جاهذا السولفنا عنه...
التفت لكيت باسم كدامي...ادري بس بالموقف الطايح حظها اشوفه
ورد...مافهمت
باسم...موكتلج لا تفككين العائلة
ورد..اي مو اني مفرق الجماعات...وردت ادخل بس من فتت من يمه...الزمني من زندي التفت عليه
باسم...كتلج ضبي لسانج من تتحجي وياي...وحذرتج سابقا ماسمعتيني...وثالثة ثابتة تشوفين وجه اخر مني...
عافي ايدي...رحت للغرفة واني شابعة قهر ...هسة هو بيدي لو اني جبرته يحبني ويجي يخطبني...
رؤى...شمالج ورد وين رحتي...شجرالج ليش تبجين
ورد...حضنت رؤى حسيتها بيها ريحة امي...رؤى مشتاقة لامي .
رؤى...جانا شكول لما شبعت من حظنها...خيتي مكتوب علينا نتيتم من الاب والام...بس سولفيلي انا هم امج
ورد...سولفتلها كلشي
رؤى...صخام...جاهذا الخفت منه ...يارب لا تنعاد نفس السالفة ...ويلي علينا من نتلاكاها ...يايمة خيتي الله يسترها وياج
امير...ظليت الوبن شلون بية ...كلت باجرماعدهم حوي ...احجي وية ابوي ..واشوف
امير...الله يكويك بوي
ابو علي...علا بالمهندز جاشلون يابعد ابوك
امير...بخير مادامك خيمتنا
ابوعلي...ان يجعلك دوم بخير...بس بوية انطيني من الاخير شعندك من صباحيات الله
امير...جا بوي من اسلم عليك لازم عندي شي
ابو علي ...لا بوية انا عرفك زين ماتايه عنك
امير...بوي الله ينطيك مو صار وكت زواجي
ابو علي ...يابوية يوم المنى جا انت البقيت ياريت ازوجنك واروحن للحج...من عين باجر اخطبلك بنت عمك مها وخلال شهر ازوجك
امير...لا بوي اني اريد ورد
ابو علي...ياورد بوية ...مو حاجزين لك بنت عمك من سنين
امير...بوي الله يخليك...هاي هم بنت عمي
ابو علي...تعصب...لا وليدي مو هيج الحجي ...البنية مو كفين قسمتها من سنين مايجوز تجي هسة تكول ماريدنها
امير...جاقابل دخلت بالعمرين هية عمرها ١٨ وهي قسمة ونصيب ...وانا احسنها مثل خيتي
ابو علي...اي هي قسمتك وماكو شي اسمه مثل خيتي سمعت...دخلت ام علي ...خيرك حجي صوتك عالي
ابو علي ....تعاي اسمعي ابنج شيسولف
ام علي...جشمالك غير افهم عليكم شكو
ومن عرفت كلبت الدنيا....جاشلون بنات نور مكتوبات علي اخلص من وحدة تطلعلي الثانية ...والله لون تبقى اخر وحدة بهالكون ما تدخل بيتي ...
امير...تلاغيت وياهم واني ابد مامجاوز على ابوي وامي ...صح احول اقنعهم بس هم قافلين...لليلة كبت مشكلة جديدة لان امي اصرت نكمل خطوبتي على مها وخلت نفسها وابوي ورضاهم بجفة وزواجي من ورد بجفة
ورد ...بالليل سمعنا هوسة بيت عمي ابو علي...البيوت متقاربة وتعرفون كيعان زراعية والدنيا ليل فيوصل الصوت ...
قاسم راح يشوف شكو هو وباسم ...من رجع جان وجهه مكلوب ...وضايج وهو على اساس يطلع من الصبح لدوامه
رؤى...شمالهم بيت عمي سالت قاسم اشر لها وراحو للغرفة
...مها جانت بغرفتها وعمي ومرته نايمين ..بقيت اني وباسم...اني خفت ليكون الموضوع يخص امير ردت اطلع ماريد اسمع حجاية من باسم
باسم...وين مهزومة ..جاسويتيها وتردين تنهزمين من المجابهة
ورد...شنو الي سويته
باسم...ماتعرفيين
ورد...لا ماعرف ...ومالي دخل باي شي صار...ليش بس تتهمني...لو ابوي مايكدر بس على امي..ماحسيت بس حرارة ايده على خدي...انصدمت واني اباوع لعيونه طك شرار
باسم...حذرتج سابقة تضبي لسانج ولا طوليه...
