ودعت الأهل وسافرت قررت اروح التركيا
گلت ابقى فتره اريح بالي وصلت تعبان ومابيه اتحرك
حجزت فندق ونمت يمكن نمتلي يومين جره ماأگعد قليل كلش اصلي واكل لگمه وانام .
وراها قررت اطلع اتونس بس كل مكان اشوف بي اثنين مبينين يحبون بعض بگلبي اگول الله يديمكم ولايعذب گلوبكم عبالي من أبعد ارتاح بس طلعت غلطان يمكن مرات تزيد ضوجتي مشتاق الأبوي الأمي باقي وياهم ع الأتصال ابوي ابو علي وامي ام علي هم كل شويه يتصلون كاظم اصلا ماتركني متواصلين ع النت هوه والشباب قررت اشتري الهم هدايه وابقى اسبوع وارجع مااطول مثل ماانه رايد
واني اشتري ومشغول دگ عليه هاني
..هلا بخوي هلا بهاني شلونك
..هلا بيك ولك جعفر طلعت بذات ماعبالي تركيا تنسيك أخييك
..ماعاش الينساك والله ماتنسيني لاتركيا ولاابوها
بس بعدك عريس مااريد ازعجك مراعي شعورك انه گلتها وانه اضحك
..هههههه والله بيك الخير تفتهمني ولك جعفر عرس خويه اليگلك العرس مو حلو يجذب عليك
..ههههه ولك خاف تورطت وتريد تورطني گلتها وانه گوه مسوي نفسي مامهتم
..بعلي احلى ورطه ولك لاتبطي تعال ارد اشوفك گبل لا التحق وجدي هم تعبان كلش وحالته مو زينه
..ها صدگ تحجي شبي جدي
..الرئه مالته ماتتحمل بعد وحته الفنتولين گام مايفيده ويختنگ
..هاني عليك الله جدي حالته خطره
..ليش اجذب عليك حالته خطره
..جا باچر انه جايكم
..هلا بيك خويي بالك على روحك ولاتخاف ان شاءالله ماكوشي
من گلي هاني هيج گلت لا معناها جدي منتهي وانه حيل متعلق بي رحت حجزت طياره صار موعد الطيران بالوحده بالليل دعيت من الله بس كون الحگ علي سنين وهوه شايل همنه الحد ماهوه تعبان وهوه عينه علينه .
حضرت غراضي ورجعت وصلت بتلاثه تقريبا ماكو سيارات بتلاثه يطلعن للريف ضلمه ومحد يندلها وطرقها بس ولدها تندلها .
گلت اخابر هاني بس زحمه
خابرت كاظم .
الووو
..هلا بجعفر شلونك
..هلا بيك خويي تگدر تجيني
..ها اجيك وين التركيا
..يخوي لا يا تركيا گلتها وانه اضحك گتله لا انه هنا بالمطار
..جا خوش جايك شجابك بهالليل مو متفقين تضل اكثر بعد
..أجيت علمود جدي گالو ماله خلگ
..اي صح يله جاييك انه
بقيت بالأنتضار الحد مااجاني كاظم
كتله شخيره جدي گال عمي وابوي حيل متأذين وعمي ابو هاني حته بجي اليوم بجه عليه من مافاده الفنتولين موقف صعب تشوفه يختنگ يمك وهوه الله هذا ضايع علي
گتله الطبيب شگال گال يگول هوه وربه هذا البيدنه
وصلت للبيت دخلت ابوي گاعد وامي يتناوبون يم جدي سلمت عليهم شبكت امي بچت گالت جدك تعبان گتلها يمه انه اجيت الخاطره
حبيت راس ابوي وگتله عساك تگوه شلونه هسه گال والله ماكو امل منه من دنكت علي حبيت ايده لزمني گتله جدي عرفتني انه جعفر هزلي راسه ودموعه نزلن بسته براسه وگعدت يمه للفجر طلع هاني يشوف جدي لگاني وسلمنه وگتلهم رايح شويه ارتاح
بطلعتي لاگتني طالعه من الحمام بس محتشمه وراسها مغطيته
ألتقينه وشلتقينه گلوب تحجي
عيون تحچي وكلشي يحچي
وماحچينه
