توقفت دينا في دهشة عندما قابلت سليم في ردهات الفرع الرئيسي لمجموعة محجوب و ابتسمت : واضح إن أونكل يحيى قدر يقنعك تيجي الإجتماع.
تجاهل تعليقها و سألها في جدية : أنا بقالي ساعتين بأطلبك. ما بترضيش ليه؟ لسه مأموصة من إمبارح؟
إقتربت منه و ضربت صدره بالأوراق التي تحملها في يدها برفق : أولا إنت كلمتني مرة واحدة بس من ساعتين. و أنا كنت ساعتها قاعدة مع المهندسين اللي شغالين معايا , و ما كانش ينفع أرد عليك أدامهم. ثانيا أنا مش مأموصة. و الدليل إني واقفة بأتكلم معاك دلوقتي.
أومأ : ماشي. مش مأموصة. بس ليه بقى ما كانش ينفع تردي عليا؟ هما اللي شغالين معاكي دول مش عارفين إنك خطيبتي؟ و للا في حد منهم بيرسم على حاجة؟
تنهدت في ضيق : لأ يا سليم. مش أنا اللي عندي ناس بيرسموا عليا. و أنا ما رديتش لإن سيادتك كنت بتشرب خمرة إمبارح. و وارد إنك لسه ما فوقتش منها و تعك معايا في الكلام في التليفون. فماكانش ينفع أرد عليك عشان كده.
أومأ مجددا : ماشي برضو. بس أنا ما حدش بيرسم عليا يا دينا. و حتى لو في حد فيخبط دماغه في الحيط عشان أنا ما فيش حد يملى عيني غير دينا حبيبتي. و عمري ما هأبص لواحدة غيرها.
نظرت له في شك : بجد؟ إنت مقتنع باللي بتقوله ده؟
نظر لها في دهشة : آه طبعا يا دينا. إنتي عندك شك في حبي ليكي؟
هزت رأسها نفيا : ما عنديش شك في حبك. بس عندي شك إنك ناوي تتجوز.
عقد حاجبيه في ضيق : آه. واضح إن الكلام اللي أبويا قالهولي الصبح كان بإتفاق بينكم.
رفعت حاجبيها في دهشة : و واضح إن كلامه ضايقك!
تحرك ليعاود السير : مش وقته الكلام ده. وعلى فكرة أنا فايق مش سكران من إمبارح. ماشي؟ يعني تردي عليا أما أطلبك.
نظرت له في دهشة وهو يبتعد ثم هزت كتفيها في لامبالاة مصطنعة : حسب ظروفي. لو فاضية.
إبتسم وعلا صوته : إياكي ما ترديش يا دينا تاني. حتى لو مين معاكي.
ثم إلتفت وقد إتسعت ابتسامته : صحيح... التايير ده جامد طحن عليكي.
إبتسمت وسارت مبتعدة : ده اللي باخده منك.
***************
جلست دينا على المقعد المواجه لمكتب سليم ووضعت ساقا فوق الأخرى وهي تنظر له : خير يا سليم ؟ بعتتلي ع الواتس عشان أجيلك أما أخلص الإجتماع مع أونكل.
نهض من مقعده خلف المكتب وتحرك ليجلس على المقعد المواجه لها وهو يرمق ساقيها الطويلتين في اهتمام: أنا مش فاهم. إنتي إمبارح في الإيفنت , وهنا في الشغل دايما تلبسي قصير وتعذبي الناس برجليكي الجميلة. إيشمعنى أما بتخرجي معايا أو بتجيلي البيت بتلبسي جينز و تحسسيني إني قاعد مع واحد صاحبي؟
YOU ARE READING
حلاوة الدنيا
Storie d'amoreقصة مستوحاة من مسلسل حلاوة الدنيا كل الشخصيات ما عدا دينا مملوكة لمؤلف المسلسل و صانعيه
