قصص بتموت ضحك

3

- هه , سبحان الله !!  😏
من ساعة ما قطعت الكهربا علينا بالصالة يوم عرسي قبل سبع سنين
عرفت إنو عيشتي معاه رح تكون أسود من العتمة الي حلت بالأرجاء !  💂
كل ما أشوفه بخلقتي حالياً أكتر سؤال بخطرلي , عقلي بأي داهية كاين مرمي لما وافقت عليه ؟ 🚽

بتزكر يوم عرسي كإنه مبارح ! 📌
طول الوقت كانت إمي كازيتلي ع سنانها و تتحكم فيي عن بعد عن طريق نظراتها قول ليزر بطلع من عينيها أو أشعة تحت حمراء ! 👾
حتى لما أعمل اشي مش زي ما قالتلي عنه بالزبط سبحان الله بحس بلسعة بتدخل بإصبع إجري الصغير و بتنتشر بعروقي بصير أنتفض من الرعبة ! 🔌
و حماتي من جهة كل ما تيجي عيني بعينها و ابتسملها مجاملة , العبسة الي بوجهها بتخليني أنتظر نهاية العالم بفارغ الصبر !! من كشرتها بحس إني خاطفة ابنها هنري الثامن منها ! 😒
و كل ما أتطلع جمبي و أشوف إبنها بحس بوجع البطن الي بحسه طالب التوجيهي و هو داخل ع الامتحان !
من جعصتو عاللوج و نفشة أردافه و رفعة حواجبه مبين إنو دلدول الماما ! 💑

خالتي حست بالكهربا الي منتشره بالجو و التوتر و الكآبة فقامت تخفف و اجتني و هي تزغرت و تترنح بخصرها يمين شمال قول دودة شاربة هايبكس عالريق , و مسكتني أنا وياه و نزلتنا عن اللوج عشان نرقص , 💃
أنا فردت وجهي و قلت مش مشكلة يمكن هاي أشياء طبيعية الي مخوفتني , و لحلحت كتافي و صرت أترقوص عالناعم و أعمل حركات لولبية بإيدي اليمين الي فيها المسكة عالبطيء ,
و سبحان الله أول ما قررت ابتسم , قطعت الكهربا و عم السكوت بالمكان ! ما لحقت حتى أرجع خصري للزاوية الي بلش منها ! 🐒
و علقت عالوضعية ايدي فوق فيها الوردات و خصري زاوية 37° زي تمثال الحرية منظري ,,
و سمعنا طوالة صوت بوسة , بس عرفنا بعدين من عمتي الي نشرت الخبر بالعيلة و فضحتنا , إنو عريسي مفكرها أنا و مستغل العتمة , 👄
عدا عن عمته لجوزي الي لحد الآن حاطة الحق علي و ع تكاثري , بسرقة ذهباتها !💫

و لهسا نفسي و منى عيني أعرف مين الي أول ما قطعت الكهربا استغلت الفرصة و قرصتني بأحمى ما عندها من أرنبة داني ! و هربت ! لهسا مطعوجة داني و ممنوع أحط فيها حلق الله لا يوفقها مين ما كانت !!💥💢
بعد تفكير و تفتيش سبع سنين أنا مشتبهة بتلات ! يا بنت خالته الي حاطة عينها عليه , يا إمه إمبراطورة الخفافيش السوداء , يا إما وحدة من بنات عمتي المكيودات المعصعصات , فش غيرهم !

