رجعت اتحسرت كالت:
مااعرف مصطفى انت فاجأتني وانه احتاج افكر براحتي مااريد استعجل واظلمك لو اظلم نفسي.
مصطفى:فكري بس لاتطولين وتشلعين كلبي كافي هالسنين الراحت اتمناج.
ابتسمت كالت:
عفيه لاتحجي هيج وتخليني انحرج منك انه من اوصل لنتيجه انطيك خبر ان شاءالله.
مشت شويه تريد ترجع للشعبه كتلها:
ورده؟
التفتت كتلها:نظريلي نظره انسانيه.
ضحكت وراحت وانه اباوعلها رفعت راسي للسما كلت:
ربي وصلتها الي من عكب كل هالسنين ورغم كل شي صار بحياتي وحياتها خليها توافق بجاه كلمن عنده جاه.
مرت الايام يوم واثنين وتلاثه وهي مارجعت جواب وانه مشتعل راسي وكلبي نار من التفكير وباكيت جكاير رايح وباكيت جكاير جاي بمكانه.
وامي ونور وخواتي يوميه يسألني شكلت وشقررت فكرت لو مافكرت؟
ردت اوديلها مسج بس استحيت ومااريد احرجها واصير لزكه.
واصلا اخاف اسألها خاف تصدمني برفضها.
وجنت اصبر نفسي اكو اكيد حجت لاهلها وهسه يمكن جاي يسألون علي.
بس طولت السالفه وانه راح اموت وهي ولاعبالك تتصرف بصوره طبيعيه عبالك ماحجيت وياها شي ولامنتظر جوابها.
فات اسبوعين وانه ميت عدل من التفكير اليوم خميس واجيت اطلع وراها واسألها بس كلت اصبر للاحد.
وشيصبرني كوه خلصت الجمعه والسبت صار شطوله وبس الجكاره تعرف بحالي.
بالليل قررت باجر الصبح اسألها حتى ارتاح قبلت خير على خير ماقبلت اصرف نظر عن موضوع الزواج.
ظليت اتكلب بالفراش من خوفي حتى النوم طار راسي وجعني ردت جاي درت على نور غافيه انقهرت عليها غطيتها عدل وكمت سويتلي استكان جاي.
جبت الصبح بيدي ماغمضتلي عين.
الصبح من وكت ذبيت نور عالدوام ورحت لدوامي وصلت هي موجوده فرحت.
باوعت الموظفين بعدهم محد جاي كلت فرصتي خل اتشجع واسألها.
مصطفى:صباح الخير.
ورد:صباح النور هلو مصطفى.
مصطفى:شلونج؟
ورد:الحمدلله بخير.
مصطفى:عساج.
سكتت شويه بعدين كتلها:
جنج طولتي علي؟
كوه طلعت هالحجايتين من الخوف والارتباك.
باوعتلي ودنكت كالت:
مصطفى انت عزيز علي الله يعلم شكد بس ماكو نصيب.
من كالت هيج حسيت كلبي انشرخ نصين اختنك كتلها:
ليش؟
ورد:كل شي قسمه ونصيب.
مصطفى:اكيد بس السبب شنو؟لان متزوج؟
باوعتلي كالت:
بصراحه اي.
مصطفى:يعني شيضايقج وجودها تره نور حبابه خوش بنيه.
ورد:احنه مو حجينه بهالموضوع وكتلك صعبه علي ضميري يأنبني شلون اسوي بيها هيج لو بمكانها انه شراح احس؟
مصطفى:ورده انتي تتحججين وتطلعين اعذار هذا مو عذر تره.اذا عندج سبب مقنع كولي ماازعل مهما كان السبب.
ورد:ماكو سبب ثاني بس مااكدر اخاف.
اخاف اقبل والله باجر يسوي بيه مثلها.
مصطفى:صدك جذب شمسويه قابل هو الله مطيني الحق ب4 اذا كل وحده هيج تفكر جا الاربعه منين اجيبهن وشفايدة هالحق بعد اذا هيج؟
ورد:سامحني مو بيدي انه انظلمت هواي ومااكدر اظلم غيري.
كامت اترخصت طلعت وخلتني محروك كلبي والدمعه بعيني.
كمت انه هم طلعت من الدوام كله مااكدر ابقى هنا واشوفها واتصرف طبيعي.
لااشتهي ارجع للبيت ولا اكدر ارجع للدوام ظليت افتر بالسياره لحدما داخ راسي.
انوب فكرت انه ماكتلها نور موافقه شلون ماكتلها شكد غبي.
لفيت السياره ورجعت للدوام طبيت ركض رحت للشعبه لاكتني وجه بوجه راسأ كتلها:
واذا كتلج نور موافقه.
فتحت عيونها مافهمت كالت:
شنو؟يانور؟شموافقه؟
مصطفى:نور مرتي موافقه اتزوج هي اصلا كلتلي اريدك تتزوج.
التفتت هي وراها عالموظفين لان يباوعون علينه انه مامنتبه صوتي عالي وكلهم سمعوا الكلام الكلته حسيتها انحرجت وانه ماعرفت اتصرف كتلهم:
شبيكم مستغربين خطبتها وماقبلت لان متزوج.
ماعلقوا بس ظلوا يوزعون ابتسامات وهي خدودها اشتعلت نار دنكت كالت:
فضحتني.
نصيت صوتي ووكفت على جهه كتلها:
ماعاش الي يجيب طاريج بشي موزين من يومج مؤدبه وينحلف بأسمج شنو فضحتني يخسى واحد يجيب طاريج.
اتنهدت كالت:
احرجتني اولا وثانيا شوكت وافقت مرتك شنو رحت حجيت وياها هسه ورجعت؟
كالتها بأستهزاء مامصدكتني كتلها:
تكدرين تطلعين شويه من الدوام؟
ورد:حتى لو اكدر مااسويها.
مصطفى:زين شلون احجي؟
ورد:بريست الغدا نحجي ان شاءالله هسه خل اروح اشرد مااكدر ارجع للشعبه بعد لان كلهم هسه يسألون.
مصطفى:اسف ماانتبهت حجيت بصوت عالي بس جنت منفعل.
ورد:مو مشكله.
راحت ماادري وين وعيوني وراها دخلت للشعبه سألوني كتلهم:
والله اريد اتزوج وورد خوش بنيه ومؤدبه واعرفها من زمان واعرف اخلاقها ماالكه احسن منها.
كالوا:
اي والنعم زين مااختاريت خوش بنيه واخوها هم خوش ولد.
مصطفى:بس ماقبلت لان متزوج عبالها مرتي ماقابله.
كالوا:
لا احجي وياها وفهمها مابيها شي واذا تريد ندخل هم ماعدنه مانع واذا مرتك قابله كللها وفهمها.
خوش اختيار موفق ان شاءالله توافق انت هم خوش ولد.
ومن هالحجي وره تقريبا ساعه يالله رجعت بس مبينه مستحيه ماحجت والكل اتصرف عادي محد فتح الموضوع وانه اشتغل وعيني عليها وهي مغلسه واحسها تتجنب تباوع باتجاهي.
اجه وكت الغدا وكلمن راح لمكان انه هم طلعت ووكفت بعيد انتظرها تطلع حتى احجي وياها.
