محطة قلبي الأخيرة

البارت الرابع

وظلينه نسولف ونضحك واحنه عين بعين ومندري برواحنه اله والجامعه فااارغه
اباوع للساعه عززززه خطي هسه راح
اباوع لموبايلي لسه صامت من اخر محاظره ما تذكرته ورجعته عام
صديقاتي هوايه مخابريني
داكين عليه ورسائل هم
هو كلي لتهتمين اني اوصلج
كلتله لااا شلون ميصير
كلي اول شغله اكيد انتي عرفتيني وعرفتي انه اني مو واحد مو زين واني هم صديق كرار
وثاني شغله اتصلي بخطج وكليلهم جانت عندي محاظره وراح ارجع بغير خط
ومن نوصل انزلج ابداية الفرع مو يم باب بيتكم حتى متجيج حجايه
خوو متظلين هناا وحدج
اني بين مقتنعه وبين لاا بس ماعندي غير حل
صدك خابرت صديقاتي كلتلهم راح ارجع بغير خط
رحت وياه وااني فرحاانه راح اصعد ويه الحب
الطريق كله احنه نسولف ومندمجين والسياره مالته مظللة يعني ما اخاف احد يشوفني ويفهم غلط 
جنت مرررتااااحه 😊
وصلنه لبداية الفرع ونزلني بي وانتظرني لحد ما طبيت لبيتنه وياله راح اني جانت الفرحه ماليه الدنيا عليه
هو هم حسيته كلش تغير وعيونه ما فاركتني ظل يباوعلي من فوك ليجوه 
والابتسامه ترس وجهه
فددديته شلون وجه يخبل
ثاني يوم الصبح بدلت وطلعت للكليه جنت اطلع بلا ريوك لان ما الحك اتريك
اروح للكليه اكل  شي ع السريع
بهذاك اليوم ما جان عندي محاظره اولى يعني ريست
طبيت للكليه رحت خليت محاظراتي باللوكر ورحت للصحيات عدلت مكياجي وطلعت للسنتر مال الكليه اول ما طلعت من الباب الرئيسيه واشوووف بوجهي شمس تضوي واكف بالنص ع مكان مرتفع بي نافوره بنص الساحه الي كدام القسم
شافني هو واشرلي بايده كلي هلوو
اني رحتله
- صباح الخير
- يا صباح الورد ع الورد شلونج شلون صرتي
- لااا زينه سمعت نصيحتك وذبيت الحزن وره ظهري
( واني اكول بكلبي بعد شلون تريدني اصير  واني امسي واصبح بوجهك بعدلي شويه واطير )
- عندج محاظره
- لااا راح اروح اتريك
- شتتريكين هي الناس تتريك من خدج
(عززززه اني صرت حمرره من الخجل شو هذا اليوم رومانسي )
تقبلين اعزمج على ريوك
- لاا ما اقبل ... اني اعزمك اذا تقبل نروح نتريك
- ولو هي واكفه انتي تعزميني واني موجود بس اوووك يله
رحنه تريكنه ونسينه الدنيا بالسوالف جان كلبي يدك احسه راح يطلع من صدري
وهو هم احس عيونه تحجي وكل شويه يذبلي حجايه حلوووه
رجعت سولفت الصديقاتي كلولي هذا لعد شكد محترم ما تقربلج بالبدايه لان عباله انتي خطيبه حمزه
احترم صديقه واخوه
هذا اكييد يحبج
مرت الايام وهو يجيني لو يشوفني ع السريع ويروح لو مرات نلتقي بشي حديقه او كافتريا بالجامعه ونكعد نسولف وننسه الدنيا
واخذ رقم موبايلي والفيس وصرنه نسولف كل اليوم
واحد تعلق بالثاني
صار النفس الي اتنفسه خوفه وحرصه عليه يخليني احبه اكثر
هو هم اكيييد يحبني بس لسه ما حجاها وكال اني احبج
احسه يوووصل عدها ويوكف مرات يضوج فجأة ويكلي خليني نااسي
اكوله شنوو ناسي يكول الهم والتعب
اكوله سولفلي يكلي لااا بالشغل وبالدوام ليش ادوخين راسج
استمرينه تقريبا لنهاية السنه 
