بنت الريف وابن الشام

الجزء3

#بنت_الريف_وابن_الشام

nada hs
الجزء الثالث...
حسيت نفسي كلش ضايجة مدري ليش.. بعدين  كلت لروحي وليش ضايجه مو شفتي اليوم وتعافيتي انجبي واسكتي..
رجعن بنات عمي وكالن نريد ندخل حمام وجهزنا الهن    من طبن كلها ظلت فاكه حلكها.. ولد عمي اخوتي رجوله خواتي حته النسوان .. جانن منكعات مي وملابسهن لاطشه عليهن واجسامهن تخبل ووجوهن مدوره وتلمع ..
امي استحت عليهن وذبت عبي عليهن وطبن.. هههه هنه هم من فشلتنن بعدين كالن ليش خليتينا وحدنا ..
انه ظل بالي يم جمال وين راح  وشلون شكله من طلع من المي..
بعدين كلت لروحي ثول شني شلون صار من طلع قابل انكلب شكله...

جمال...
انا او اني جمال.. امي من سوريا ووالدي عراقي.. مااقصد عمي طاهر لا .. اني والدي الاصل عراقي.. توفى من عمري سنه ونص ومااتذكر حتى شكله.. والدي كان صديق عمي طاهر وكان عمي طاهر وامي يلتقو كثير من الاحيان.. الى ان تزوجو .. عند عمي طاهر ابد ماحسيت حالي غريب العكس .. حسيته والدي الحقيقي ويمكن حتى الحقيقي مراح يحبني بكد حبه..
تربيت نص عمري ويا وعلمني ودلني ع الطريق الصح والخطأ وصارت عندي اختين من بابا طاهر وكان يعلمنا كيف نشد ادينا بايد بعض ونتعاون .. 15 سنه بابا طاهر هو الي رباني الى ان توفى وترك النا جرح كبير بفراقه.. اتذكر شلون امي كانت تتوسل الناس يتركوها تشوفه .. بس كان ابو طاهر يمنعها دوم ويتهمها هي بمرضه..مرت الايام ومرينا بظروف صعبه جدا واشتغلت وبنفس الوقت ادرس وماما تعبت الى ان اعتمد كل واحد منا ع نفسه..دخلت الهندسه معمار  وطبعا هاي رغبة امي وماحبيت ارفض واضوجها اكثر من حزنها ع بابا طاهر..و شذى انخطبت لابن خالي ونهى ناويه تكمل ماستر..
بيوم وصل لامي خبر انها لازم تروح ع بيت جد اخواتي... وترددت كثير وحاولت تعرف السبب .. ستي يعني بيبي ام امي قنعتها تروح وطبعا ماكدرت اتركهم لحالهم اخذت اجازة من شغلي الي هو بشركه اعمار .. كنت ناوي بس اوصلهم واكعد بفندق بس الجماعه اصرو اله ابقه .. بقيت وشفت الكرم نفسه الي كان عند بابا طاهر.. الاكل انواع الناس الي اجتي تشوفنا سوالفهم طيبتهم كل شي حلو بيهم .. قبل لااجي تخيلتهم ناس بلا ضمير وحاقدين خاصه الي سوو بأمي بس كشفت العكس..
روحهم وطيبتهم كلش حلوه..
من طلعت ع الشط شفت امي واخواتي ووياهن وحده سبحان الي خلق عيونها.. شفت كثير بنات وسويت علاقات هوايه بس مشفت هيج عيون تسحر.. عيونها صفر وكبار ورموشها شي يجنن والازيد من هذا كانت الشمس بدت تنزل وضربت ع عيونها صارت تخوف من جمالها.. طبعا هي متتكلم وصوتها مو مسموع
بس عرفت اسمها ساره.. محلاكي يا ساره...
لما اجتمعت امي مع عمامي اقصد اخوة العم طاهر.. عرفت سبب جيتنا .. كان لحصة اخواتي من الارث.. حبيت اطلع حتى مااقيد الموجودين.. خاصة واني غريب عنهم..
شفت شذى ونهى قريب ع الشط تمشيت وشفت الحلوه ساره
حبيت اطول واشوف عيون هل مخلوقه شلون مصبوبين صب من الخالق.. كثير اثارتني هل بنت.. بالرغم مالابسه شي مثير ولا سوت شي .. بس عيونها لحالهن اثاره وخجلها يكفي..
تقصدت استفزها لتنزل بالمي.. بس شكلها زعلت مني وراحت..
الصراحه كان كل غايتي اقربها اكثر وشوف عيونها والمس خدودها... بعدين بعدت هل فكره عني وشفت اني واحد منحط واله شلون افكر بيها هل تفكير وهي شكلها طفله ماتعرف شي..
من بعد العشا الي كان مبالغ في بس هذي كانت من اصول الضيافه...