ورد....غصيت بدموعي اول مرة واحد يضربني بس ماخليتها تنزل كدامه...مشكور ابن عمي ماترجيتها منك ...عفت ومشيت بس دخلت للغرفة شهكت بالبجي تلكتني مها
مها...شمالج ورد...شجرالج...وصخام شبيه خدج
ورد...ماكدرت اجاوب وبكلبي الوم بامي الي عافتني ملطشة لهم
باسم...سمعنا صوت هوسة بيت عمي ومن رحنا فهمنا السبب نار وشبت بضلوعي الي جنت خايف منه صار ....رجعت وانا محمل حقد على ورد...ومن حجيت وياها وطولت لسانها ضربتها راجدي...بس قهرتني نظرة عينها الدامعة ...وحسيتها صوبت كلبي...صح شنو ذنبها لو هية حجة حتى اطلع قهري بيها ...
مر اسبوع علي بس ربي اعلم بحالي كلها اعلنت الحرب علي ماعدا مها ورؤى....مها كالت مالج ذنب بالصار ورؤى كالت هذا الي جنت خايفة منه...باسم سافر ثاني يوم من الصبح وبعد ماشفته بس حيل شلت عليه....
ورد... رؤى اريد احجي وية امير
رؤى… شمالج انتي تسودنتي ...ماتشوفين الدنيا مكلوبة
ورد...رؤى دبريلي فرصة الله ينطيج...بعد ماكدر
رؤى...ماعرف شوكلن ...خلي اشوف
المغرب ....رؤى كالت تعاي نتمشى للزرع شوي نغير جو ...طلعنا مسافة عن البيت مو قليلة واشوف امير ينتظرنا
رؤى...اسولف على السريع لا جتلنا اليوم يصير عمل وطني
امير..شلونج ورد
ورد...الحمد لله ...انت شلونك
امير...شلوني بالضيم ..بس لا تخافين ما اتخلى عنج
ورد....امير اريد تجاوبني بصدق احلفك باغلى شي عندك
امير...جا ماكو اغلى منج يانظر عيني
ورد..لو كنت ماجاية اني جانت تممت خطوبتك لمها
امير....ورد لويش هالسؤال
ورد...امير جاوبني حلفتك
امير...اي
ورد...ارجع احلفك واكولك تممها لعد ...ترى اني ماشوفك اكثر من اخوي والله...ولا ابالي ازوج هنا مو هذا طموحي....
امير...جا شبيه هنا ياورد ...هاي عيشة ابوج واهلج ...مايعجبنج
ورد...انت تعرف شنو اقصد امير ...انت ربيت وكبرت هنا وعندك الكاع وية النفس...اني لا... اريد اكمل دراستي وارجع لبغداد من تتحسن الوضعية اريد ارجع لحضن امي...امير اني شفت الويل هنا...انت بعيد عن الوضع...اني العايشة الجحيم وحدي
امير...بنت عمي صح انتي اغلى من كل ناسي وهلي...بس انا عزة نفسي فوك كلشي والي مايشتريني ذهب ...ماكمل ...بس مايكون خاطرج الا طيب
ورد ....مشى بس حسيت أذيته ...لكن مو بيدي ما اريد اكون سبب بخراب العائلة...امير....وكف بس ماندار عليه ...لا تزعل مني اترجاك
امير...ماكدر ازعل من كلبي ...بس كرامتي غير شكل
ورد....ظليت ابجي لان حبيته كاخ وساعدني هواي هسة حتى هذا خسرته...
رؤى...خيتي مو كتلج لا تتعلقين باحد بيهم ...كلهم محجوزين
ورد...رؤى ابجي لان ردت اخ بالشدة ومالي احد هنا
رؤى...جا انا وين رحت ...لا تخافين ربي يجبر بخاطرج مثل ماجبر خاطري وجبرتي خاطر مها
بالليل سمعنا هلاهل ابيت عمي ابو علي ....وثاني يوم اجوى مشاية على مها وقروا الفاتحة
شفت الالام والقهر بعيون لمى ورؤى هم انتبهت بس لمى ماتتقربلي وبعد شغلة امير كطعت وياي نهاىي
باركت لمها واني فرحانة وكالعادة لازم اغض النظر عن الصار وابارك لنسوان عمامي
بس جانت المفاجاة من كالو خابرنا باسم حتى نتمم خطوبته وية امير نفس اليوم...حسيت كلبي كام يدك سريع...قابل اني شترجى ..اذا هو اصلا يكرهني....
وبدوا يجهزون للخطوبة باسم ابد مااجى وامير جان ياخذهم للولاية على كولتهم...واجى يوم الخطوبة...وللحكاية تكملة
