.. نهى بنت كبقية البنات لها مميزاتها فهي جميلة في تعاملها وتصرفاتها ،من هي صغيرة محبوبة بين الاهل كانت مميزة بين صديقاتها فهي لطيفة ورقيقة وهادئة.
لونها قمحي مائل للصفار طويلة القوام شعرها اسود ناعم وطويل عيونها حوراء شديدة بياض العين توحي ليك بالكلام...وهذا ما كان يجذب اليها المعجبين .
تربت نهي في جو اسري محافظ وميسور الحال لكنها كانت دائما تميل ان تسكن مع جدتهاا والدة امها فكانت مقسمه بين بيتهم وبيت جدتها الحاجة فاطمة.
احداث القصة
-------؛-؛-----
كانت الحاجة فاطمة تحب نهي شديد ،كبرت نهي وظهرت مفاتنها وزادات جمال زيادة علي انها كانت متفوقة في دراستها نهي بتحب القراية شديد من هي صغيره ابوها كان بحفظها القرآن حتي الحروف الابجدية كانت عارفاها قبل دخوله المدرسة امتحنت نهي من الصف السادس قبل تغيير مراحل التعليم ودخلت المدرسة المتوسطة (الثانوية العامة) مدرسة الاميرية بحري طبعا دخولها المدرسة المتوسطة حدثت بالنسبه ليها نقله من الطفولة الي مراحل المراهقة والتكوين العقلي والصديقات .نهي دي زوله شفافه ومرهفة شديد بتحب الشعر والاطلاع ؛ظهر الحب في دواخلها واول من حبت عمر ود الجيران وبرضو عمر كان بحبها شديد بس نهي كانت بتخاف وبتعمل الف حساب لامها وابوها زيادة علي انها خجولة وعمر برضو كان بحبها ومكسر فيها كان بحاول يلاقيها وهي راجعة من المدرسة بس ما بقدر يتكلم معاها بس يشيل ويكتب في الرسايل ويرميها ليها وهي تتلفت بعدين تشيلها وترد ليهو بنفس الطريقة لحدي ما جا اليوم عمر اتجرأ واصر انو يقابل نهي ضروري ،رسل ليها رسالة يا نهي انا لازم اقابلك الليلة ضروري شديد انا يا نهي بحبك وما بقدر اسيبك لازم تقابليني عشان ابوي نقلوهو الاببض وح نسافر يوم الخميس نهي بعد ما قرت الرسالة دي حصلت عليها جنس حاله وبقت بس تبكي وما عارفة تقابلو كيف وحكاية سفرو دي اصلا ما باقية ليها كان باقي علي سفر عمر يومين ولازم تتصرف عشان تقابلو بس المشكلة نهي دي اصلو ما مديه سرها ده لي زول عشان يساعده لانها كانت بتخاف نسيت اقول ليكم نهي دي اخوها واحد اسمه طارق اصغر منها واخواتها اتنين ليلي اكبر منها مسمنها علي حبوبتها ام ابوها ومناهل اصغر منها بي سنتين المهم نهي كانت بتفكر في طريقة تقابل بيها عمر .اها الصباح وهي طالعة المدرسة كانت كاتبة الرد في ورقة صغيرة وخاتاها في علبة كبريت دايما كانو بوصلو رسايلهم لي بعض بالطريقة دي مشت نهي ومن بعيد شافت عمر رمت الكبريته ومشت علي طول من غير تتلفت وراها لحدي ما وصلت شارع الظلط عشان تركب المواصلات وكانت متوترة جدا..،عمر بعد مسافة مشي شال الكبريته وفتح الورقة وقرا الرسالة، عمر انت عارف شعوري ناحيتك وما قادرة اتخيل بعادك عني خلاص يا عمر نتقابل نهاية اليوم وانا جاية من المدرسة ممكن يا عمر تجيني في بحري ونركب مواصلات تانية غير مواصلات شمبات عشان عارفني انا بخاف وما دايرة زول يشوفني عمر طبق الورقة ودخلها في جيبو مع انهم كانو متفقين ما يحتفظو بالرسايل بس المرة دي عمر اخلف وعدو ،
