Gugma Ko Kanimo

Ikaduhang Panid: Ang panagkaila

Kining ikaduhang panid kay akong ipahinungod sa isa nako ka higala diri sa Wattpad nga mao si queen-Meduza. Karon pa gyud ko nakahuna-huna ug sumpay ani, sis. Maayong buntag diha kanimo.

Ma. Karya Bonifacia In-grata

Nagtindog lang ko diri sa pwertahan samtang akong gikalingawan ug lantaw si Dapyana nga nagtimpla ug kape. Bisan tuod nga anak ni siya ug adunahan apan bilib ko. Kabalo siya sa mga trabahuon sa panimalay tungod kay wala siya magsalig sa ilang mga katabang. Katong iyang pag-inarte ganina kay dako ra kaayo to niyang atik.

"Angayan man diay kaayo ka mahimong suluguon diri sa among balay, Dap. Diri na lang ka aron naa usab koy masugo." miingon ko niya niana ug sa kalit lang ko niyang gitutokan ug kuyog ang iyang pataas-taas sa kilay. Angayan kaayo siya kay gwapa ug maanyag kining akong amiga.

"Paghilum, Karya." mao iyang tubag diri kanako ug iya kong gitudlo gamit ang kutsara nga iyang gigamit pagkutaw sa kape nga anaa sa tasa.

Gikataw-an lang nako siya ug maayo. Paghuman niya ug timpla sa akong kape, midiretso na dayon mi sa among dyotay nga sala.

"Karya, kung panguyaban ka ug lalaking laksot kaayo ug panagway... sugtun kaha nimo kini?" Oh, nakuratan ko ug balig dos sa iyang pangutana.

Unsay nakaon niining higalaa nga sa  kadaghang angay niyang ipangutana nganong kato pa man gyung butanga?

"Dili ko." maoy akong tubag niya ug iya dayon kong gilantaw gikan sa akong ulo paingon sa akong mga tiil.

"Pagkapilingon lagi nimo. Ngano, gwapa diay ka?"

"Dili lang ko gwapa, Dapyana. Maldita, suplada, isug, buangon, hilabtanon, hilas ug daghan pang mga lagutmon. Tuod, maypay mooli na lang ka. Saba kaayo ka diri, ay. Siguro man gyud kong gipangita naka sa atong prinsipal karon sa tulunghaan. Wala gyud koy labot kong makapiso na usab ka, ha?"

"Maayo lang unta ug piso, unya ug singko? Ayaw ko kabalak-e kay nasayod na tong akong amahan  kung unsay maayo para namo ni manong."

Manong? Nge, pag-sure. Sa among panagkaila sulod sa isa ka tuig wala man gyud ko nakahinumdum nga naka-istorya kini siya mahitungod  nianang aduna diay siyay igsoon nga lalaki.

"Kinsa?" Nge, gibati usab ko ug kaanyag, ay. Wala lang. Mikalit lang man gud ug kalipay ang akong dughan pagkadungog ato. Pero basin diay ug  huna-huna lang ni nako kay wala baya koy igsoon nga lalaki.

Mikalit ug katawa si Dapyana ug gikusi ko niya sa akong bukton. Misiyaget ko gamay kay gisakitan ko sa iyang pagkusi. Naa man gud ni pagka-brutal akong amigang maanyag.

"Hahahah, interesado ka sa akong manong, no? Ako na lang gyud ang moingun nga dili mo niya pareson kay hilabihan ka palauyab ang akong magulang. Dokirok kaayo. Bisan kinsa na lang ang mamahimong trato  dayon pagkahuman  iya ra kining biyaan ug binuangan."