تجولت دينا بين الموائد في ثوبها الكحلي اللون , الذي إلتصق بجسدها ليظهر مفاتن جسدها في أنوثة غير مبالغ بها حتى وصل إلى ركبتيها. في حين انسدل شعرها القصير يغطي كتفيها في نعومة. كانت تبحث عن سليم بين المدعوين عندما قابلت يحيى , الذي ابتسم لها و قبلها في أبوة : أهلا بعروسة إبني. إيه الجمال ده؟ طول عمري بأقول الواد سليم ده محظوظ.
إبتسمت في خجل : ميرسي يا أونكل يحيى. و لو إني حاسة إن إبن حضرتك رجع في كلامه بخصوص موضوع إني عروسته.
ربت على خدها في حنان : إوعي تفكري كده يا دينا. إنتي عارفة سليم بيحبك أد إيه. بس هو الفترة دي مكسل عن كل حاجة ما أعرفش ليه.
أومأت وعلى شفتيها إبتسامة باهتة : أكيد يا أونكل. و أنا كمان بحبه أوي. و إلا ما كنتش إستحملت مزاجه اللي كل يوم في حال.
ربت على كتفها في تعاطف : معلش يا دينا يا بنتي. ربنا يهديهولك و يهديهولي أنا كمان. أنا هابقى أتكلم معاه عشان أشوف ناوي يفرحنا بيكم إمتى بقى.
إتسعت إبتسامتها و قد وقعت عيناها على سليم الجالس بعيدا وهتفت و كأنما لم تسمع كلمات يحيى : سليم هناك أهو. عند إذنك يا أونكل.
و أسرعت إلى سليم الجالس إلى البار يحتسي شرابه واقتربت منه و هي ترمقه في دهشة : إيه اللي إنت لابسه ده يا سليم ؟ سويت شيرت و بنطلون جينز؟ ده إيفنت رسمي و الناس كلها لابسة بدل.
تأملها هو للحظات ثم احتسى شرابه في لامبالاة : إنتي لو قولتي إنك هتلبسي سواريه أكيد ما كنتش لبست كده.
عقدت حاجبيها في حيرة : الطبيعي إني بألبس سواريه في أي إيفينت زي ده. مش منطقي إني ألبس كاجوال زي الصبح.
نظر لها في ضيق : عايزة إيه يعني يا دينا؟ تحبي أروح أغير؟
مطت شفتيها في انزعاج : لا يا سليم. اللي يريحك البسه.
إبتسم في ظفر و جذبها إليه : طب يللا نرقص سوا.
دفعته بعيدا في اشمئزاز : مش هأرقص معاك و إنت ريحتك سبرتو كده.
ضحك في مرح : سبرتو! إنتي قديمة أوي يا دينا.
هزت كتفيها في ضيق : واضح إن نظرتك ليا إتغيرت الفترة دي.
هز رأسه في فهم : آااه. واضح إنك ناوية تقلبيها دراما.
نظرت له في حدة : دراما؟! ماشي يا سليم. الواضح إن السبرتو اللي بتشربه أثر على دماغك. أنا أسيبك أحسن بدل ما تقلب تراجيدي.
رمقها و هي تسير مبتعدة عنه في غضب ثم رشف آخر رشفة من مشروبه و نهض ليسير مبتعدا هو الآخر عن الزحام.
YOU ARE READING
حلاوة الدنيا
Storie d'amoreقصة مستوحاة من مسلسل حلاوة الدنيا كل الشخصيات ما عدا دينا مملوكة لمؤلف المسلسل و صانعيه
