نهي ودلال وصلو البقالة لكن ما مشوا علي فاروق نهي عملت فيها ما شايفاهو ومشت طوالي عشان تشتري آيسكريم ودلال اصلا عملت رايحة وهو زاتو اول مرة يشوف دلال دي .عايزة اقول ليكم بقالة الكردفاني دي مع انها كلها مشروبات وآيسكريم لكن ما عامل مكان للناس عشان يقعدوا وزحمه وفي ناس بتقعد في صناديق الببسي الفاضية.
فاروق كان بعاين لي نهي معناها يا نهي ما شايفاني وطوالي مشى عليها .فاروق : السلام عليكم
نهي :وعليكم السلام
فاروق :تشربي شنو يا نهي
نهي:مرتبكة مافي داعي خلاص انا اشتريت آيسكريم لي ولي دلال قام فاروق قال ليها خلاص انا ح ادفع وقال للكردفاني رجع ليها قروشها واشتري لي نفسو بارد نهي الخوافه ادت دلال الآيسكريم بتاعةمشت وقفت في ركن البقالة بتخاف زول يشوفها وبالذات بت عمها الاسمها نادية دي ودايما بتقول لي دلال هسه لو زول شافني وابوي عرف بقطع رقبتي .نرجع لي فاروق شال البارد بتاعو ومشي وقف جنب نهى وهي من الخوف والربكة لما دايرة تقع من طولها ،فاروق :اذيك يا نهى
نهي اهلا وسهلا ودلال تشيل وتعاين ليها .فاروق قال ليها طبعا يا نهى انا شايفك من زمان وما قادر اصل ليك شايفك متحفظة شديد وما ملاحظه لي انا اول يوم شفتك واقفة ماشة المدرسة وانا كنت ماشي علي صاحبي عوض ابراهيم ولفتي نظري وتاني شفتك عند ناس حبوبه فاطمة وذاد اعجابي بيك بس انتي اصلك ما انتبهتي وكل يوم الصباح بجي اركب من محطتكم وبتحجج لي عوض انو المواصلات جنبنا صعبة ونهى دي ساااكته اصلاها ما اتكلمت ولا أكلت الآيسكريم بتاعة فاروق قال ليها المهم انتي كيف يا نهي ما حابه تتعرفي علي ونهى ما ردت ودلال تشجع فيها بي نظراتها وفاروق ده لما زهج من سكاته كانت سلبيه شديد فاروق قال ليها خلاص يانهى ما تردى وبعد يومين بنتظرك هنا وودعها وطلع اصلا فاروق درس محاسبه واشتغل في مصلحة الضرائب قبل سنتين وهو زول مهذب وقيافة نوع الزول اللبيس ودايما بحشي القميص مع البنطلون ونضيييف حتي من جواهو نضيف وقلبو ابيض وكان صادق مع نهى.
بعد فاروق طلع نهى اخدت نفس كأنه كان كاتم عليها دلال جات عليها وضربتها اصلا دلال كده لما تتكلم مع زول بتضربو في كتفو ضربه خفيفة وقالت ليها ده شنو يا العويرة الولد يتكلم معاك وانتي ساكته ما بتردي يا غياظه هسه ذي فاروق ده ما بردو عليهو وريني سريييع كان بقول ليك في شنو نهى قالت ليها والله يا دلال ما قال حاجة غير انه داير اتعرف علي وقالي بعد يومين منتظر ردك ح يجيني هنا ،وانتي عارفه يا دلال انا ما عندي ليهو حاجه واول مرة اشوفو وما حاسه باي شعور ناحيتو وثانيا الامتحانات علي الابواب وانا ما عايزه اشغل نفسي بالحاجات دي .وطلعن من البقاله وكانت المفاجأة منتظراها بره .
بعد طلعن من البقالة نهي لمحت نادية واقفة قصاد البقالة وكانت بتعاين ليهم نهي دي رجفت وانتهت عديل وووب علي يا دلال شوفي نادية واقفة اعمل شنو انا يا دلال ده الكنت خايفه منو ودلال تقول ليها يا بت اهدي وما تشتغلي بيها واعملي نفسك ما شايفها خلي عندك ثقة في نفسك نهى:لا لا يا دلال نادية دي ما بتعرفيها بت عمي وانا بعرفها كويس وح تمشي تفتني ده لو ما شوهت صورتي قدام الناس واي انا يا دلال وريني اعمل شنو
