حلقت وزينت لحيتي وسبحت وكعدت منتظر اهلي وعمامي يتجمعون وامي وخالتي وخواتي ونور وامها كلهن لابسات وكاشخات ومنتظرات.
صدك فرحان لان وردتي وره كل هالسنين صارت الي بس كلبي معصور على نور مو سهله علي شلون بيها.
كلما اشوفها كاعده وتباوعلي ينكسر كلبي عليها لدرجة كمت رحت للغرفه صحتلها اجت تركض دخلت وسدت الباب.
نور:ها شبيك؟
مصطفى:اكعدي اريد احجي وياج.
كعدت لزمت ايدها كتلها:
نور تدرين انه احبج؟
نور:ادري طبعا.
مصطفى:هالخطوه مااكدر اخطيها بدون رضاج مااتحمل اكسرج نور.
بجت كالت:
والله والله قابله وراضيه وفرحانه اكثر منك يمكن شتحجي مصطفى 8سنين انام واكعد واتخيل بحضني طفل هسه من توصل للصدك ارفس النعمه.
مصطفى:اذا ضايجه وحاسه نفسج اتسرعتي وحق الله ابطل ومالازم لاعرس ولاطفل الله الرزاق لا اول ولا اخر اثنين احنه ماعدهم اطفال.
نور:لا ازعل عليك والله شلون تبطل انه اريدك تتزوج انه اريدك يصير عندك اطفال انه المحرومه مو انت انت من تتزوج تحقق امنيتي وحلمي.
مو سهله علي والله اصعب من الموت لكن لاجل عين تكرم مدينه.
هي تبجي وانه ابجي بست ايدها وبست راسها كتلها ان شاءالله ماتشوفين مني قصور كل وحده منجن الها معزه ومكان.
نور:متأكده واعرفك كلش زين وماخايفه وعلى كدما كلبي معصور لان راح تشاركني بيك وحده ثانيه بس فرحانه الله شاهد ان شاءالله ياربي ينترس حظنك جهال وافرح بيهم.
حضنتها مشلوع كلبي عليها شكد فرحان بوردتي بس نور شالعه كلبي شلع وجنت فعلا من كدما مقهور عليها مستعد اذا كلتلي بطل ابطل لان مااكدر اظلمها.
نور:يالله حبيبي كوم واتعوذ من الشيطان لاتفكر بيه انه اتعود ولان احبك كل شي لخاطرك اتحمل وهذا حقك شرع الله انت مامسوي شي غلط ولا تحتاج رضاي وموافقتي كوم يالله خل نطلع اجو الجماعه عيب.
طلعت وانه وكفت مسحت دموعي واتعوذت من الشيطان وكلت كلامها صحيح.
اجو اهلنه ورحنه لبيت اهل وردتي وكل شي تم على حسب الاصول وعقدنه سيد اهلها ماقصروا خوش ناس طيبين واهلي فرحوا بيهم.
خصلنه وطلعوا عمامي واهلي بقيت بس انه من الزلم وامي ونور وخواتي وخالتي جوه يم وردتي.
بعدين دخلن كلهن يمي بالديوانيه باركنلي ونور اجت باستني وباركتلي والدمعه بعينها وانه هم وامي اخذتها واخذت خواتي وخالتي وراحن.
من شفت نور طلعت وعيونها مدمعه كل الفرحه الحسيت بيها طارت انعصر كلبي ظليت كاعد ومقهور ومخنوك.
الى ان دخلت وردتي هي وامها وخواتها باركنلي وسلمن علي وطلعن وبقت هي.
شطالعه صدك ورده الشعر مفتوح للخصر والوجه جنه مرايه ولابسه فستان ازرك سمائي وهي بيضا احس عيوني ماتشبع من الشوف.
بس حجت وياي طار الزعل كله وراحت الخنكه.
ورد:شلونك؟
مصطفى:هسه صرت زين.
ورد:هههه ان شاءالله دوم.
لزمت ايدها شعور ماجنت اتخيله هيج حلو اصلا باجمل احلامي ماجنت متخيل الزم ايدها واحجي وياها هيج بحدنه وبراحتي وهي مرتي حلالي.
ورد:فرحان؟
مصطفى:اجذب عليج اذا اكلج فرحان.
ورد:اسم الله ليش؟
مصطفى:لان كلمة فرحان شويه عاللي حاس بي هسه احس نفسي طاير من الفرح مامصدك الي صار.
ورد:هههه شدعوه؟
مصطفى:والله العظيم مو مبالغه بس مامصدك عكب كل هالسنين يتحقق هالحلم وتصيرين مرتي الي ملكي محد يحاسبني عليج ولايكلي عيب لو حرام ومااخاف احجي وياج خاف تضوجين لو تزعلين لو خاف اجيبلج حجايه.
ورد:سبحان الله كل شي بوكته حلو.
مصطفى:الحمدلله على كل حال.
اتدنيت يمها وبست ايدها كتلها:
من جنه بالكليه اتوسلت بالبنات يكللج انه احبج بس كالن نعرفها ماتقبل مو مال هاي السوالف هسه براحتي اكول احبج اموت عليج اعشقج كل الي احس بي بعد مااظم شي.
ابتسمت كالت:
اعرف من الاول بس شبيدي عليك بس هسه لا بعد صرت زوجي انه هم لازم اكلك هالحجي مو بس انت مثل ماانت تحبني انه هم....
اندك الباب كامت فتحته دخلت اختها جايبه صينيه الضيافه وطلعت.
كتلها بكلبي هسه وكتلج جا تأخرتي فد دقيقه.
رجعت وردتي كعدت وخلت الصينيه كدامي كتلها:
مااريد ضيافه.
ورد:شتريد؟
مصطفى:اريدج تكملين الحجي.
ورد:شكمل بعد؟وين وصلنه؟
مصطفى:وصلتيني لحلك الموت وكمتي كلتيلي مثل ماانت تحبني انه هم...
ضحكت كالت:
احبك غير.
كتلها:
اشتعلت روحه مصطفى كل مرار السنين راح والله كل التعب راح هالكلمه بس من احلم بيج اسمعها.
ضحكت اباوعلها جنها تفاحه على كولت امي.
اتجرأت اتدنيت يمها وحضنتها على كيف مامصدك نفسي اباوعلها استحت وخدودها صارن حمر كتلها:
وردتي لاتستحين مني احنه هسه متزوجين بشرع الله باقي بس المحكمه عالاحد نروح نعقد ان شاءالله.
ورد:ان شاءالله.
حجينه شويه وسولفنه بس انه مامصدك نفسي فرحان حيل بعدين كمت اريد اروح وهي هم كامت وياي طلعت وياي للباب وصلنه للباب مااتحملت بعد 💏.
شصار بيه مو بيها هي استحت عادي بنيه طبيعي تستحي بس انه استحيت اكثر منها.
ورد:مصطفى مو هيج لحد يشوفنه عيب احنه بالحديقه واكفين.
اتنهدت وعفتها كوه كتلها:
يالله خل اروح اتخبلت من وراج.
سلمت عليها وطلعت وطول الطريق على كولت ياسر الكشره شاكه الحلك من الاذان للاذان😆.
