ياقدري واحلى قدر

الجزء الرابع عشر

حسيت على نفسي ،، لگيت روحي على القنفة وشخص لاف ايدي بجهاز الضغط باوعت يمكن چان طبيب
- ضغطهة مرتفع شوية ،، وبدت تستعيد وعيهة
هسة وهاي حباية فاليوم خلي تاخذهة هسة ينزل شوية
- تسلم دكتور تعبناك
طلع الدكتور وگمت اني عدلت گعدتي وشفت ملوكة نايمة وحاطهة بالكاروك مالتهة
دخل للهول واجة گعد يمي گال
- شلون صرتي
- الحمد لله
- ايلاف ارتاحي وبعدين نحجي ،، انتي هواية شايلة بگلبج علية ولازم نوضح بعض الامور
- لا مو بعضهة كلهة ،، اريد افوت للحمام وين صاير
- تعالي ،، لزم ايدي يريد يگومني مقبلت گمت وحدي طلعتلي ملابس من الجنطة وفتت للحمام فتحت الدوش وگعدت جوا اختلطت دموعي وية المي النازل من الدوش بقيت ابچي واندب حظي لحد مرتاحيت سمعت ملاك تبچي عالسريع بدلت وطلعت
لگيتة شايلهة اخذتهة منة وسويتلهة حليب شربت الممة ،، بس ظلت تبجي بقيت شايلتهة گال ايلاف انطينياهة انتي تعبانة ارتاحي
- لا مابية شي عوفهة بحضني هسة تنام
- ايلاف انت تعرفين زواجنة صار بسرعة واني صح قصرت وياج ،، بس انتي هم قدري وضعي يعني زوجتي صارلهة ٦اشهر من توفت وبعدة ترابهة منشف ،، شوية استصعبتهة اسوي حفلة وهوسة ،، صح انتي بعدج صغيرة وتتمنين العرس والحفلة بس انتي بنت عمي وحسبتج تقدرين وضعي احسن من الغريبة ،، وبالنسبة للغرفة اني چنت ناوي اغيرهة بس بعدنة مصارلنة يوم من وصلنة يعني منطيتيني مجال حتى ،، وداعتج باجر من الصبح اطلع اجيب وحدة جديدة ،، هسة كومي نامي بالغرفة الثانية انتي وملوكة يلله انتي هواية تعبتي اليوم
اخذت ملاك وفتنة للغرفة الثانية بيهة سرير ابو النفر ومكتب وتلفزيون جبت الكاروك مال ملاك وخليتة بصفي وحطيت راسي على المخدة
من گال زوجتي مااعرف شصار بية ،، اني منطيتك صبر يامعتز اني الي تحملت كل شي لخاطر مااخسرك چلبت بيك بيدية وسنوني لان متخيلت نفسي اعيش بدونك
بطني مغصتني من الجوع بعد متحملت كمت للمطبخ على اطراف اصابيعي حتى لتكعد ملاك قبل لا اوصل للمطبخ شفت ضوة الصالة مفتوح مديت راسي على كيف شفت معتز كاعد صافن ويباوع ليفوگ واكو چان جگارة بيدة اول مرة انتبه معتز يدخن
رحت للمطبخ دااجر الكلاص وكع من ايدي للگاع وطلع صوت
انفتح الضوة وشفت معتز گبالي
- شدسووين ؟؟
- حسيت بالجوع وجيت اشوف...
- باجر اتسوك تعالي بعد وكت خلي ندز دلفري اني هم جوعان ،، تحبين البيتزا
- اي
- يلله تعالي
وصلت البيتزا وكعدنة عالميز ناكل
- حلو بيتك
- صدك عجبچ ؟؟
- اي تصميمة مرتب ، وحتى الاثاث كلش راقي اكيد ذوق المرحومة جان حلو
- تصميم البيت واثاثة كلة اني ،، اني من تزوجت جنت مجهز كل شي حتى غرفة النوم هي بس جابت ملابسهة وجتي
بداخلي ارتاحيت ،، معقولة اكو احد يغار من ميت اي اني اغار وموبيدي كل متجي سيرتهة مدري شيصير بية
- باجر اذا يعجبج نروح اني وياج نختار الغرفة على ذوقج حتى لتكولين منطاني حق الاختيار
- ماشي ،، يلله اروح انام اني ،، تصبح على خير
كام وياية وصلنة لباب الغرفة كال
- تريدين انام يمكم
- ها ،، لا عادي اخذ راحتك
بداخلي جنت اتمنى ميسئلني ويجيب فراشة وينام ماردتة ينام بغرفتهة ،، خاف يتذكرهة ،، ومنو يكول هو اصلا ناسيهة
فتت للغرفة مااعرف شكد مر من الوقت يلله نمت
كعدت الصبح لكيتة يطكطك بالمطبخ جان محضر الريوك ومتسوك كل شي للبيت ممبقي شي من اكل وفواكه ومنظفات
- صباح الخير
- صباحو لولة شلونج اليوم
- الحمد لله ، محسيت عليك شوكت طلعت للسوك
- والله كعدت من وقت البيت فارغ كل شي مابي
گلت اخاف تگعد ايلاف وتعد وتصف علية مثل البارحة مابية حيل
- ها ،، هاي اني
- ههههههه يلله عيني حطي الريوگ لزوجج ميت من الجوع
اول مرة احس بمعنى كلمة زوجج ،، اي انت زوجي ياريت تحس انت بهالكلمة والي تعنيهة شنو
- تدلل
هو چان محضر كل شي بس صبيت چاي وكعدنة ناكل
