#قصه_انانيه_الاب
للكاتبه فردوس عبد اللطيف
جزء 2
صارت مشاكل كله لان ابوى كان يتعامل ويانه ويه امى بانانيته بس يفكر بنفسه ومتعته واشلون يرضي زوجته خالده كان يحبهه وضعيف امامهه وقاسي ويانه صار عنده طفل وبعد ماصدك وصرنه احنا اعداء
كل المشاكل الى صارت وكعت على راسنه مضرتهه واحنا الى دفعنا الثمن انى واخوتى وامى المسكينه ومشاكل ما الهه حل والحل بيد ابوى وهو اصلا عايفنه من ورة هالمشاكل اتفقو على شي واحد هو يبيعون بيت جدى وكلمن ياخذ حصته زين احنا كاعدين بيت جدى وين نروح وحصه ابو ى هو اخذهه يعنى حطهه بجيبه ومشى ما شفنا وهنا بدت معاناتى ومعاناة امى من بعد العز والدلال بقينا لامصرف ولا ماوى ولا ملبس احنا بعدنه اطفال وامى اشوفهه تاخذ صدقات من الناس وبيهه مذله تعرفون طعم الحاجه تعرفون طعم المذله احنا ضكناها من يجى الصبح وحتى فلوس الخبزة ماعندك بالبيت وابونا موجود بس ناسينا وين العداله زين ليش خلفتنه ليش جبتنه عالدنيا حتى نتعذب انت اب انانى وراح تدفع ثمن العذاب الى خليتنه نشوفه
امى من القهر والفقر صار عدهه فقر دم منجلى هذا النوع يصير بالانسان عند ما تنزل نسبه دمه ويسمى منجلى بعد نامت بالفراش وانى ادارى اخوانى سمعو خوالى بينه اجوى اخذونه لبغداد وعالجوها لامى وخطيه احتارو شيجيبون الاكل والمعلاك والتمر والخضروات والفواكه ويوكلوهه بايديهم شويه ارتفعت نسبه دمهه وطبعا ابوى يسمع بالى صار بس لايسال ولا يجى امى من وكفت على حيلهه كالت لازم اتطلك منه ما اريد يبقى اسمى مرتبط بهيجى انسان حتى العشرة ما الهه حوبه وياه عاد راحت للمحامى ورفع عليه دعوه طلاق وفعلا ابوى ماصدك يخلص من عدنه طلق بسرعه
هنا انى انهدمت حياتى من بعد ماجنت مدلله معززة مكرمه كاعدين بيت اهل امى بس خوالى ونسوانهم احس ضايجات من عدنه ثقيلين عليهن وخصوصا من يشوفون خوالى مهتمين بامى ويساعدونه من بعد ماطلق امى بعد ما شفته ولا يوم سال علينه ولا دزالنه مصرف
بعد طلاق امى واحنا بيت خوالى اجه ابن عمتى هم خطبنى منهم انى رفضت لان هو بالبصرة ولازم اعوف امى واخوتى وانى ما اكدر اعيش بلياهم خوالى هم رفضو وهو يكلهم احبهه وما اكدر بلياها ورجع خطبنى وراها 3 مرات وكل مرة يرفضو اخر شي ايس وتزوج وحده غريبه
بدت نسوان خوالى يسوون مشاكل لامى ويضربونه بدون سبب غير الكلام والاحتقار امى ماتحملت ولا تريد تخسر اخوتهه كالت لازم اطلع خو ما يطلكون نسوانهم انى اخذ جهالى واشوفلى مكان لانهه ماتتحمل احد يصيح علينه
خالى مقاول وكل فترة يشترى بيت ويرممه ويبيعه او يشتري ارض ويبنيهه ويبيعه بيت كال كعدو بيت عندى بنيته مثل الحراس نظفه ونرتبه بعد مايطلعون العمال ونسكن بي لحد ما يجى مشترى ونتحول لبيت ثانى وينطينه فلوس حراسه واختى واخوى بالمدرسه وانى ويه امى وكمت اخدم بالبيوت اشتغل خدامه انظف
لبيوت الموظفات
اكو موظفه كنت اروح يمهه الجمعه لان هى موجوده انظف بيتها وتنطينى اجرة على الشغل انى كبرت وحلويت وزوجهه عينه زايغه
نظراته مريبه اخاف منه
يغافلهه ويجى للمطبخ ويبدى بالبدايه يسمعنى كلام عباله يقشمرنى بالكلام
بس انى وين والغزل وين ولك حقير خلينى اخذ خبزتى بالحلال
فد يوم زوجته عدهه تعزيل نشيل الزوالى وبدة يدحس وكلما اصعد للطابق الفوك اصعد شنط الشتوى او زوليه يراقبنى الى ان انى صاعده بالبيتونه وما لكيته كدامى وراسا حظنى انى عطت هى كانت بغرفتهه ما سمعت نزلت اركض وكعت بالدرج اجه لزمنى وهى جتى شافتنى خزرته لان تعرفه شنو بس زوجهه خو تطلكه علمودى انطتنى يومينى وكلتلى بعد لاتجين
للحكايه بقيه f