هيني .. بحزن , قول واقعة مع عصابة , تحت عيوني متاهة سوداء و بطتي كلها دوالي و شعري صار فيه صلع نصفي , و من نحفي شاكين إنو معي مرض 💔
الله ريتها بس الي دلته علي و كانت السبب بزيجتنا و مصيري الضائع هاد , تصحى تلاقي حالها منقولة ع بقعة العدم اللامتناهي اللامتواجد , تضل تلاخم لحالها تا يطقو عروق مخها و تصير تمشي بالشقلوب! 👊

#كيف_الخروج #كيف_الخروج_من_أين_الطريق
#أدغال_الديجيتال
#لما_صالح
....................................................................
😂😂😂😂😂😂😂
مستحيل ما ألاقي تنين بغرفة بتوشوشو ،
إلا و ألزق صيوان داني عالباب و أقعد اتنصت
خلص الفضول بدمي ! بالفطرة مولودة وكالة اخبارية سرية من تحت لتحت !
دايما بكون عاملة حالي مشغولة بتلفوني بس داني و حواسي كلها بتكون شغالة مع الي بسولفو جمبي ، يعني شو أقلكو ، كلمة نسناسة و حرباية قليلة علي !
عندي قوة سمع و تركيز و ذاكرة عن عشر نسوان ، بنفس الوقت عندي خبث و ذكاء و حداقة لدرجة إني ما بخلي أي حدا يشك فيني حتى 1% إني هيك ! و كل العيلة مفكرة إني طيبة و عالبركة !
ليوم كنت معزومة عند دار حماي أنا و كل سلفاتي ، سلفاتي من النوع المشكلجي و دايما داقين ببعض همة و بنات حماي ،
أما أنا معروف عني إني من النوع المسالم لإني بتدخلش بحدا !
كنت قاعدة بجلي بعد الغدا و حاطة السماعات و ولا كإني هون ، فاتو سلفاتي التنتين عالمطبخ لانو كل غرف البيت معبية و أأمن اشي كان بالنسبة إلهم مشان النميمة و الغيبة هو المطبخ ،
فاتو و قعدو ع جنب و كل فكرهم انو انا مو سامعتهم لإني حاطة سماعات ،
أنا فعلا حسستهم اني مش منتبهتلهم بس طفيت الأغاني بالعقل عشان اسمع شو بحكو ، سلفتي نورا طالت سيجارة و ولعتها و بلشت فضفضة لسلفتي مريم ، نورا كانت وقتها حاقدة ع بنت حماي إلهام !
و ما خلت عنها كلمة ولا حرف إلا حكتهم ! بعدين نورا حكت لمريم ، " اسمعي بس خلي هالحكي بيني و بينك لإنو ازا زوجها لإلهام عرف يمكن يطلقها ! "
هون أنا قناتي السمعية توسعت 10 سانتي ! و داني نفسها رجعت لورا مشان اسمع منيح !
سمعت إنو إلهام بتروح تسوي شعرها عند كوافير شب ، و هي إلهام بالأصل محجبة ! و كاين زوجها عارف و حالف عليها يمين إزا بتروح مرة تانية إلا يطلقها بالتلات ! و قال إلهام حالفتلو إنها بطلت تروح ، و كل أسبوع بتروح من وراه و بالسر عند نفس الكوافير !
أنا سمعت هيك من هون اشتغلت خرابة البيوت العرسة الي جواتي من هون !
و رحت و احنا قاعدين العيلة بتشرب قهوة ، بصوت عالي قدام زوج إلهام ، سألتها " إلهام الأسبوع الماضي كنت بالصالون و لمحتك كنتي تعملي شعرك عند الكوافير الشب ناسي شو اسمو ، فكرك شاطر أسوي شعري عندو ؟ "
إلهام قلب وجهها لونو خمري ! و زوجها قولو نار هبت فجأة ! المهم دقو العيلة ببعض دقة لا يعلم فيها إلا ربنا ! و خلصت الطوشة بطلاق إلهام ! و زوج إلهام طلع من الدار ! و حلف ما يرجع يدعس فيها !
لما روحنا عالبيت ، زوجي سألني انتي متى رحتي عالصالون و لمحتيها لأختي !