بيوم من الايام خابرني 
- الوو ايفا شلونج
- تماام انت شلونك  شووو مدا اشووفك صار يومين
- والله صراحه  مو تمام اني
اكو موضوع شاغلي بالي هوايه اخاف اخسر شي غالي كلش
- اسم الله ان شاااء الله متخسر شي اكدر اساعدك بشي
كلي والله روحي فداك
- تسلم روحج
.... اسمع صوت بجي
😳😳😳
- بساام ويايه ....
صاير وياك شي
كول احجيلي
- مااكدر احجي
- ليش ما اسولف لاحد راح احفظ سرك
- هو بس انتي الي ما اكدر اكولج
- ليش ...!!!
- تدرين اني وين كاعد هسه
- وين انت  ... لتخوفني زايد
- اني ع سجادتي ادعي وابجي
- شكوو 😢😢😢 راح ابجي وياك
- ايفا اني اكو مشكله بحياتي لازم تعرفيها
-😮 شنووو الي لازم اعرفه
- ايفا الله يشهد عليه اني حبيتج من اول يوم شفتج بي 
صدكي احلفلج بحياتي من اول نظره واول حجايه فتحتي كلبي الي جان مقفول من سنين
ايفاا اني احبببج
احببج اكثر من روحي
اعشقج اقسملج هسه واني كاعد ع سجادة الصلاه
ونيتي وياج شريفه من اول ما دريت بيج انتي ما مرتبطه باحد
ورايدج على سنة الله ورسوله
( اني ساااكته وبين الفرحانه وبين الي بكلبي غصه شنووو المشكله الي بحياته ؟ )
- اني هم احبك بسام 
اني اعشقك ما اكدر اعيش بدونك
- لا اوووكفي
ايفا اريد احجيلج شي ياله تقررين موقفج ويايه شنوو
واريدج تعرفين انه هالشي صار من غير اراتي
شوفي يا ضوه عيوني  ونبض كلبي
اني من جان عمري 18 سنه امي زوجتني لبت خالي اصغر مني بسنه  هي جميله كلش سبحان الي خالقها
مؤدبه حيللل وطالبه جانت بعدها
صارت بينه مشاكل من سبعة العرس لحد ال 6 اشهر وانفصلنه اني كمت اكرها وهي كامت تكرهني بس جانت حامل بوقتها
ولدت وجابتلي بنيه رنيم عمري كله
اخذتها منه وعمرها سنه
وربيتها وهسه رنيم عمرها  16 سنه
كبرت وصارت عرروس
اني ماجان الي ذنب بالي صار ولا رنيم ولا امها
اني كرست حياتي كلها لبنتي وجنت اتحاشه اي بنيه كمت اخاف من الحب ومن الزواج
واخاف هم من مرت الابو الي اجيبها لبنتي
بس من شفتج والله شاهد عليه بسرعه دكلج كلبي وحبيتج من بعد عمر
واني هسه رايدج على سنة الله ورسوله
فكري زززين ورديلي الجواب
ع راحتج
واني راح  اكوم  واروح للعباس لو يبرد كلبي وانساج لو تصيرين من نصيبي

اني شصار بيه شايفين مثل الواحد الي يديرون عليه سطل مي بااارد وبعدين يرجعون يديرون عليه سطل مي حاار يفور
لا اخذ ولا انطي بعد ظليت امدده بفراشي وصخنت بسرعه وكمت ارجف واحس الدنيا كلها تفتر بيه اجتي ماما عليه بسرعه اخذتني للدكتور
كالت بنتي قبل نص ساعه كلشي مابيها شوفو جهها ولا قطرة دم بي وعيونها صارن بيض وصخنت وتكول الدنيا تفتر بيه
اني اخذوني  وجابوني واني ماادري شنو بيه
ماادري شلون افكر
احبه اي احبه اموووت عليه بس يطلع متزوج !!!
زين اني قبلت
واهلي شلون
امي مستحيلل تقبل هي عدها هالوحده هاي تنام وتحلم بيوم عرسي
تريد تشوفني احلى واسعد وحدهمتأكده مراح تقبل تنطيني لواحد متزوج ومطلك وعنده بنيه
ياااربي والله حبيته حلها
اهديني اختار اختيار صحيح
....