#ذبول-الياسمين

الجزء 3

#قصه_ذبول_الياسمين
للكاتبه فردوس عبد اللطيف
الجزء  3
اجوى اخوانى واخواتى ساعدونى لكن هذه الحادثه اثرت على نفسيتى وصار عندى كابه  منعزله مخنوكه الدنيا ضاقت بي
بقيت فكرى شارد وعلى طول ما اركز بعد 3 اسابيع كنت جاى اطبخ بالمطبخ وبطباخ نفط لان كان حصار وغاز قليل وغالى والنفط متسرب بالارض على الزوليه وما اشوف الا احتركت الزوليه وكبت حريق بالمطبخ كان اكو سخان وقنينه غاز ما لحكت اطفى واحترك كل المطبخ اخذت اطفالى وطلعتهم خارج البيت اجوى الجوارين يطفون الحريق لكن كلشي احترق مابقى شي وراها من القهر والهبطه تمرضت والدتى وراحت لبيت اخوى الكبير بقيت وحدى ويه جهالى
وره كم يوم اجانى اخوى الكبير وكلى بقاءج هنا وحدج شنو خلى نودى جهالج لاهلهم وانت لو تتزوجين لو تجين عندى ولو ماخوفى من الله كان قتلتج وخلصت منج اتصلت بامى كتلهه لحكيلي وحجيتلهه عاد وكفت بوجهه كلتله لاتعوف جهالهه ولا تتزوج هى تريد تربي جهالهه عوفهه ومو بكيفك تحدد مصيرها وخليهه تجى هنا وياى بغرفتى تعيش وبينك انت اخوها الكبير وبمقام ابوها ...لملمت اغراضى ورحت سكنت بيت اخوى ذليله اخوى يعاملنى كخدامه وزوجته تعاملنى بكل خباثه هى ربه بيت وعدها 3 اطفال تتعمد تحرك الطبخ وتحاسبنه على كل شي واذا ما حركت الاكل ومزاجها زين  من تصب الاكل لكل شخص ماعونه وانى ابقى ماكو واحنا تصبلنه وحدنه وهما ياكلون لوحدهم بحجه الهوسه من تجتمع الاطفال وابقى انى بدون حصه بس اباوع وابنى ينتبه ويكلى اكلى وياي بماعونى
اروح اشتكى لخواتى يكلولى ابقى تحملى وين ترحين بس نحجى راح تطردج تعرفين هى مسيطرة على اخوى وبيدهه كلشي واذا تجين ببيوتنا ازواجنا غرباء وهم ما يتحملون جهالج وهوستهم احسن الج تبقين وتتحملين سكتت لكن وجود امى بالبيت مخلينى احس بالامان والراحه اترك بنتى الصغيرة يمهه من اروح للدوام
بدت زوجه اخوى تتشكى من وجودنه وهى ماماخذه راحتهه وطفالهه ما مرتاحين لان جهالى مشاركيهم بسكنهم ومضايقيهم لكن اخوى يكلهه وين تروح اذا اطردهه الناس تحجى على وهى بعدهه عمرها 28 سنه تقدملى بهالفترة اكثر من شخص لكن اخوى رفض بحجه اطفالى يخاف لا اعوفهم على كلبه ويكول رجل غريب ما راح يتحمل جهالج
مرت 4 سنوات بحلاوتهه ومرارتهه وانى بيت اخوى متحمله كل الوضع
توفت والدتى وهى بوجودها كنت اعيش بيت اخوى اختنكت بعد منو يسندنى
اخوى وزوجته كانو ايفاد خارج العراق واحنا لوحدنا بيته بعد انتهاء الاربعينيه لوفاة امى اجانى اخوى وكلى انى كنت مبقيج بيتى علمود امى وهسه توفت شوفيلج مكان اريد افلش البيت وابنى من جديد
ميخالف هسه امتحانات نهايه السنه خلى نكمل وادور على بيت واطلع ورة اسبوع
سمعت صوت قوى وتراب فوك راسي طلعت شفت شفلان وعمال جايين يفلشون البيت وبدو من السطح طلعت بره بقيت مصدومه اباوع ودموعى تنزل بصمت والجوارين ينظرولى بعين العطف اخذت جهالى ورحت لبيت اختى
للحكايه بقيه