أحببت طفلة ( باللهجة التونسية )

الحلقة 21

حلقة 21 تبسمتلو وطلعت لبيتي قعدت عالسرير هزيت تصويرة امي و بابا بقيت نشوف معاها اما المرة هاذي مبكيتش يزي ما بكيت كان بابا عمل هكا على جالي انا زادة نجم نمشي عندهم بست التصويرة وحطيتها عالسرير ودخلت لبيت البانو طلعت على روحي فالمرايا سكرت عينيا تفكرت وقت بابا كان يقول اني اغلى حاجة عندهم و هما زادة اغلى شي عندي عبيت البانو ودخلت فيه بدبشي هزيت القزازة في يدي طلعت فيها و نزلو دموعي حطيتها على يدي سكرت عينيا وقطعتها محسيتش بالوجيعة على خاطر وجيعة قلبي اكبر من كلشي قطعت يدي ثانية ورميت القزازة عالارض نشوف فالما كيف رجع احمر سكرت عينيا نتفكر في كلشي عديتو في حياتي دموعي تخلطت بالدم و الما توا نجم نخالط على امي و بابا و نتهنا من الدنيا الكل بقيت نسخايل في بابا و امي لين معاد نحس بشي ايمن يحكي: وقت دخلت و شفتها قاعدة فالجنينة طمنت عليها حتى وقت قعدت معاها عالعشا كانت هادية و في الصالة زادة كانت تحكي عادي استغربت من تصرفها كيف تحولت هكا و اكثر شي استغربتو انها قربت مني و باستني على خدي صحيح مرات تكون هادية اما اليوم زادة تصرفاتها مش طبيعية خليتها تطلع ترقد كملت ركحت الدوسيات الكل جاتني البون في يدها تليفون ملاك قالت لعندو برشا و هو ينوقز على خاطر خلاتو فالجنينة ...لقيت صحبتها تكلم فيها هزيت تليفون و طلعت عندها اما مكانتش في بيتها كنت باش نحط التليفون و نخرج اما رجع نوقز و زادة مفما حتى حس في بيت البانو قربت من الباب نوقزت عليه انا:ملااك تليفونك ينوقز تسمع فيا راك اما مرجعتليش رجعت كلمتها انا:ملااك تسمع فيا نكلم فيك راني اما شي تحيرت علاش متحبش ترجع وقتها رجعت الاحداث في مخي تصرفاتها و الكاس لكسراتو انا:ملاك كان متفتحش باش ندخل حاولت نفتح الباب اما كان مسكر رجعت حاولت برشا مرات لين كسرتو اما متوقعتش باش نشوف المشهد هذاكا اخر شي توقعتو اني نشوف ملاك غارقة في دمها داخل البانو حسيت قلبي طاح مني قربت منها خرجتها من الما كامت باردة برشا شفافها زروقة انا:ملاااااك فيق ملاااك تسمع فيا اما شي هزيتها بين يديا نعيط على البون تهزلي غطا و تفتح الباب حطيتها فالكرهبة و غطيتها كانت مقطعة يديها الزوز و لتوا مزالت تنزف انا:ملااك اتحمل امان اتحمل توا نوصلو معرفتش كيف وصلت للكلينيك هزوها من يديا طلعت على سوريتي كلها دم مكانش لازم نخليها وحدها و هي امانة عندي منجمتش نحميها توا باش نخسرها منعرفش شحال تعدا وقت و انا نستنا قدام باب العمليات لين خرج الطبيب مشيتلو نجري انا:كيفها طبيب:لحقناها اما هي خسرت برشا دم انا:يعني باش تعيش طبيب:ايه اما باش نخلوها في العناية ليلة هاذي انا:باهي تعدا الليل الكل و انا نشوف فيها من البلار مكانش لازم تعمل هكا نعرف اللي مزالت صغيرة برشا على اش تعدا عليها اما المرة هاذي انا سبب انا متوقعتش تصرفاتها نحس مخي باش يتحرق كلمت وسيم يجي عندي خليتو معاها و رجعت بدلت دبشي منحبش تفيق تشوفني بالدم متاعها على دبشي رجعت عندها قبل ما تفيق قال طبيب لتنجم تفيق في اي وقت طلبت منو نبقى معاها لين تفيق خلاني دخلت هزيت كرسي وقعدت قدامها نطلع فيها كيف راقدة يا ريت فهمت عليها وقتها و منعتها تعمل هكا اما فات الفوت و هي توا مسطحة هنا ...بقيت نشوف معاها كيف تحرك في عينيها عرفتها لهي باش تفيق فتحت عينيها بسيف بقات فترة و هي تطلع للسقف انا:ملااك اما مرجعتليش و مطلعتش فيا زادة انا:ملاك تسمع فيا مطلعتش فيا حتى خرجت كلمت الطبيب يجي يشوفها انا:شبيها طبيب:مزالت تحت الصدمة انا:شقصدك طبيب؛برشا احداث تعداو على راسها باش تبقى فترة هكا لين تتقبل الوضع انا:يعني معادش تتكلم طبيب؛لا فترة اكهو حاول تعمل حاجات اللي تحبها هي مكانش خليها تشوف طبيب نفساني انا:باهي خرج الطبيب و انا رجعت قعدت معاها نشوف معاها كيف سارحة انا:ملاك علاش عملت هكا في بالك هذاكا شي صحيح بوك عمل هكا على خاطرك عمل هكا باش انت تنجم تعيش علاش عملت هكا مش انت وعدتهم باش تنجح اما ظاهر مراكش قد الوعد شفت دموعها نزلو حالتها تسخف قربت منها مسحت دموعها انا:ملاك انت امانة بوك عندي مراكش وحدك انا معاك معادش تعمل في روحك شي باهي مرجعتليش اما نعرف اللي هي تسمع فيا و اخر مرة نسمحلها تعمل هكا في روحها تعداو يمات فالكلينيك بقيت معاها انا ووسيم زادة و صحبتها كل مرة جي تحسنت حالتها اما متحبش تهدر رجعت تاكول عادي و اليوم باش نرجعها للدار اما خليتها تبقى في بيتي معنديش فيها ثقة نخاف ترجع تعمل شي في روحها نبقى معاها ليل الكل لين ترقد ونرجع نرقد عالفوتاي تفكرت كلام الطبيب اللي لازم نعمل شي تحبو باش تنجم تتكلم عادي اول شي فكرت فيه هي دارهم عملت اتصالاتي مرة اخرى و المرة هاذي طلبو ضعف مبلغ لدار وافقت عليها احسن ما تضيع من يدي مرة اخرى