باسم مانمت الليل كله...كل ماغمض عيني تجي صورتها كبالي ..وكلام قاسم ماغاب عن فكري...جان يقصد ...وليش يريد امير يحظر ...فكرة تروح وفكرة تجي...
امير...بعد زواجي جنبت ورد ...اريد انساها والتفت لحالي...بس اجذب على نفسي من اشوفه...يرجع كليبي يدك نفس الاول...ردت اسافر لتركيا...امي ماقبلت كالت بعدك عريس
..صار تلت اشهر من زوجت ...يوم نزلت لبغداد خابرني حسين...كال اطلع لتركيا اذا ردت وية اصدقائك...استغربت...سافرت بس مطولت اسبوع ورجعت...خابرني بالليل صديقي كال...عدنا صديق اتوفى باجر نطلع لفاتحته ...من الصبح طلعت لبغداد وبقبت يومين يم بيت خال ابوي...خلال هالاشهر انا فاصل عن اهلي ...ماعرف شيصير ومالي خلك اعرف شكو مكضيها بين اصدقائي بحجة ادور شغل..البارحة العصر خابر باسم كال من الصبح تجي ...خلة بالي ومن سألت كال ماكو شي بس محتاجيك بشغلة...اليوم راجع للبيت
قاسم الصبح رؤى تسويلي ريوك وامي تلاعب بعباس بس البيت تحسه مكلوب ابوي مهموم افتقدت باسم طلعت اشوفنه وين ..شفته طلع من غرفة ورد...اخخ يبن امي مو خوش وكعة وكعت
باسم...الصبح الكل ملتهي...رجلي اخذتني لغرفتها..بالليل وبعد التفكير قررت افسخ خطوبتي من لمى ...مو صح ولا حلال ازوج وحدة واني افكر بأختها...صح ماراح افكر حتى ازوج وحدة شردت وية ابن عمي واعرف بيها تحبه...بس ماكدر اخالف ربي بكلبي...فتت لغرفتها ونصدمت من منظرها وجهها مورم من الضرب...جانت ايدها خرج الغطى بيها مناطق زركة...معقولة هيج مسوي بيج...عفتها وطلعت ماتحملت منظرها...
قاسم جمعت امير وباسم بالحديقة...انا جمعتكم هني...حتى الحجي يكون بينا وبعدين نسولف لعمامنا...انا متاكد مو كل السوالف تنكال
امير...خيرك ياخوي قلقتنا
باسم...من شفت امير...من ودي اشرب من دمه بس احترمت وجود اخوي ونبهني نسمع منه بالاول
قاسم...امير صار هواي شغلات ماسولفولك عنها ...وخلي اسولف لك بس لا تقاطعني...
امير....قاسم يحجي وانا نار بكلبي مااكدر اصبر روحي...صدج تحجون ورد وينها الحين
باسم ...يعني ماتدري عن هالحجي شي
امير...صار وكت انا اسولف ...ورد الله يشهد ماشفتها لوحدنا بعد اخر مرة من كالت انتا حسبتي اخوي....اشوفنها من بعيد...والرسايل مو منها ...انا اعرفن من منو...بس ماردت مشاكل وانا حذرتها...ومو انا الي وصلت ورد لاهلها...ترى البنية اشرف منها ماشفت ...ليش شلتو ذنبها
باسم...جا منو وصلها لبغداد
قاسم...انا وصلتها لبغداد
باسم...جاليش ياخوي تشردها وتخلينا بهيج موقع
قاسم..عمامك وابوك ..جانوا ناوين يزوجون البنية بغير رضاها..كلت ادزها لاهلها ...لحد مانحاول المشكلة ...ماهكيت انا كبرتها اكثر...
باسم...امير..منو صاحبة الرسائل
امير...وحدة ماتعنينة...ورد الحين وين
قاسم...روح امير لبيتكم ...وبلغ عمي بعد العشى ننجمع يمكم....
باسم...ليش ما كلت خوية جان تجاوزنا هالمشاكل كلها
قاسم...خوية المشكلة موجودة اصلا قبل هذا كله
باسم..مافهمت عليك
قاسم....خوية انت نفسك مافاهمها...ماهكيت امير اسبع منك
باسم...شسولف
قاسم...اسولف عن الي جواك...انت اكثر من خوي ...من نظرة عينك افهمك...وعرف بيك تعشك ورد
باسم....شمالك نسيت هاي اخت خطيبتي
قاسم....مانسيت ...انت الناسي ...شجرالك خوي مو انت زلمة حوك...من شنو خفت ...ماكدرت تكول ماريد لمى اريد ورد...جاهنة اثنينهن بنات عمنا...ماجبت وحدة غريبة
باسم...لمى محجوزة من الصغر الي..وماريد اكسر بختها
قاسم...هاي سالفة قنع نفسك بيها...هاي اعراف كل اهلنا ماشين بيها صح ...بس مو شرع حتى نلتزم بيها
باسم..ورد مو من ثوبنا ولا ترباتنا ...يجوز مثل امها باجر عكبة تشرد لاهلها وماتقبل هاي عيشتنا
قاسم...غلطان ياخوي...ورد خوش بنت ..صاينة نفسها وصبورة واخت خيها ...هي ورؤى نفس الطبع ...تبقى بظهر الزلمة ...شوف شكد جاروا اهلنا عليهن بس تحملن وماطلع منهن عيب .
لا تخلي تجربة عمي تعميك...العشك مو عيب ان جان بحدود شرع الله...بس الاختيار لازم يكون صح...خوية الحجي ماينفع بعد ...بس لا تستمر على الخطأ
راح قاسم وخلى روحي لايبة ...سويت انا ..حيل جرت على البنت وهية ماله ذنب بكل الي جرى...ماتنعرف النار الي بكلبي ..همت على وجهي باازرع واني دايخ بالي سويته
قاسم ...نجمعنا بالليل بيت عمي وحجينا انا وامير كلشي
ابو علي...هاي عود انتة الجبير
قاسم...عمي المشكلة مو بالي سويته المشكلة بالي انتو تريدون تسوه ...وعفتهم وطلعت تلكتني خالتي..
ام علي...ليش يمة شجرالكم..كل من راس البلى
قاسم...خالة كافي...هي مين بدت البلوة