أنا من غبائي و من أكبر زلات حياتي غلطت و حكيتلو إني ما شفتها ، بس سمعت سلفاتي بحكو ! و حبيت اتأكد !
هون زوجي من حرتو ع أختو و ع قد ما حس إني نذلة و خبيثة مسكني من داني ! و آخر جملة سمعتها قبل ما يصير معي طرش كانت " و إنتي ما بتعرفي تقعدي ساكتة يا كلبة و تسأليها ع جنب ! " بعدين سحب داني عليم الله جهازي السمعي كلو طلع بإيدو !
طعجلي السندان تاعها و خزق الطبلة و دبك ع عصبي السمعي !
عليم الله من يومها بتمنى ارجع اسمع و يحرم علي انقل كلمة وحدة !
بس خلص فش أمل .
#ما_تخاف_إلا_من_الساكت
#مذكرات_بنت_منكوسة
#لما_صالح
.........................................................
هالبنت مش طبيييعيه 😂?
#لما_صالح
ليلة مبارح ،
حكيت لأهلي تصبحو ع خير و فتت اعمل حالي بدي انام كالعادة ،
كانت اختي منسدحة عتختها و متغطية بألف حرام و لافة حالها لف زي الهدية
حكيت ببالي فرصة ، مشان احكي مع بهاء و متسمعنيش من الركام الي دافنة حالها تحتو !
رحت تغطيت و دفنت حالي انا كمان ، و رنيت عليه ،
و قعدنا ربع ساعة كاملة نكنكن و نحب ببعض ،
و غرقانين بالحب و الغرام !
إلا فجأة حدا رفع الحرام عن وجهي و مسكني من شعري و رفعني زي الأرنب بس يحملوه من ذنيه عالدبح !
بس الدنيا عتمة و مش عارفة مين !
لحد ما حكا الي ماسكني .. " ولله لألعن أبوكي ي بنت الكلب "
ساعتها عرفت انو الوالد الله يكرمه ! و بلشت أتشاهد ! عملت حالي مش فاهمة اشي و حكيتلو " بابا انتا من متى هون ! "
حكالي ، " من لما بهوئتك بعتلك بوسة عالخط "
حكتلو " بابا مين بهاء ؟ هاي صاحبتي سحاء بس احنا بنمزح مع بعض هيك "
ما لحقت اكمل سؤالي التعجبي إلا أبوي خابطني بوكس ع نص داني ! خلاني احس داني التانية وقعت !
طبعا تلفوني وقع عالأرض مع داني ! و فلت من السمعات !
اجا ابوي شات داني الي عالأرض بإجرو و مسك تلفوني و شغل المايك ! طلع صوت بهاء و هو بحكي " ألوو ! حياتي ! وينك ! شوو بتعملي وليه ! ولكك ألوو ! حياتي ارجعي ليه تركتيني لحالي ألوووو ! "
طبعا هو بنادي بنادي و أبوي بتطلع علي نظرة الأسد قبل ما يفترس !
أنا ما خليت آية أو دعاء أو انشودة اسلامية إلا و غنيتها بمخي !
بس عالفاضي ! أبوي راح سكر الخط ! و راح ضوا الضو و رجع !
طبعا انا قاعدة قعدة الخروف الي بستنا الدبح ! و عملتها ع حالي !
لما قرب ابوي علي ، حكيتلو ، بابا .. اسمع مني .. ولله سحاء صوتها زي الشباب .. !
المهم اخر جملة سمعتها كانت " هسا بوريكي كيف صوت الشباب "
بعدين عمل حركة بعرفش من اي قناة مصارعة متعلمها
وقعت عالأرض بجهة ، و سناني بجهة ! و طبعا صحيت بعدها ونا بالإنعاش ..
و فاقدة النطق و الإحساس ! و حاسة لساني منمل ! و عمودي الفقري نطعج لقدام ! مش عارفة كيف اشرحلكو ، بس انا هسا بلشت جلسات اعادة تأهيل جسدي .. مشان ارجع امشي طبيعي
أنا حابة بس احكيلكو تأكدو قبل ما تكنكنو انو الي نايم عالتخت الي جمبك اختك مو ابوكي !
و لهسا نفسي اعرف ليه كاين نايم عتختها .

#ليلة_ما_الها_ضو_قمر
#مذكرات_بنت_منكوسة

😂😂😂😂😂😂😂😂😂😂😂