كان كلشي مبكر يعني من وقت الاكل النوم الشغل.. ب10 حسيت عمي ابو هادي يشخر.. والشباب كل واحد راح ع بيته
ماجاني نوم واصلا اني متعود ع حياة الليل والسهر.. طلعت برا وتمشيت وبكل خطوه اتذكر ساره.. تمنيت تكون معي واقضي هل ليل الطويل وياها .. صرت اتخيل نفسي وياها وابوسها واسوي الي نفسي بي.. انتبهت ع نفسي وحاولت اتخلص من التفكير البشع بيها..
مانمت اله الفجر ومامرت ساعه وسمعت ابو هادي كعد ويسعل سعله قويه.. اضطريت اكعد واشوف شبي.. ناولته مي وطلبت منه يروح ع طبيب بس هو كال انه متعود عليها والها زمن ...

ساره
كعدت من الفجر وي امي .. كملنه خبز وكعدت اكل خبزه وجاي
وصافنه ع الكاع بدون ماافكر..
امي:هووووي! خايبه هووووي ! وين وصلتي؟
-ها يمه.. لا هيج بعدني انعس.. اكلج يمه.. هاي شذى شو چنهه حاطتنه عله خشمهه وتريد ترجع؟!
امي:يمه چا غير مخطوبه وتريد ترد هم يله تجهز ..چا مثل حظجن انتي وسليمه لهسه محد اجاجن!
-يمه انه بعدني زغيره مااخذ هسه..
امي:اي دخل يجيج احد عود بعدين نكول اي يو لا..
امي تريد تزوجنه ولو بيدهه حته رداد تزوجه .. هو شني الزواج الله وكيلكم طيحان حظ تعاي مكان ما تشيلين بس روحج تشيلين رجلج وجهالج هم ودوخه يبوووي .. من اشوف اخواتي ونسوان اخوتي اكول الحمد لله لهسه مامعرسه.. عود انه كبرت 17 وسليمه خطيه بعينهم بارت بعد ماتاخذ رجل..
مر يومين ماصار بيهن شي جديد.. بس يوم عزموهن بيت عمي ع غده ويوم عمي الاخر ع عشه بس يباتن يمنه.. حصة بنات عمي مال كاع كالن مانريدهه كاع نريد حكها فلوس.. عمي الجبير راد يشتريهه منهن بس ماكفت فلوسه وكالهم حسبة اسبوع الم روحي واطلع جم فلس.. انه من سمعت اسبوع اخر كيفت ههههه وتعرفون ليش .. اي علمود الحلو..
بس صار يومين ماشفته ومالكيت فرصه اطلع امي كاتلتني كتل بالشغل..  بس وراهه انه متعوده الصبح وره مااخلص شغل وي امي اروح الم جهال اخوتي ونروح ع الشط ومرات اخذ دجاجتي  فخريه.. فخريه سميتهه ع اسم دلاله تجي تبيع يمنه وتظل تسولف هواي ودجاجتي هم اربعه وعشرين ساعه تنكنك من هي بعدهه فروجه.. هههه عاد سمتيها فخريه...
رحت كعدت بمكاني المفضل يصير شويه اعله من الشط وجهال اخوتي هوسه عدهم طوبه يلعبون بيهه وانه اباوع ع دجاجتي ومكيفه تنكر بالكاع بيها دود تاكل بي.. مااشوف اله الطوبه اجت بفخريه.. عاد فخريه روحي من الدنيه حته جنت انومهه يمي بس امي تعاركني وبطلت منها.. فخريه كبل طاحت للكاع ومثل المعصيه.. انه شلتهه من الكاع وشافوني كلهم شردو اريد اعرف منو منهم طكاهه ماكو .. نزعت نعالي وشايله فخريه واركض وراهم وهمه يضحكون عليه...