في مكان ما في بلد ما في بعد ما غير عالمنا اللي عايشين فيه .. مفيش سوبر جونيور
قفلتكوا من اول سطر تمام كده انا ماشية صح .. في ذلك البعد اللي منعرفوش سوبر جونيور مكانوش فرقة مشهورة زي دلوقتي .. كانوا شباب في جامعة واحدة ومش شلة واحدة كمان وعايشين حياة شباب الجامعة بأنواعها بطريقة طبيعية جداً , وبما ان قدرهم مهما كان العالم اللي هما فيه انهم يتجمعوا واللي يجمعهم الموسيقى كان لازم اكتبلكم قصة ازاي اتجمعوا في العالم المختلف ده .. اللي جمعتهم نيللي .. بنت .. يعني تقريباً بنت .. هو مكتوب في البطاقة انثى ودي تقريباً صلتها الوحيدة بعالم البنات بس بما انها السبب في تجميعهم لازم نديها شوية احترام عن كده , هي بنت بس .. مختلفة شوية , بصوا هحاول اشبهالكوا بحد .. شايفين الشاب اللي هناك ده ؟ اه اللي ضارب الهودي الاسود وبنطلون الترنج الواسع ولابس ساعة كبيرة فضة .. اللي قاعد عالرصيف وحاطط السماعة ده وبيخبط في الارض عاللحن بالصندل الرجالي الاسود ده .. شوفتوه ؟ دي نيللي
اظن كده الرؤية وضحت .. نيللي ببساطة متعرفش يعني ايه بنات اساساً وتقريبا كلهم في نظرا كائنات لزجة مبتعملش حاجة غير انها تتدلع وتتسهوك عشان كده بعيدة عنهم تماما وبما ان البنات كده كده مش عارفين يحددولها معالم فبيتجنبوها من نفسهم , ومع ذلك عمرها ماكانت وحيدة بالعكس ده عندها شلة اي واحدة تتمناها اولهم اللي قاعد عالرصيف جمبها بيشرحلها عملي الفرق بين لف سجارة الحشيش والسجارة العادية وميعرفش انه حالف مايدوق المنكر في عالم تاني " لي دونجهى "
دوني : بصي لازم تظبطي اللفة من تحت لفوق والا هـ...
نيللي : يابني ارحمني بقى لو حد من الدكاترة شافك هتروح فداهية
دوني : ليه وانا عبيط هرميهم في حجرك واجري
نيللي : لا اصيل
دوني : اسمعي الكلام ده مهم مش هتلاقي حد يفيدك فيه زيي
نيللي : انا لو اخويا عرف اني بسمع الكلام ده هيقطم رقبتي
دوني : اهي دي غلطته بقى كان لازم يقولك بنفسه بدل ماتعرفي مالغريب
فجأة لقوا ضل حجب عنهم الصوت والضوء والحرارة خلوا دوني تلقائياً حدف السجارة في حجرها وعمل نفسه من بنها
كانج : هو ايه اللي يقولهولها ؟
كانجين .. صاحب اخوها الكبير ومعتبر نفسه اخوها غصب واقتدار وانه لازم يحميها من الاشكال الضالة اللي بتقعد معاها واولهم دوني
كانج : انا مش قولتلك متقعديش مع الواد ده تاني
دوني بفزع : هـ هدي اعصابك ياكابتن وانا بقولها كلام ابيح والعياذ بالله ده انا بشرحلها كيميا
أنت تقرأ
Super Show
Fanfictionفي عالم السوبر جونيور فيه مجرد طلاب جامعة مهيسين واتدبسوا في انهم يعملوا حفلة بقيادة واحدة مجنونة يمكن اكتر منهم فقرروا يعملوا سوبر شو .. ياترى ايه تحضيرات السوبر شو وهيتجمعوا فيه ازاي * اي ذكر لأي فرقة تانية في الفيكشن غير مقصود بيه التقليل ا...
