلاحقني الى قتيبه تحولات سريعه وغريبه صارت بحياتي
المهم انو ازوجنه وكعدت يم بيت اهله من اول يوم دخلت لبيتهم حسيت بغربه شديدة حسيت انو هذا المكان راح يكون بارد بمعنى انو بارد عاطفين مايحمل جو حميمي
جو عائلي
قتيبه رفض اكمل دراستي واني كنت مصرة بالبدايه وبعدين
وصارتلي مشاكل لحد ماعجزت وكمت مااكله على الدراسه الشعور الي كنت احسه ويا قتيبه مزيج مابين رغبتي انو انام بحضنه واشتم عطرة واسمع صوته ومابين انو وجودة يرهبني ويربكني
ويخليني مااشعر بالراحه شعور ممزوج مابين عاطفه ومابين خوف اما علاقتي بااهله كانت بسيطه جدا ولكن ماسببولي اهله مشكله ابدا بالعكس والدت قتيبه كانت انسانه جيدة بس ظروف قتيبه شغله كبريائه
انشغاله الدائم كل هذا كان يزعجني
طبعا قتيبه كان غيار ويشك ولكن برغم كل هذا حبيته
وكنت احاول ارضي وكان ارضائه صعب
لان جان كل شويه بمزاج لان بعض الاوقات من اني وياة يخليني اعيش بجنه احس نفسي صدك بالجنه وبعض الاحيان اكرة عيشتي وياة
خلال فترت زواجي والي دامت تقريبا ٤سنوات صارت عندي بنيه سميتها فردوس على اسم والدت قتيبه ولكن يوم بعد يوم كامت اصير مشاكل بيني وبين قتيبه احتياجي اله زاد والجرعه الي جان تتضمن شوفته وقربه وكلمتين تلاثه منه الي ينطينياها في بعض الاوقات كامت ماتكفيني
وهو ابتعد عني جدا كنت مرة اشوفه انسان محب ومرة اشوفه يعتبرني حالي حال اي لوحه بالبيت كنت دورات احسه ينظر الي على انو اني مكمله جماليت البيت يعتبرني مثل كلشي يملكه بحياته بيت حلو وظيفه جيدة ومكان مرموق وزوجه صغيرة وحلوة وبنيه صغيرة اشبه بالملاك الي بنته فردوس
فكان يشوف بينا مكملات واني مارضيت بكل هذا وصارت هوايه مشاكل لحد ماطلعت زعلانه وطلبت منه الطلاك
والمشكله انو هو وافق بدون اي كلام
يتبع .....
#الكاتبه #روجمان
