ام فرح : ولك يا هبله انا امك وبعرف مصلحتك ، ولك لمين طالعه هبلة انتي لمين لمين ، يا الله ليش بنتي هيك طالعه هبله؟ ليش هيك حظي ليش؟!
فرح : يما طب احكيلي شو اعمل ، مسجات وببعتلو ، ولايكات هاريتو هري ، وتعليقات وبعلق ، ونكز وبنكزو ، مليون مره كتبتلو منور ع صورو ، وهديك المرة رديت عليكي وكتبتلو الله يحميك ، لما نزل صورة وهو متصور جنب برج خليفه!
ام فرح : ولك تلحلحي ، ولك تحركي ، ولك هاد ابن خالتك مهو مش غريب ، ولك لو انك شاطره كان هو زي العجينة ب ايدك وكان خاطبك من زمان، شوفي بنت عمتك رشا ، هيها زبطت ابن عمها ، وهيها بكندا واخدت الجنسية ، ومكيفة مكيفة!
فرح : يما هيو كاتب عالفيسبوك انو رح يجي اخر الشهر ، يما نعزمو نعزمو ؟! هو بحب الدوالي ، انتي اطبخي دوالي ، وقولي انو انا !
المهم ، احمد اجا عالاردن ، وكتب عالفيسبوك : انا بالاردن وهي رقمي الاردني!
المهم ، ام فرح رنت عليه ، مهي خالتو مالكو؟! قالتلو يمين بعظيم لتيجي الجمعة تتغدى دوالي ، فرح بدها تلفهم ب ايديها ، وحياة عينيها !
احمد حكالها ، خالتي اصلا انا جاي اعمل هالشغله ، وارجع ، قالتلو لا والله لتتغدى ، قلها ماشي يا خالتي بتموني ، الجمعة باجيكي!انعجقت فرح ، وراحت عالصالون ، وصبغة شقرا ، على اظافر على قصص ، حتى حلفو يمين انها قعدت يومين ما توكل ، لانها حاسه حالها زايده ٣٠٠ غرام!
المهم يوم العزومه معجوقة ، وكل ٩ ثواني تروح عالمراي ، غيرت ٣٥٠ بلوزه ، ع ١٥٠ بنطلون ، ع ١٩ حلق ، ع ٤٣ سنسال!
حتى جننت اختها تمارا ، هيك حلو؟ اه حلو!
طب هيك حلو؟ لا اول احلى!
كذابه انتي بتكرهيني!
والله حلو !
طب ضعفانه؟ اه ضعفانه!
كذابه منا نصحانه ، عفكره بكرهك!
تمارا : ولك انا بدي اعرف ليش عاجقة حالك كل هالعجقه؟! ولك مهو بخزي !
ام فرح بصوت عالي من المطبخ : تمارا اخرسي لآجي ابلعك الطنجرة بالدوالي اللي فيها!تلفون ام فرح برن ، وهو عالطاوله ، اجت فرح ، مكتوب ( احمد ابن اختي ) فرح اخدت الموبايل وركضت ع امها ، يما برن برن هيو ردي شكلو قرّب!
ام فرح ، مسحت ايديها من المي ببلوزتها ، وفتحت الخط ، اهلا حبيبي !
احمد : خالتو انا عالطريق ، بس في معي ضيف مفاجأة!
ام فرح : اهلا وسهلا فيك وبالضيف خالتو!سكرت الخط ، ابصر مين جايب معو !
فرح : معقول المأذون 😍
ام فرح ابتسمت ، قال يعني انو اه!ركضت فرح مبسوطة ع اختها تمارا تعبطها وتبوسها : ولك بحبك بحبك بحبك ، انا مبسوطه 😍
تمارا : حلي عني انتي و سبع البرومبا تبعك ، مهو شبه المكتة!
ام فرح من المطبخ : والله يا تمارا اذا ما قصيتي لسانك لاشرب من دمك يا مكيودة!
تمارا : يما كيف سمعتيني مشان الله كيف!
أنت تقرأ
قصص بتموت ضحك
Humorقصص بتضحك القصص مش الي بمعنى أني مش انا الكاتبه كل فصل ٣ قصص 🌚 انجوي 🌚😂❤️