في صباح يوم جميل يصحى اهل الريف باكرا
على اصوات زقزقة العصافير
واصوات حفيف الأشجار
كما لاتخلوو اشجارهم من الطيور العاشقه
ليتغازل البلابل بينهم
سهام ..
أصبحنا وأصبح الملك لله
ياالله يارزاق يارحيم يافتاح ياعليم
ربي استر علينه وعلى امة محمد احفظلي ابو بيتي واحفظ وليداتي هاني وجعفر وبلغني بيهم عراريس
..صباح الخير يمه
..هلا يبعد امك هلا بعزيز الروح جعفور يمه شلونك بالدراسه
..والله يايمه دامني اتصابح بوجهج انه زين وفوگ الزين الا ماگلتي هاني وأبوي وين
..أبوك بمضيفه وأخوك راح للولايه عنده شكم غرض يشريهن گبل لايروح الدوامه عمت عيني
..ألله يسهل يمه عينج سالمه
..يمه لاتعبين اني اجيبلج نرجس تجي تساعدج امي ام علاوي ماتگول
..يبعد امك گول امي وبس ليش دومك تسميها ام علاوي جنها غريبه عليك يمه تره هي امك اوله بيك مني
..يمه الأم الربت وهيه غاليه والله واغلى من العين لكت ماتوصل غلاتج يبعد العافيه
دنگ عليها باسها براسها ومن سمعته بجت من فرحتها
..ها هم بدينه يمه ولاتملين ولادموعج يبطلن
تضحك وتمتزج ضحكه بدموع
..هههه يمه موش بيدي
يله يمه انه طالع اروح للدوام ومناك امر اعله اهلي ذولاك واجيب نرجس وأجي خوش
..خوش يمه خوش الله وياك محروس من عين البشر
قدم هاني على الكليه العسكريه وانقبل بعد محاولات هواي من اهله يدخل غير كليه الى ان قنعهم ودخل الكليه المتمنيها
الجد حالته الصحيه تدهورت الأمور العشائريه تحولت كلها بأيد مسلم
جعفر..
طلعت وانه اتمشه بالسلف ورافع ايدي واسلم اعله اهلنه اهل السلف
..السلام عليكم شلونك عمي صيهود
..هلا بأبن الشيخ هلا بوليدي
..تريدلك عونه انه بالخدمه
..خادم ربك وليدي الف رحمه للرباك كلك شهامه
..الله يسلمك عمي .ماادري حمود موجود طالع
..وليدي هسه طلع
..جاخوش عمي انه اترخص
..الله وياك وليدي
صاح ام حمود ام حمود خايبه وين وليتي
..هاوو هنا أنه هنا شنهو التريده
..رايدلي قوري جاي اعدل بي راسي
..تامر امر شويه واجيبلك
حجت بصوت ناصي ..ادري دوم هوه الجاي موش زلمه عندي كلساع وندهني شلون بالله ماكضيش شغلي اليوم
صاحت خايبه هنا يمدلوله گعدي الدنيا ضهاري سليمه التطمج وتطم امج ولج الوين نايمه
..گاعده گاعده الناس تصبح على حجايه حلوه
انه اصبح اعله دعاوات امي يمه شمالج فدوه رحتلج شعندج علي
..خايبه كومي بعدج بفراشج ولج كومي نكمل شغلنه تگابليني ..صار يمه عود اصباح الخير
..اصباح الخير والعافيه
انه ريم بنت صيهود وامي اسمها نبعه احنه فلح بگيعان الشيخ ابوي يموت ع الشيخ وامي تگضيها النهار كله تدردم جا حض الشيخه سهام وحضي سوه مره مريضه گالوله ماتخلف واخذها ويتنوع الحلگها نسوان الله منطيها خو ماضيمي الذبني اعله صيهود
..يايمه شنهي شجاج جاشبي أبوي
..خابه ماتنلصمين ابووج والشيخ سوه خايبه فوگ الكباره الدلال
..يمه جا مايكفيجن المره مريضه
..شمالها مريضه جاماماتت كله دلال وتفسگن ماتعرفين حييل النسوان
..استغفري ربج يمه هذا كله حجي فهيمه ام مالك
اووف يالسلايف نار الشرج تبرد ونار نسوان الحمه ماتخمد
..خايبه الصمي وگومي شوفي شغلج ريت هالشوفه الغسل
..يا انعم الله عليج يمه گايمه هل گايمه
