يا محلا ذيج ايامنا الماترد
همس القوارير
البارت الاول
السلام عليكم ورحمة الله وبركاته احب اعرفكم بنفسي اني جوري عندي اربع اخوات سحر وفرح وحلا وعلا واخوان اثنين احمد ومحمد بالبدايه الاولاد وبعدين سحر وراها اني وباقي اخواتي وراي ساكنين بيت جدي احنا وكل عمامنا لان جدي كانت حالتهم الماديه زينه وبيتهم كبير وقبل مكانوا يطلعون كل واحد لوحده ولا كانت اكو طائفيه مثل هسه بالرغم احنا شيعه وكانوا جيرانا سنه وكنا نروح ونشرب وناكل وياهم ونطلع سفرات ومرات نروح نبات يمهم وكعداتنا وسمراتنا كولها سوه كانت الدنيا بخير وكولش امان واستقرار لان كانت الناس گلب على گلب والخير زايد خلونا ندخل بالقصه احجيلكم عن امي شويه امي كانت انسانه فقيره وطيبه ومتدينه وجميله وشخصيتها قويه وحيل مسالمه كانوا عيالها كولهم يحبونها ويردون خاطرها ورغم كانوا اهلي متديينين بس مكانوا يضغطون علينا بالعكس عشنا حياتنا حالنا حال جيلنا بدون ضغط وكان بيتنا ميخلوا من المشاكل كنا دائما نتعارك احنا ويه جهال عمي وتگب الهوسه عدنا مرة عمي متقبل واحد يضرب جهالها بس هم يضربون بينا واذا ضربناهم تتعارك ويه امي وتزعل واحنا الجهال نتصالح ونلعب وهي تبقى متحجي ويه امي بس امي كانت انسانه عاقله وتعرفها تاخذها على گد عقلها وتعودنا على طبعها بعدين امي كامت تجيبلنا خرز وشغلات للتطريز وبدت تعلمنا شلون نسوي بيها أساور وگلايد حتى نلتهي بيها ومنطلع من غرفتنا ونسوي مشاكل وصياح ويه جهال عمنا وهمين حيل تحبنا وشنو نطلب متقصر ويانا ومرات من تطلع للسوك تاخذني وياها واشوف الولد يشمرون عليها كلام وعلى جمالها وكانت تگولي جوري ماما مو تحجين لبابا لان بعد ميخلينا نروح للسوك ههههه واني همين اسكت علمود لا تنضرب مصالحي وبعد ما تاخذني وياها كانت متطلع للسوگ هوايه بس من نحتاج شغلات او ملابس للعيد او للمدارس
بقينا فتره طويله عايشين بيت جدي بالرغم من المشاكل والهوسه بس كانت احلى ايام وذكرياتنا وكعداتنا وصورنا بيها تشرح صدرنا ومن بعد ما توفى جدي الله يرحمه ويرحم موتاكم تحررنا وباعوا البيت الكبير الي كنا كولنا ساكنين بيه وكل واحد اخذ حصته بس كانت حصة بابا متكفي نشتري بيت خطيه ضل محتار وين ياخذنا انقهرن عليه عماتي وتنازلوا عن حصصهم واشترينا بيت حلو ومرتب وعلى كدنا كانت بيه غرفه لماما وبابا وغرفه لخواني الاولاد وغرفه ألنا احنا البنات وهول صغير ننجمع بيه من نشوف تلفزيون او من ناكل وكنا نفرش فراشين واحد فوگ السطح وكت الغروب نصعد اني وخواتي نرش السطح مي ونفرش والهوى يصير بارد والگاع همين تبرد ومن تجي الكهرباء ننزل جوه عالمكيف والمبرده كنا حيل مرتاحين وفعلا كعدنا واستقرينا نجي على خواتي سحر كانت حلوه وجميله ومغروره ووفرح همين كانت حلوه واني اجي وراهن بالجمال بنيه بسيطه عيون سود وكبار وشعر اسود وسبل وحنطاويه مو بيضه مثل خواتي يعني شكلي مقبول وحلو ومره من المرات انعزمنا بعرس اقاربنا وگالت ماما تحضروا دنطلع ونروح للعرس وتعرفون سوالف البنات الها بدايه ما ألها نهايه وساعه كامله واحنا نتحضر وكول وحده ناثره ملابسها بالرغم هن لبستين كول وحده مخلينهم للطلعه بس لان احنا خمس بنات بغرفه وحده تحسون الغرفه مخبوصه بعدها جهزنا وكملنا بس ما اگوللكم على سحر طلعت تخبل جمال وغرور وثقه واهتمام بصراحه طلعت كولش كولش حلوه من رحنا للعرس الناس تعجبت عليها وعلى جمالها واكو مره ما شالت عيونها من عليها تروح وترجع عليها ولا تگولولي ولا اگوللكم وما رجعنا للبيت اله وسحر مخطوبه وفعلا صارت قسمتها لناس حالتهم زينه وهم حيل اصروا عليها لان عاجبتهم واجه الولد وشافها واقتنع بيها واحنا همين اقتنعنه بيه وسولها حفله حلوه وطلعت مثل الاميرات وبعدها بشهرين على ما اتذكر تزوجت سحر وبقينا نبكي عليها لان اول مره نفارگها بكينا اني وامي وخواتي عبالك طالعه للخارج وبعد منشوفها لان اول وحده تتزوج عدنا وفراگها كان صعب بالاخص احنا ممتفارگين وگلب على گلب المهم الحمدلله والشكر كانت مرتاحه وسعيده بحياتها
بقينا احنا طبعا كنا بالمدرسه اني كنت ثالث متوسط من تخرجت للثالث كانت الدراسه صعبه بالاعداديه فقدمت على تجاره اني وكم وحده من صديقاتي كانت الدنيا امان مو مثل هسه نروح ونرجع ومحد بحالنا وكنا فترة مراهقه حالنا حال البنات من اهتمام وترتيب وقبل كانت التنوره الي بيها فتحه من ورى والرجلين يطلعن كنت كلما اطلع ادهن رجليه واخلليلها كريمات واخلليلهن حمره حتى يصيرن ورديات ههههه وصودك شكلهن يطلع يخبل قبل ماكو التزام مثل هسه الناس توعت كنت حيل مهتمه لنفسي ومرتبه واسلوبي حلو كان منو يشوفني يحبني مو بس اني خواتي همين اني كنت ثالث متوسط وفرح كانت بالاول متوسط وحلا وعلا كانوا توأم بالرابع ابتدائي كولنا كنا بالمدرسه ونحب الدراسه مستوانا وسط بس اهم شي كان عدنا نطلع من البيت ونشوف العالم
