#قصه_انانيه_الاب
للكاتبه فردوس عبد اللطيف
جزء الاول
اخوانى هذه القصه حقيقيه ارسلت لي من الاخت ايلاف فيها عبرة ومعاناه صاحبه القصه ارجو ان تكون فيها عبره لتجربه الاخت ايلاف فى هذه الحياة القاسيه
بسم الله الرحمن الرحيم
انا ايلاف مواليد 1988 عندى اخى حيدر مواليد 1991 واختى وفاء 1994
نعيش فى بيت جدى والد ابوى ويسكن معانا جدى وبيبيتى واعمامى غانم وجبار
جدو كان مدللنى ويحبنى هوايه ومحد يكدر يحاجينى امى وابوى اولاد عم يعنى مو غريبه على بيت جدو بس اهل امى يعيشون ببغداد وحالتهم الماديه جيده خالاتى وخوالى دايما بالعطل نروح يمهم لان احنا نسكن بالبصرة بيت جدى بس نروح زيارة لبغداد نغير جو ونكظى العطله المدرسيه يمهم وكلهم يحبونه ويشترولنه هدايا على طول ويطلعونه ماحسيت فد يوم انى محتاجه شي لان يجيبولنه قبل ما يشترون لاطفالهم لان ابوى سنه 1991 كان متزوج وبدون علم امى ماتعرف من ولاده اخوى حيدر كان زواجه بالسر بس عمامى يعرفون لكن امى متعرف
انى كنت شاطرة بالدراسه وهمى ان انجح واصير مدرسه
ابوى بدة يتغير علينه لاينطى لامى مصرف ولا يهتم بينه وبغيب عن البيت هوايه بس وجود جدى وعمامى وحنانهم وعطفهم علينه مخلانه نحس بفراغ ابوى صحيح وجوده ضرورى بس جدو معوظنا ويدارى مشاعر امى ويحبهه ومافد يوم حجه عليههاو اذاها بس الاذيه من ابوى بعد التحق بفداءيو صدام وبحجه الواجب هو يغيب علينه فترات وهو يروح يم زوجته الثانيه وحتى مصرف مينطى لامى خوالى يدزولهه وعمامى يساعدون بمصرف البيت
فد يوم تمرض جدى ودخل مستشفى كلنه انقهرنه لان هو كان شمعه البيت وبغيابه تغيب الضحكه والفرحه من عدنه صار عنده جلطه وره يومين توفى انصدمنه صدمه جبيرة وتاذينه كلنه لان كان هو الوالد هو السند الى نتسند عليه من بعده منو النه والدى قاسي علينه احسه ما يحبنه وماعنده اى مشاعر هاى غير المشاكل والعرايك ويه امى ماحسيته فد يوم حظنى باسنى كنت فاقده حنان الاب
بعد سنه من وفاة جدى بيبتى توفت وراه من قهرها على جدى ظلت تبجى على طول ودكله ليش رحت وحدك وماخذتنى وياك يابعد الروح اشو ورة السنه ماتت لحكته خسرنا اعز واحن اثنين راحو وراح الخير وياهم وخلونه لحمه طريه بهالحياة
دخلت المتوسطه احب الدراسه كنت مرتبه وانيقه ملابسي كلهه خالاتى يدزوهه من بغداد وكنت مختلفه عن باقي الطالبات ومحبوبه حتى المدرسات يحبونى وشاطرة
صديقتى بالمدرسه لمى تحب ابن جيرانه بيتهم بظهر بيتنه وتجى يمى ندرس ونصعد بالسطح تسولف ويه حبيبهه مصطفى وتشمرله رسايل وهو هم يشمرلهه رسايل مرات يشمر رسايل وانى اخذهم واوديهم الهه صحيح تصرف غلط وغبي منى لكن كنت متصورة انى جاى اساعد صديقتى كنت مرسال الغرام مابينهم لكن انى كل تفكيري بالدراسه وابد مافكرت فد يوم اسوى علاقه ويه اى ولد لان همى انجح واصير مدرسه لا امى تعلمنى الصح من الغلط ملتهيه بمشاكلهه ويه ابوى
بعد مو بحالى كلنه بالليل ننام بالسطح فديوم مصطفى شامر رساله بسطحنه على اساس اوديهه الى لمى صعد ابوى بالسطح وشاف الرساله واكعه على الارض وبيهه كلام غرام وحب وكلوب وشعر طبعا بدون اسماء اكيد ابوى عباله الرساله الى وانى لا بيهه ولا عليهه ملتهيه ادارى اخوتى وغير الدراسه نزلى عيونه تجدح نار واويلي لزمنى من شعرى وركع بالحايط ولج رسايل غرام وحب احلفله واتوسل ميصدك طلع شكو قوة وعصبيه على ملخنى موتنى كتل لحد ما طك خشمى دم
يكول منو غيرج الرساله المن يدزوهه بعد ماكو مدرسه تبطلين وتكعدين بالبيت ياعار وصعده بالسطح بعد ماكو ممنوع وباب الحوش ما تشوفينه
متت قهر انحرم من دراستى بذنب غيري لو صدك انى مصادقه اكول استاهل لكن شنو ذنبي وانى احب الدراسه وهو يحرمنى منهه
زين لو صدك حابه واحد هم اكول عقوبه من الله على
الله يسامحه ما سمع منى بس كان يريدله حجه على وعلى امى وهى اصلا مريضه من و راه وورا مشاكله
من بطلونى اجه ابن عمتى خطبتى اكبر منى 10 سنوات واكثر من مرة يحجى وياي يكلى انى احبج وانى اضحك واكله بعدنى صغيرة ياحب يازواج
ابوى رفضه وما قبل يزوجنى هم اجونى خطابه 2 غيرة وهم ابوى رفض
فد يوم امى سمعت من مرت عمى انو ابوى متزوج عليهه
صارت مشاكل هوايه
تدخلو خوالى وصارت ملحمه بين عمامى وخوالى
للحكايه بقيه
