#قصه_انانيه_الاب
للكاتبه فردوس عبد اللطيف
جزء 3
طلعت دمعتى بعينى انى شعلى هو عينه زايغه انكطع رزقى الله لاينطيك يافاضل خليتهه تطردنى وجانت تنطبنى هدوم واكل اوف شكول عليك يابه تدرى بنتك اشتغلت خدامه بالبيوت تدرى محافظه على شرفى مو علمودك لا علمود امى الى ربتنا وكسرت ظهرهه علينه صار عندك طفل ثانى ظل دللهم واحنا مكسورين خلى نشوف تاليتك
لو ما اخوى واختى بالمدرسه مجان ابهذل نفسي بس شسوى خطيه ما اريدهم ينحرمون من دراستهم مثلى كافى انى انظلمت بعد هما
شفت جوارينه سلمت عليهه
خاله ايلاف تعرفين الحلاقه ام شهد رايده وحده تروح تنظفلهه بيتهه
اى والله خاله اشكرج هسه اروحلهه
رحت للحلاقه وبيتهه مو جبير مطلعه صالون الحلاقه من البيت دخلت استلمت بيتهه تنظيف كيفت على وعجبتهه ماعدهه احد غير بنتين وحبابه كالت تعالى فديومين كتلهه ميخالف ابقى يمج اساعدج بالصالون
كالت شتعرفين كتلهه اعرف احف واشسور اى زين تعالى باجر بس ما اواعدج براتب على الشغل كل وحده تحفيلهه انطيج ربع المبلغ
انى قبلت على الاقل احسن من الكعده
اجه خالى من الخارج وشاف وضعيتنه كال ميصير تبقون يوميه بيت هو متمكن ماديا
راح اشترى بيت وكعدنه بي لان ماقبل بالبهذله كعدنه بالبيت واستقرينه بقينا كل يوم ندعيله انى بقيت ويه ام شهد اتعلم بالصالون وهى ما تقصر تكرمنى ومن تحتاج تنظيف اروح انظفلهه بسرعه ومرات اطبخلهه وبالصالون اكو زبونات يطلبونى بالاسم لان من احفلهم ايدي خفيفه
بقيت ويها فترة وشما احصل فلوس انطيهم لامى تفرح بيهم وتندعيلي
تعلمت كلشي يخص الحلاقه من ام شهد سويت بالبيت حلاقه وحضانه للاطفال الى تروح للدوام تحتاج احد يدارى ابنهه تجيبه واخذ راتب شهرى والصالون اشتغل لانى تدربت كلشي يخص الحلاقه وصرت اعرف
خطيه اخوى هم كام يشتغل عماله ويدرس وينطى مصرف لامى
تقدملى جوارينه للزواج انى ما اعرف عنه شي بس كلت خلى اقبل واخفف الحمل عن امى وشكد راح ابقى مامتزوجه لازم اتزوج وافقت وياريتنى ما تزوجت
زواجى صار بعد سقوط بغداد .كنت الزوجه المطيعه وقايمه بكل ةاجباتى الزوجيه لشخص اكبر منى 12 سنه وعاءلته متكونه من 20 نفر وكنت اقوم بواجبهم وخدمه الصغير والكبير وعمتى وعمى واحترمهم انى انحرمت من جو الا سرة المتكونه من الاب والام شفت عدهم هذا الجو لذلك حبيتهم وحبيت العيشه وياهم حمواتى اكبر منى 3 وما متزوجات وحموينى 3 متزوجين كنت احبهم واحترمهم وهما هم يحبونى ويحترمونى لكن لازم اكو تنغيص بحياة الانسان ماكو شي كامل زوجى طلع مريض نفسي وياخذ علاج وميفيد معصب على طول ومعذبنى ويضربنى بسبب وبدون سبب اصلا انى ما عندى اى تقصير مثلا ماكويت قميصه لان كهرباء ماكو ضربنى وبهذلنى ويغلط على امى ويعيرنى بيهه لان مطلقه ويغلط على اخوى مع ان اخوى يحترمه ويقدرة بس هوة ميستاهل ودايما يتعمد يهينى كدام نسوان اخوته وهن يضحكن وانى اسكت واكول ميخالف خلى اتحمل بلكى يتغير بلكى رب العالمين يلتفت لحالى
كنت اكعد ساعه 5 الفجر حتى الحك اسبح بالحمام لان ما نلحك عدد هواى ويخلص الماى والكل تسبح وراها اروح اخبز واسوى ريوك لزوجى ولعمتى وعمى طبعا اخبز بتنور طين وراها استلم شغل البيت صار الاعتماد على مع انى اصغر وحده بالجناين هن بعمر امى لذلك يغارون منى
بقيت 4 سنوات ما احبل ومن احجى واكله خلى نراجع دكتورة يضربنى ويهينى كانما حاجيه جريمه بعدين عرفت ميصير الحمل بسبب العلاج الى ياخذة
كلت بلكى يصير عندى طفل وتتغير حياتى للاحسن 4 سنوات عايشه وياهم ومتحمله رجال بي اعصاب وحاله نفسيه على شنو باقيه
عاد ورة 4 سنوات حملت اشو هذا زاد بضربه الى وانى عبالى من احبل راح تتغير نفسيتهه اشو زاد
فديوم كنت حامل 4 شهور سواله عركه وصياح وبدون سبب جرنى من شعرى وسحلنى من طابق الفوك للجوه ويضرب قوى من كل قوته تاذيت صار عندى اوجاع دزيت على امى طبعا انى ما نعنى من ان اروح لاهلى اخذتنى امى للدكتو رة كالت اسقاط مهدد لازم عمليه ربط
بس اريد اعرف لو ابوى موجود وواكف بوجهه جان يكدر هيجي يضربني لو جان حسبله حساب ليش هيجي يابه بس املى برب العالمين هو ينقذنى تعبت تاذيت شنو ذنبي اتعذب كل هالعذاب
اشتغلت خدامه بالبيوت وتاليهه رجال مخبل والطفل الى حلمت بي طول 4 سنين مهدد بس اعرف ما تتخلى عنى ياربي
للحكايه بقيه f
