تزوجت ولكن..؟

الجزء الثاني

البارت الثاني ..
#تزوجت_ولكن..... ؟
#بقلمي_شمس

دخلت للاستقبال .. لگيت مره كبيره بس مو كلش زينه وهي معتنيه بنفسها وبنات اثنين وياهه بعدين عرفت بناتهه ..
من شافني بقن يتفحصني .. عبالك سياره يشترن مو بنيه .. #شمس
مبين عجبتهن لان گامن يسوون مزاد عليه .. بالمهر خلن ماما ومرت رضا 😮😮 هيج ..

اني ضجت من عرفت اسم ابنها علاء .. عبالي رائد وعبست بوجهن ..
ماما گلتلهن نشوف ابوها ونرجعلكم خبر .. واخذت رقم موبايلهن ..
اني رفضت وگلتلها اريد اكمل .. بس ابويه ورضا من سمعوا الناس اغنياء وعندهم فلوس ..ومستعدين كولشي يدفعون وافقوا وگلولي ماكو دراسه عود اذا يقبل زوجج يخليج تدرسين .. #شمس
وين تلگين هيج قسمه .. اتصلوا عليهم ثاني يوم ورجعولهم خبر .. موافقين .
من غير ميهتمون المشاعري .. وافقوا حتى من غير ميسئلون عنهم او بالاحرى باعوني ..

رحت الماما وبستها واتوسلت بيها تقنع بابا .. ماقبلت گالت عيب بعد رجعلانهم خبر ..
اتصلت ع اخواتي وابجي .. وحاولت بلكي يقنعن بابا .. صابرين صارت وياي بس نسرين وشيرين لا گللي .. وين تحصلين هيج قسمه ..
مال والولد اكبر منج بكم سنه .. وناس واصلين حسب ماسمعنا من ماما .. #شمس

اووووف ذولي شيفهمهم اني متهمني الفلوس .. الي يهمني سعادتي واتزوج الشخص الي احبه واريده ..

بس بائت محاولاتي كولها بالفشل ..
اول خطوه سواهه رضا اخويه الكبير والمفروض يكون سندي بالحياة ..
بطلني من المدرسه واني واصله المرحله الكل يتمناهه
يومين واني افكر برائد ..
وحلمي ودراستي الي راحوا ..
ثاني يوم اتصلت ام الولد ع ماما .. وگلتلهه نريد نجي .
ماما رحبت بيهم ..
وصدوگ للعصر اجن ..
اني لبست ثوبي نفسه اتعمدت .. ولفيته الشعري .
ماما گام تحجي عليه .. بس مااهتميت خلي يشوفني هيج بلكي يبطلن ..
مرت رضا حظرت الكيك والعصير .. وفرحانه اكثر مني وهالمره اجن اخواتي ..
واني حظنت صابرين وابجي ..
وماما گام تحجي ع صابرين گالتلها عقليها مو تخبليها ..
ع الاقل احسن من قسمتجن ..
مااعرف ليش گلبي ممرتاح لهذي القسمه .. الكل فرحان الا اني ..
اكو بنات يفرحن ويرگصن الا اني عبالك حموت مو اتزوج .. #شمس
للعصر اجن النسوان .. ومحملات هوايه اشياء ..
دخلت سلمت .. وگعدت بس منصيه راسي ..
امه .. شوفي عيني ام رضا احنه اجينا قبل مشية الزلم حتى نشوف احتياجاتكم ..
ماما .. والله يا ام علاء هي البنيه بنتكم وشنو تجيبون هو الكم ..
امه .. والنعم منكم عيني .. لهذا حتى نرفع راسنا .. هاي هدايه جبنالهه . ونطوني العلاليگ ..
وهاي مليونين تجهز نفسها بيهن .. والذهب احنه نجيبه من نگطع مهر ..
اخواتي وماما فرحانات .. لان محد جابلهن هيج اخواتي كلهن نطوهن مليون هو ذهب هو ملابس ..

حددن يوم المشيه ويوم الخطوبه .. وطلعن ..
اخواتي ومرت رضا عبالك مشايفات ..
فتحن العلاليگ كولها .. جايبات فساتين وگلبيات وموبايل ..
ماارتاحيت للشغله ممعقوله اكو هيج ناس تجيب وشنو الي خلاهم يصرون عليه .. ويردوني واغروا اهلي بالفلوس بهذيزالطريقه .. #شمس

اول مطلعن دخل ابويه من المحل ..
فرح من. شاف الغراض وماما راوته المليونين .. تخبل بعد ميشوف بعيونه .. يگول لو هيج القسمه لو ماكو ..

ويلوم بيه .. وماردتي توافقين مهاوي .. هاي اجتج من السما واخيرا حتخلصين من هذا الظيم والفگر ..
وراح تشبعين فلوس عود مو تنسينا وياج هههههه ..

سواهه بضحك بس اني اعرفه يقصدها والدليل اخذ مليون من الفلوس گال اسدد ديوني بي والمليون الثاني كافي عليج ..
اني هم ماحجيت .. سكتت ☹️ #شمس

اجت المشيه وگضت .. وطلعنا اني وماما نشتري ونجهز اشتريت فستان حلو للخطوبه ..
وصرت امام الامر الواقع گلت بعد مابيها مجال خلي اشوف حياتي وجائز صدوگ يطلع الولد حباب ويعيشني بسعاده .. الشغله الوحيده الي ضجت عليها هي دراستي وگلت بلكي بعد المهر اگدر اقنعه ويقبل ارجع ..

بقينه ثلاث ايام كل يوم ننزل للسوگ نتسوگ ..
الى ان صار يوم الخطوبه ..
رحت للصالون اني وصابرين ..
ولبست الفستان الي جبته كوله كيبور لونه بيج وحلو .. وسويت شعري ومكياج خفيف واني وجهي دائري طلعت كولش حلوه ..
ماما عزمت اقربائنا كولهم تريد تتباهه .. بس اهل العريس معازمين قليلين الي جايين ..
عقد النا السيد وخلص ..
دخل علاء .. يلبسني الذهب .. من شافني تعجب .. هو حلو واسمر بس مااعرف وين شايفته ..
اتذكر شايفته بمكان بس وين ماادري ..

هو ماصدگ بقى يحظن ويبوس ويتلمس جسمي وزنودي عصرهن عصر ..
عبالك مشايف .. لبسني الذهب كان تخم ووياه اسوارات ..
بگلبي اگول خاف هذا ذهب برازيلي..
اباوع الماما واخواتي فرحانين ومرت رضا مبين عليها الغيره ..
والنسوان كلهن يتهامسن .. اكيد يگولن هنياله .. بس ليش اني مدا احس بالفرحه مثلهن .. #شمس

خلصت الحفله وطلعوا .. وكالعاده بابا بقى يگلب بالذهب وممصدگ ..
ومرت رضا تسمعني حجي .. اي حظوظ ومسويه نفسها مقابله اي وين تلگين هيج ناس شالوج من الفگر ..

لليل خلص مواعين العشا دگ الموبايل هاي اول مره يدوگ لان قبل شويه علاء فتحه ودخل رقمه بي ..
جابته نونه اختي الصغيره واجت تركض ..
مهاوي موبايلج يدوگ ..
اتباوعت مسجل ع الرقم حبيبي ..
يا هاي اكيد هو مسجله هيج ..
رفعته .. الو ..
علاء .. هلو حبي اشو لسا مااتصلتي ..
#بقلمي_شمس
يتبع...