أحببت طفلة ( باللهجة التونسية )

الحلقة 8

حلقة 8 رجعت لبيرو هذاكا نجري لين تقطع عليا النفس لقيتو قاعد على كرسيه متحركش هاز ستيلو في يدو اول ما دخلت بقا يشوف معايا من الفوق للوطة حط الستيلو على البيرو وقام من بلاصتو وقتها قلبي رجع يدق برشا قرب مني وقف قدامي ريحة برفانتو معبية البيرو الكل طلعت في عينيه وجهو ما فيه حتى تعابير منجمش نعرف فاش راهو يخمم و لا على شنوة ناوي اما اللي نجمت نعرفو انو وحلت معاه كنت نستنا فيه باش يحكي و مركزة مع كل خطوة يعملها هز يدو حك لحيتو بعدها نطق ايمن:كل الكلام هذاكا و زادة ساعتين روتار و اكثر من هكا خرجت من البيرو ورجعت بلا ما نسمحلك انا:هاذوما كامل باش تحاسبني عليهم مش هكا ايمن:انت اختار نحاسبك انا و لا بوك انا:لا الا بابا ماو خبرتك شنوة ينجم يعملي امان انا مستعدة نعمل لي تحب ايمن؛باهي ايجا معايا توا انا:وين قحرلي رجعت هزيت براسي باهي اش راح نعمل لازم نسايرو ولا باش يخبر بابا بكلشي خرج من البيرو خالطت عليه كل واحد نتعداو عليه يحترمو جاب ربي ميعرفوهش كيف عامل كان انا يستنى عليا بركا والله لما نرجعلو الفازات الكل ...وصلنا للاصونصير دخلت بلا ما نسألو احسن شي منحكيش معاه نزلنا لوطة كامل كملت خالطت عليه و انا نخمم في شنوة اللي باش يعملو فيا اكيد هو ناوي يقتلني تي ملاك سيد فارغ شغل يقتلك اما كان يغتصبني ماو هذاكا نهار باسني لا ميعملهاش هو شريك بابا و زادة الراجل بهيبتو شيلزو يعمل هكا اما علاش جايبني هنا وطابق اللخر زادة ومفماش خدامين برشا اكيد باش يضربني خليه يحاول بركا والله ما نقتلو انا لا يمشي في بالو منجمش ندافع على روحي اتو يشوف اش نعمل فيه كنت نمشي وراه و الافكار هاذي الكل تحوم في مخي و هو ما قال حتى كلمة جيست بقا يمشي لين وصلنا للباب فتحو ودخل و انا دخلت وراه من الدوسيات و الاوراق لفما كان يظهر فيه ارشيف تلفتلو نسأل فيه انا؛اش نعملو هنا ايمن؛شفت الدوسيات لي على البيرو هذاكا انا:ممم ايمن؛ترتبهم الكل انا:شنوة اما انا منعرفش ايمن؛جيست على حساب التواريخ و الشريكات انا:منجمش راهم برشا باش نعدي معاهم النهار الكل ايمن:باهي كيف ما تحب انا؛يعني ايمن؛باش نخبر بوك بكلشي انا:باهي باهي استنى توا نرتبهم ايمن؛باهي تكملهم قبل 16:00 مكانش نكلم بوك انا:باهي خرج بلا ما يزيد كلمة وغلق الباب وراه باهي يا سي ايمن اما هكا احسن ما يخبر بابا حطيت كرطابلي وهزيت تليفوني حطيت الكيت احسن شي نعمل جو مع روحي و نكمل الدوسيات هاذوما و نتهنا من السخطة هذاكا ايمن يحكي: كلمت سي احمد باش نخبرو اللي وقت الاجتماع تبدل و باش نخلوه الجمعة الجاية اما هزت عليا الفرخة هذيكا محبيتش نخبرها لانا نحكي معاها جيست ستنيت باش تهز تليفون لبوها اما سمعتها تحكي عليا ياخي لدرجة هاذي منجمت تبعدني من مخها و اكثر من هكا كلامها الماسط متبدلش اما مش باش نعديهالها المرة هاذي و باش نمرجها لين يوفا الاسبوع تعدا النهار بكلو و انا نخمم كيف نجم نوصل ليها لين سمعت تليفوني ينوقز برشا مرات وقتها كنت ندوش اما بقا ينوقز لين خرجت وهزيت من صوتها عرفتها اما حبيت نتلفها اهي وصلت لعندي بلا ما نتعب روحي وقتها مشا في بالي نخليها جيني لشريكة وفما نجم نخمم اش راح نعمل فيها ...اول ما فقت الصباح كتبتلها مساج انو 8:00 تكون عندي اما الفرخة مجاتش حتى لل 10:00 و اكثر من هكا خرجت من البيرو بلا ما تخبرني فكرت للارشيف راح يكون احسن عقاب ليها وصيت خدام عندي يحط الدوسيات القدم لكل عالبيرو وطلبت منها ترتبهم اكاكا باش مرة اخرى تعرف اش تحكي