قصص بتموت ضحك

8

هو والله مش قصدو اشي ، هو كان كل قصدو انو يقلد حركة بمسلسل تركي ، لأنو شاف مشهد بالمسلسل ، انو بكون بالبيت ، وبتيجي مرتو من الشغل ، فهو بطفي الضواو قبل متيجي ، وبعمل عشا ، مع شموع ، وبس هي تدخل ، بتخبى ورى الباب ، وبوقف وراها ، وبحط ايديه ع عيونها ، وهي بتحط ايديها ع ايديه مشانها بتعرف لمسة ايد جوزها ، وبضلو ماشيين ، وبس توصل عند الطاولة ، بشيل ايديه ، وهي بتشوف الطاولة والشمع والاجواء ، بتبتسم ، وبتحضنو ، وبقعدو يوكلو قبال بعض ، مع نظرات وهيك ، وهو بطول هدية ، خاتم الماس ، وبلبسها اياه ، وبقولها : هيك صارلنا متجوزين سنتين ، كل عام وانتي احلى اشي بحياتي يا لميس !

المهم يا جماعة ، عصام عمل كل اشي مكتوب فوق ، زبط الاكل ، وجبتين شاورما صاج ، وشال البطاطا وحطها بصحون عجنب ، وفتح علبتين البيبسي وحطهم بكاسات ، وما لقي شمع احمر ، حط شمع ابيض من تبع الكهربا لما تنقطع ، وزبط الامور ، وجهز الوضع ، وحط هالمايونيز ، وفتح بكيتات الكاتشب بسنانو ، وصار يضغط عليهم زي معجون الاسنان بآخرو !

هالحزين ما لحق يغسل ايديه من الكاتشب والمايونيز ، الا هو سامع صوت هبه طالعة الدرج ، عالسريع انعجق ، طفا الضواو ، وعتمت الدنيا ، ووقع مرتين وهو رايح لعند الباب ، مهي عتمة ، فتحت هبه الباب ، اصلا جاي معصبة ، ذبحو بعض هي وشوفير التكسي لأنو جابها من طريق ازمة ، دخلت هبه ، شافت العتمه قالت يما ، هو حط ايديه ع عيونها ، مع المايونيز ، مع الكاتشب ، مع زيت الشاورما ، مع حواجبها ، مع دموعها ، مع مكياجها ، صار وجهها عبارة عن صحن سلطة كونتور ، وهااات اقنعها انو هاد عصام ، وهاي هبه لا بتفهم بلمسة ايديه ولا بأحساس جلدو ، هي لا ببالها مشهد تركي ولا بطيخ ، هي بس ببالها انو حرامي ، والباقي عندكم!

بعد نص ساعة ، هبه وعصام بالمطبخ ، هبه بتحط ع اصبع عصام سبيرتو من العضة ، لانو بيقولو الجيران انو صوت عصام وصل لقبرص من وجع العضة ، بيقولو هبه ماكله نص اصبعو!

بتلف ب اصبعو وبتقلو ولك كان حكيتلي ، بقولها ولك مهي مفاجأة مفاجأة مفاجأة ،
وهيهم قاعدين عالطاوله بوكلو بطاطا باردة ، هبه وجهها عليه كتشب ومايونيز ، وعصام اصبعو ملفوف ورافعو لفوق زي اللي بتشاهد ، وبوكل ب ايد وحدة ، وبدعي ع تركيا وعمسلسلاتها!

#اصلا_جونا_احلى #مستبدة #حيطنا_مش_واطي
#نيجاتف_انيرجي
#عمر_زوربا

..............................
- الأمور كانت ماشية تمام التمام و عين العين 👌
بس كنت عارفة إنو إمه للعريس الي جاي يطلبني مش قاعدة مخنسة بزاوية الكنباي و ساكتة و غارشة و ملتهية بفنجان القهوة و بتتمعن فيني عالفاضي !👿
كنت عارف إنها آجلاً أم عاجلاً رح تطلعلي بخازوق سُداسي يمقت أم هالزيجة كلها ! حظي و عارفه !💔