.
.
.
نور الشمس:
احجيلكم قصتي اني جعفر ابن ذي قار ابن الملوحه ابن الدله والفنجان ولد عرب اهلنه شيوخ بس عمرنه ماتكبرنه لا على ابن الفلاح ولا على ابن الباشا كلنه عبيد الله افعالنه هيه الي تكبرنه
نحب كاعنه نحب عيشتنه عدنه الريف تسوه المدينه وترافتها نحب المدينه صح لكن نحبها للونسه يومين ونختنگ ونرجع للريف بيها الهوه صافي والخوه خوة صدگ لاخوة جيب ولاخوة مصالح
اني جعفر ابوي متزوج اثنين واثنيهن بنات عم ابوي
عندي ١٢اخوو سبعه ولد واربع بنات
الكبار من اخوتي متزوجين اني مو من ضمنهم ولاعايش وياهم وهسه تعرفون ليش
قبل تلاثين سنه عمي الجبير مسلم عشگ بت عمه وهيه مريضه ويدري بمرضها جانت مريضه بالقلب عدها تهطل بالصمام وعجز والطبيب حذرهم انو هيه ماتتحمل زواج ولاتكدر تجيب اطفال .
جدي الي هوه الشيخ هاني جان معتمد على ابنه بكلشي وجان يتمنه يزوج ابنه ويريد يشوف خلفته بس كلها تدري بحبه البنت عمه وابو حاول يخلي يختار غيرها بس گلب العاشگ شيقنعه بقه يقنع بوالده الحد مااقتنع نحب يتزوج عليها وتبقه هيه الجبيره وام الدلال وياخذ بس للخلفه عمي بذاك الوكت سايره وگله هذا هوو بس بداخله يعرف بنفسه لو للموت ماياخذ غيرها
قنع اهلها وهيه هم اصرت تزوجه لويبقن ايام من عمرها اهم شي تخلصهن وياه
اتزوجوو وجانت قصتهم كل السلف يحجي بيها
انطاه جدي مهله سنه وبعدين حاول يزوجه ويوميه وكل كعده وعرض علي الموضوع وعمي يأجل ويماطل وجدتي نفس الحاله وصلت بيها گدام مرته تگله اشوفلك مره نريد نشوف بزرك جان مصر اعله الرفض وجانت هيه حيل تتحسس وتضوج وتبجي وتگله هذا حقك يارجال اني احبك صح واتمناك بس الي بس انت يرادلك ولد يسند كبرتك يرادلك ولد يخاويك ومحد يفيد باجر عگبه مادايمتلك اني
..سهام للموت زندي ماتنام علي مره غيرج
ولااصابيعي تلعب بشعر غيرج ولاصدري يصير وساد البنت من بنات حوا غيرج انتي محبوبتي لاتفكرين ولاتضوجين لو اعرف اموت ومااصير الغيرج
..اسم الله عليك يابعد طوايف هلي يمن اندار على طولك سبع فدوات
..حبيبه انتي روحي وگلبي والي تسمعي عبريه مايكون خاطرج الا طييب ومن تجيبيلي سيرة العرس مرت الثانيه ازعل عليج ومحمد
وضلوو سنين على هاي الحاله الحد ماصار الزواجهم اربع سنين وصار المايخطر ع البال .
بيوم والشيخ عنده ضيوف وهيه مرت الجبير صح هوه اكبر اعمامي بس همه معرسين گبله وعدهم خلفه تارسه البيت بس باوامر الجد والجده تبقه هي الجبيره وام الگدر بالبيت وگدرها من گدر مسلم
هيه تحترم الكل ويحترموها بس اكو من نسوان عمومتي يغارون منها على ابو هاي المريضه الماتخلف هيه مكبرينها علينه احنه امهات الخلفه وبيهم الي تتمنه مسلم بس يأشر حته ينطنه اختهن
طبعا امي الي هي ام علي الجبيره من نسوان ابوي هي اختها المرت سالم وام ابراهيم مرت ابوي الزغيره بت عمها باقي نسوان عمي وحده غريبه من الولايه ووحده بنت خالهم
بيوم العزيمه والكل مشغوله وهي وجهتهن
سهام ..
