B a y b a y i n : Ang Balintataw Mula sa Nakaraan
Ipipihit pabalik ang bawat pitik, lagitik ng kamay ng orasan
patungo, sa lunduyan ng buhay at karimlan.
Ihehele sa bisig ng kasalukuyan ang bakas na iniwan ng nakaraan.
Aalalahanin ang 'sangdaang beses na pagkadapa at paglaban.
Babalikan ang takipsilim na muntik nang hindi matakasan
at ang bukangliwayway na inakalang kailanman ay 'di na masusumpungan.
Iisa-isahin ang napakaraming dahilan kung bakit ito ang kinahinatnan
at kung paanong ang lahat ay umabot sa nararapat na katapusan.
Dahil kung hindi nasaksihan ng mundo ang mga naganap noon, walang ngayon.
Kung hindi sana sa nakaraang gumuhit sa ating kapalaran, wala ring kasalukuyan.
Hindi masasaksihan ng balana ang gandang hinulma ng kasaysayang nagdaan—
kasaysayang dumampi sa mga labi ng ating minamahal na Inang Bayan, magdaan man ang maraming panahon.
