أحببت طفلة ( باللهجة التونسية )

الحلقة 14

حلقة 14 ملاك تحكي: وقت فقت لقيت ايمن قدامي سألتو اما مجاوبنيش وقتها الاحداث تعدات الكل قدام عينيا منجمت نعمل شي حتى اني مقدرتش نبكي نعرف اللي هما مشاو اما نحب نشوفهم اخر مرة نملي عيني منهم نشبعهم قبل ما يروحو طلبت من ايمن يخليني نشوفهم مشا يحكي مع الطبيب ورجعلي قال لانا نجم نشوفهم نحيت سيروم من يدي حتى بلا ما تعاوني الفرملية هزيت روحي من السرير نحس في راسي رزين برشا شدني ايمن من معنديش قوة نمشي و لا حتى نسألو اش يعمل هنا كل لي كان يهمني اني نشوف بابا و امي ...بقينا نمشو لين وصلنا وين يحطو الموتى كان بلاصة باردة برشا نحا ايمن الفاست متاعو حطها على كتافي بقيت نتبع فالفرملية لين وصلنا لبابا وامي ..قربت من بابا حطيت يدي على وجهو كان بارد برشا دمعة سخونة طاحت من عيني على صدرو انا:بابا نعرف راك تسمع فيا علاش عملت هكا نعرف اللي مش قصدك صاوبت على امي امان فيق اكيد باش نسامحك بابا امان متخلينيش نوعدك معادش نطلب منك شي انت بركا فيك علاش تعمل فيا هكا علاش مشيتو و خليتوني انا توا ليمن باش نبقى من غيركم علاش بابا انتو قتلتوني معاكم ...دموعي نزلو يحرقو طلعت شفت امي هزيت روحي مشيت عندها بسيف مش مصدقة اللي راهو يصير قربت من امي زادة كانت باردة برشا حطيت يدي نعدي فيها على وجها انا:امي انا هنا علاش انتي باردة هكا كيف بابا امي بابا محبش يفيق امان انتي فيقي نوعدك باش نفيق بكري و معادش نمرجك نوعدك باش نقرا دروسي الكل كيف ما وعدتك امان فيقي امي علاش تعملو فيا هكا و الله تعبت برشا طحت فوقها نبكي و نبوس فيها بلكشي تفيق اما شي حسيت بيدين تحطو على كتافي تلفت لقيتو ايمن زادة كان يبكي انا:ايمن امان قلهم يفيقو امان ايمن:ملاك خلينا نخرجو انا:منحبش باش نحكي معاهم امان بعدت عليه ورجعت لبابا نمسح في دموعي انا:بابا شوف معادش نبكي مش انت تقولي متحبش تشوفني نبكي باهي شوف راني مسحتهم شبيكم متحبوش تفيقو زوز ايمن:ملاك ايجا نخرجو يزي تعذب فيهم راك انا:امان نحب نحضنهم بركا ايمن:باهي قربت من بابا حضنتو و بستو عرفت اللي هوما مش باش يفيقو سيا مشاو رجعت لامي حضنتها بكل قوتي قرب ايمن جبدني لعندو و كبس عليا نحس في راسي رزن برشا بقيت نشوف معاهم لين معاد حاسة بشي حملني ايمن ورجعني للبيت...بعد اليوم كلشي وفا رجعت وحدي من اليوم باش نعيش وحدي مفماش بابا ليحبني و يخاف عليا و مفماش امي لتفيقني و توصيني كل على قرايتي منعرفش شنوة لي باش يصير تعدات جنازة كبيرة مشا فيها بابا و امي فرد نهار طلبت منهم برشا انو يخلوهم جريت برشا اما ايمن كان معايا بقى شادني منعني اني نخالط عليهم كانو باش يدفنوهم فتونس اما حد من عيلتي ما حب يستقبلهم على هذاكا دفنوهم هنا ايمن تكفل بكلشي حطو امي و بابا تحت التراب جمب بعضاهم و خلاوني انا وحدي هنا دموعي نشفو معادش نجم نبكي تعبت و تهديت في يومين رجعني ايمن لدارنا كانت باردة برشا الاحداث الكل تعاودت في مخي اول ما دخلت مشيت لبيتي نجري منحب نشوف شي بقات معايا كلوديا و سام مسافر لتوا مرجعش عديت نهار الكل في بيتي و كلوديا معايا ايمن زادة كان في الدار و المحامي متاع بابا ووسيم معاهم تعدات ليلة منجمتش نرقد و لا نجمت نبكي هزيت راسي صباح نزلت اللوطة لقيت برشا ناس يهزو في الدبش و ايمن زادة معاهم انا:شفما شنوة اللي راهو يصير هنا ايمن:ملاك هاذوما متاع البنك انا:شمعنى ايمن:ايجا نفهمك قرب مني شدني من يدي و طلع في عينيا ايمن:ملاك هاذوما متاع الحجز انا:علاش ايمن:على خاطر ب بوك فلس و كلشي يرجع للبنك انا:على هذاكا قتل روحو ايمن:ممم انا:وين باش نمشي توا اكيد باش يرجعوني لتونس و كيف ينجمو ياخو دارنا مني فيها ريحة بابا و امي و ذكرياتي الكل ايمن:باش جي معايا انا:وين ايمن:لداري انا:كيف ايمن:من اليوم باش تعيشي عندي انا:اما ايمن:انا وعدت بوك و هو طلب الشي هذا يعني رغبتو هو انا:بالحق ايمن:و رحمة بابا انا:باهي