اني من وعيت ع الدنيا واني عاشگه ابن عمي وهوه يموت عليه بس شسوي القدرنه گولت اهلنه الگدر ماگدر والشله ماعبر والمكتوب مامنه مهروب
حبيت ابن عمي وهوه حبني حاربنه كلشي وتزوجنه معيشني بسعاده تحلم بيها كل بنيه بس الناس ماترحم والعنده نعمه ماحامد الله عليها نسوان حمويني عدهن خير من الله وعينهن عليه گدامي مايحجن بس الهمز واللمز وانه ذكيه واعرف كلشي اعرف الحجي البالعيون جنت ضعيفه من داخلي اتصنع القوه واسوي نفسي مامهتمه وانه اكل بروحي اكل ليش حبنه لهنا وبس اريدلي ولد اريدلي خلفه اريدلي بنيه من ريحته ادري بي يتمنه ولو ياخذ اعذره ..عمي يحبني بس حگه وليده وشبحة عينه وجبير ولده والشيخ من بعده يريدله تارثه ويحاول يخلي يتزوج وانه اجي على گلبي واقنعه ومن احاجي يغتاض ويزعل ويگلي لاتعيدن هالحجي انوب ازعل وضلينه ع هالحجي اربع سنين من هوه يمي انسه الدنيا كلها ومن يروح ارجع الواقعي
ارجع للحقيقه المكروها اكره ضروفنه اكره القدر الجمعنه بهيج حاله بس احمدلله كلساع واكول انه احسن من غيري وحسه بالدنيا كلش كافي
فاتن اربع اسنين واحنه على حطتنه
فديوم جانو ضيوف عد عمي وحيل مختبصين وعمتي مسلمه الشغل بيدي وجهتهن وانه اعله الطبخ ضليت ذبح ابوعلي الذبايح وگصبهن وگالي سهام شوفي شغلج بعد اخوجن ماوصيجن هبات ريح الغده نريده بوكته ضيوفنه طريجهم ابعيد صيحي ام علي وام ابراهيم يعاوننج
انه هم صحتلها دادا ام علي بعد اختج انتي وام ابراهيم عجنن وخبزن وخلي ام مالك وام صادق يكملن شغل البيت وجهالجن يمهن
..صار داده سهام تدللين
اجيت اطبخ وي ماتعرگ الجدر وانه روحي طلعت دخيلك ياعلي شجاني شبيها روحي تگلب وعرگه تاخذني وعرگه ترديني ..
وانه گلبي ضعيف صار عندي خفقان غسلت وجهي وجريتلي نفس ورجعت على جدري ونفس الحاله هنوب معدتي تگلب وماتحملت بعد
أم ابراهيم ..شبيج داده سهام خيه شجرالج كون گلبج يوجعج داده اصفريتي ولج ام علي الحگي اخيتج مدري شجرالها
..ياخيه سهام شبيج شجاج كون گلبج سوده بوجهي خيه ارتاحي علمااصيح مسلم ياخنور الشمس:
ذج للمستشفى
..لا ام علي خيه عوفي مسلم فدوه رحتلج يمهم خطار وعمي يريده ارتاح وهساع اصير زينه مدري شجرالي .
..ارتاحي خيه انه وأم ابراهيم نكمل شغلنه
ام علي وام ابراهيم ماجنهن شرايج خوات ونوبات يتعاركن بنفس الساعه يتصالحن وجن كلشي ماكوو وكلها تحسد ابو علي على نسوانه مامتعباته
سهام ضلت تلوب وكلما تريد تگوم تدوخ
اجه مسلم
..السلام عليكم هابشرن كلشي تمام
..كلشي تمام خويه جااول مره نطبخ تجربونه شنهي
..لايخوجن هبات ريح والنعم منجن لكت خطارنا هالمره من الغربيه صدجان ابوي من سنين وطريجهم ابعيد ونريد همتجن
..تدلل خويه على الراس انتم وخطاركم
..يسلم راسج يالطيبه ام عليو جاسهام وين مااشوفنها
..ها خويه لايضل بالك هسه تصير زينه
..جاهيه شمالها
..ماكوو بس داخت مدري شجرالها
..هاا داخت منين شبيها جنها ورد الصبح مابيها شي
..خويه مدري
..وينها هسه شو خل اشوفنها
..بحجرتها هيه وعمتي يمها
..سويلي طريج بعد اخوج خافن يمهم احد
..لاخويه عيال البيت بس ماعدنه احد غريب
..جا خوش
..السلام عليكم ..شلونج يمه
