"Ewan", salitang iyong sinambit habang orasa'y pumipitik
kasabay ng malamyos na ritmo sa iyong instrumento.
"Gusto kita", mga salitang matagal nang nais kumawala
sa hawla ng damdaming
gusto nang sumabog
dulot ng malakas na pagkabog ng aking dibdib.
Di ko na kaya, ngunit bakit nauutal?
Nauumid ang dila sa tuwing nariyan ka na.
Nalulunod sa bawat letra, titik, at pantig.
Di alam kung saan sisimulan ang lahat.
Hanggang sa 'di ko na namalayan
ang iyong paglisan
na ito na pala ang wakas,
wakas ng tulang sinimulan
ngunit kailanman ay 'di na maaabot ang sukdulan.
Na kasabay ng pag-agos ng taksil kong mga luha
ay patuloy pa rin akong umaasa sa iyong binitiwang salita
"Ewan."
