إبقى بجانبي إلى الأبد

البارت الرابع

( خشت ملاك للجنان ولقت الشباب مقعمزين )

عمران : اووووو ملوكة كيف الحال
سراج : وين الغيبة ياملاك
ملاك : ( ابتسمت ) اهلين الحمد لله كيف حالكم انتم والله كلية وامتحانات
الكل : الحمد لله
قيس : ( قعد يبرق فيها وسارح في ابتسامتها )
ملاك : ( تعقدت من نضرات قيس ليها ) احم احم هي نستادن شباب منخش لداخل ( فاتت وخشت )
مندر : أوووي وين سرحت ياراجل
خليل : إي لما خشت ملاك سرح
قيس : ( ارتبك ) أ اااا اني
عمران : لا غولتك انت مالا شن
سراج : قيس فيك شي ات كويس ؟
قيس : ( بصوت واطي ) الله قديش متغيره ليا زمان عليك
مندر : قلت حاجه ؟
قيس : لالا ( وقف ) انا ماشي شباب يوسف انت روح بي خواتي وامي
يوسف : خيرا هدا
سراج : الله اعلم
علي : وين امشي
مندر : والله مانندروا عليه من لما خشت ملاك وهوا سارح بعدين وقف وامشي
خليل : والله غريب
( وقف سراج وامشي لحق قيس )
_______________________________________________________________________

( عند ملاك خشت داخل قابلتها تسنيم )
تسنيم : ( بفرح ) لوووكا
ملاك : سوومه ( حضنتها ) كيف حالك
تسنيم : ( بعدت من عليها )الحمد لله كيف حالك انتي
ملاك : الحمد لله كويسونة
تسنيم : خشي البنات في الدار وميرا من امبدري تستنى فيك و رانيا سئلت عليك
ملاك : ( ابتسمت ) هي ( خشت للدار لقت البنات كلهم مقعمزات ميرا من اول ما شافتهاها امشت حضنتها )
ملاك : شن الجو يا فرختي
ميرا : ( بعدت من عليها ) تمام شن جوك انتي
ملاك : تمام
ميرا : وينك يا ضالمة ليك فترة مهفته ومعاش ادوري
ملاك : والله كلية وامتحانات
ميرا : به سلمي على باقي الفرخات وتعالي نطلعوا للجنان
ملاك : تي الشباب قاعدين
ميرا : لالا منطلعوا من وراء
ملاك : به ( ميرا امشت وملاك خشت للدار وسلمت عالبنات كلهم وقعمزت ) كيف حالكم
الكل : الحمد لله بخير
دنيا : كيف حالك انتي وشن امدايرة
ملاك : والله تمام
لينى : شن جو الكلية
ملاك : باهي اهو دراه كبد وخلاص
اماني : بديتي امتحانات
ملاك : لا مزال
ياسمين : امتى تبدي
ملاك : ممكن بعد اسبوعين
خلود : ربي يوفقك
ملاك : ان شاء الله ( وقفت ) منمشي لي ميرا اني
تسنيم : مطوليش ره
ملاك : به
يسرى : حتى احني خاطرنا فيك نبوا انهدرزوا معاك عارفينها فرخه ميرا اتشدك معاش اتسيبك
ملاك : ( ضحكت ) ههههه باهي مش امطولة ( طلعت قابلتها ميرا )
ميرا : هي تعالي
ملاك : اصبري يا منجوهه منمشي انشوف رانيا ومنشوف عماتي
ميرا : به بسرعه
( خشت ملاك لصالة كانو مقعمزين فيها حنتها وعماتها ونساوين عمامها سلمت عليهم كلهم
ملاك : كيف حالك يا امي
حنتها : الحمد لله كيف حالك انتي يا بنتي
ملاك : كويسه الحمد لله
حنتها : وين معاش اتجي حدايا نزعل هكي ره
ملاك : لا يا امي والله ماصارت غير كان عندي امتحانات
حنتها : باهي ربي يفتحها عليك ومعاش تقطعيني تعاليلي ديما
ملاك : حاضر يا امي ( وقفت وامشت قعمزت بحدا رانيا )
ملاك : شن جوك حبي
رانيا : تمام ، انتي شن امدايرة
ملاك : والله تمام
رانيا : شن جو الكلية وكيف حال اسيل
ملاك : والله الكلية دراه كبد مليت منها ، كويسة الحمد لله
ميرا : ( بصوت عالي من المطبخ ) ملااااااااااكووووو هياااا
ملاك : وااك الحصلة ميرا هدي ( بصوت عالي ) هيا هي جيتك يا همي ( وقفت ) شوية وانجيك
رانيا : به
(طلعت ملاك من الصالة وامشت لي ميرا وطلعت هيا وياها للجنان وقعمزوا يهدرزوا )