..هلا يبعد امك هلا بيك فوت يمه ليش واچب بالباب
..هلا بيج يمه شبيها سهام ليش نايمه
..والله يمه ماادري شو عرگه تاخذها وعرگه توديها
..هاا يمه جاخل اخذها للطبيب خافن گلبها
..اخذها يمه ان شاءالله ماعليها شي هساع هيه زينه ضل يم ابوك والعصر اخذها كون تضل على هالحال
..جاخوش .يمه مااوصيج فدوه بالج عليها
..تدلل يمه تدلل
بينها وبين نفسها ..اي يوليدي عمت عيني عليك دوم يضل گلبك مشلوع لاضنه ولاراحة بال مريتك مريضه وكلنه ندري بيها بس انت ماتصدگ ماناوي تريحنه
طلع مسلم وطول الگعده وهوه باله يم سهام وكلساع يروح ويرجع يشوفها وجها اصفر وشفتها ذبلانه
ويريد بس ابو يرخصه وياخذهم
مسلم وحيل مهموم ودخل لگاها وحدها
..سهام سهامة گلبي شجاج ياحبيبه شجرالج
..هلا بحسك يبعد رويحتي من شفتك صرت زينه
..ضحك ها جاكون معتازه شوفتي وتخربطتي
..ابتسمت وكتله جاشعندي غيرك شوفتك ترد روحي اليه
..يبعد الروح انتي خايبه ليش هيج غير وگف گلبي سهامه يبعد اليعمن بلياج گومي نروح للطبيب
..تامر أمر يبعد رويحتي بس انه شنهي تعرفني اكره روحت الطبيب
..الخاطري سهام اريح بالي
..جا خوش الخاطرك كلشي يهون
اخذني ورحت للطبيب وهناك سوولي تحاليل
وجانت الصدمه ..
الطبيب ..
اخ مسلم اني محذركم مسبقا الزواج مو بصالحها وتزوجت وانطيتكم نصائح واهمها الحمل ممنوع حمل وگتلكم تتعرض حياتها للخطر
..دكتور صح الگلته واحنه ماخذين احتياطنه ليش شنهي الصار
..اخ مسلم انت انسان واعي وتعرف المثل حالتها بمعجزه يله تعيش هيه وطفلها
..دكتور ياطفل لاتگلي هي حامل
..للأسف حامل يمكن هذا الشي يفرحك بس حياتها بخطر من هذا اليوم والأشهر القادمه راح تكون اخطر
لزم راسه بأيده وگله دكتور فدوه مااريد الطفل اريدها هيه
..مابيدي شي اذا قصدك اجهاض طلع من ايدنه هالشي الأجهاض مو بصالحها
اني كل هذا وطرت من الفرح ماهمني اموت لا المهم اجرب احساس الأمومه
سالم ضاگت بي الوسعه وعيونه صارن شرار
ادري بي ودله يكتلني يمكن لأن حس اني المخربطه بالحبوب بس يخاف عليه والزعل هم مو زين رجع والطريق كله احاجي وهوه باله مو يمي وروحه
طالعه
..السلام عليكم
..هلا بيك بويه هلا بشر شنهي شعدها سهام
..شبشر بويه طرگاعه وطاحت على راسي
..يسلم راسك يبوك شنهي شعدها
..بويه سهام حامل گلتها واني انكت وعيوني صارن دم
..اللهم صل على محمد وأل محمد وليش ضايج كول الحمدلله
..الف الحمدلله بويه بس الدكتور يگول خطر عليها واذا ضلت عايشه معجزه
..بويه ماادري شگلك ادعي ربك وطلع همك البگلبك واشكي والله مايخيب ضنك لو بيدي اشيل همك بس مابيدي حيله يبوك
..ونعم بالله بويه ماعندي غيره
سهام خبرت الي بالبيت وبگد الفرحه جان اكو خوف
بس كلها مو مثل خوف مسلم
مسلم ..
بهذا اليوم كلشي توقف عندي حسيت الدنيا ضيگه ضاع عليه الهوه اطلع اشم الهوه بكل قوتي وريتي ضاگت مدري الهوه قل اصعب احساس من تشوف حبيبك هاي اخر ايامه وانت الك ايد بموته بذاك اليوم تمنيت صدگ لو مامتزوجها اتمنيت لوضاله عند اهلها وبس الشوف بيني وبينها عمري بحياتي مابجيت هذا اليوم بجيت ومو بجي عادي نحبت نحيب وماهمني يسمعني زلمه مره گلبي راد ينطر
بچيت وحاچيت ربي وگتله ربي اخذ عمري گبل عمرها
يتبع