سمعت صوت ملاك راح هو جابهة واجة گال لزميهة باعي شنو جبتلهة ،، جان جايبلهة كرسي ركبنا وكعدناهة يمنة عالميز وبديت اطعمهة وهي تسوي حركات صدك الطفل ينسيك كل همومك
معتز راح للغرفة واجة مبدل
- ايلاف اني عندي شغل بالشركة يمكن للظهر يلله اجي ،، واذا تاخرت عود اخابرج تتحضرين حتى نروح نجيب الغرفة
- ماشي
سبحت ملوكة ونيمتهة وبديت اشتغل لفيت دولمة وحطيتهة عالنار
وبديت انظف البيت بس غرفتة مكدرت ادخللهة مااعرف شكد حاولت يادوب فتحت الباب اختنگت
دااسد الباب وانتبهت الصورة ماكو
باوعت لكيتة شايلهة تجرئت ورحت للكنتور فتحتة لكيتة فارغ كل شي مابي
بس باب وحدة بيهة ملابسة والباقي كلة فارغ حتى المجارير والكومديات مببقي اي شي يخصهة بداخلي كلش ارتاحيت يمكن هاية بداية خير
سديت الباب وطلعت
رتبت الغراض باماكنهم ولكيت مبخرة وبخور شغلتهة واتذكرت الطفلة وطفيتهة
اجة معتز دخل من الباب گال
- لج عبالك داخل لبيت اهلي شنو هالريحة التموت
- الله يساعدك ،، ترى اني طبخي هواية يشبه طبخ امي لان هي العلمتني كل شي
- اي امي اكلهة لا يعلى علي ّ
- فوت غير ملابسك حتى ناكل
- ماشي
رتبت الاكل عالسفرة ومن كل گلبي چنت اشتغل وقررت بيني وبين نفسي اسمع كلام سمر واني اخلي يتغير واخلي يتعود علية ويحبني ويطلع من غرورة وكبريائة
اجة وكعد عالميز باوع على الاكل وترتيبة حسيت نظرة اعجاب بعيونة
- باع الدولمة شلون مايعة ،، صدك دولمة امي هاي خلي اخابرهة واراويهة
- الو هلو حجية شلونج راح افتحلج كاميرا باعي ابداعات الوفة
اني رحت جبت ملاك وخليتهة بالكرسي ويانة عالميز
- هلو ماما شلونج حبيبتي مشتاقتلكم
- هلا حبيبتي فدوة لوجهج الحلو ،، شلونج يوم مرتاحة
- الحمد لله بخير
- لج هلا بالخليجية ،، رحتي اجيتي !! طلعج اخوية لا
- هلو سمورة حبي .. بعدنة هستونة ياالله نرتاح وبعدين نطلع
- يلله يوم كملو غداكم برد ،، ترى ايلاف نفسهة بالطبخ يخبل ياماما دير بالك عليهة مااوصيك
- بعيوني يوم
اتغدينة وكل سا يگلي عاشت ايدج كملنة وكمت دااغسل المواعين گال
- ايلاف روحي بدلي انتي وايلاف اني اغسلهم،،
- لا شلون ترهم هسة اكمل عالسريع وابدل
- ترى اني متعود عالغربة وكل شي جنت اسوي وحدي ،، بس مو تحجين كدام اخواني اموتج هههههه
- ههههه ماشي
رحت بدلت لملوكة ،، ولبست بنطرون اسود وقميص مقلم اسود وابيض وسترة قصيرة حمرة
حطيت كحل اسود وحمرة خفيفة رفعت شعري وحطيتلة ماشات وخليت نصة مفتوح اخذت ملاك وطلعتلة لكيتة مبدل
باوعلي گال يلله
ركبت بالسيارة وظلينة نفتر بالسيارة واباع على البنايات العالية والجمال وهو يشرحلي على المناطق وملوكة كعدناهة بالكرسي ربطنا بالكشن للخلفي وكل سا اندار عليهة اباعلهة
وصلنة لمول رصف السيارة ونزلنة خلينة ملوكة بالعربة وظلينة نتمشى وصلنة لطابق الاثاث شفت هواية اخر شي اختاريت غرفة مرتبة لونهة ذهبي ومبطنة بقديفة وردي وصخ چانت نازكة وجميلة بشكل گال تعالي لقسم الاطفال نختار لملوكة غرفة
اختارينالهة غرفة همين لونهة وردي تجنن حجزناهم وگالو توصلنة باجر بعدين صعدنة قسم المفروشات اخذت فرشة وبردات وچراچف كملنة كل شي وصعدنة نتعشى
رجعنة للبيت واني كلش مرتاحة وفرحانة ومتحمسة تجي الغرفة حتى نرجع ننام سوى بنفس الفراش حتى لو ميتقربلي اني قابلة بس المهم اسمع صوت نفسة يمي تسوى عندي الدنيا
رحت للغرفة وكتلة تصبح على خير
- هاي شنو حتنامين
- اي ملوكة نعست ،، وباجر ورانة هواية شغل
- ماشي عيني ماشي روحي نامي
حسيتة ضاج بس غلست اشرب شوية يامعتز من نفس الكاس الي سگيتني منة
كعدت الصبح من وكت وحضرت الريوگ وكعدتة اجة كعد يمي ورة شوية دگ الجرس شفت بالكاميرات عمال بنگلادش جايين راح عليهم معتز فوتهم للغرفة طلعو الغرفة وحملوهة وطلعوهة وحطوهة بسيارة واخذوهة
- معتز وين اخذو الغرفة
- اتصدقت بيهة لناس معتازين
- اها
- يلله حبي نظفي الغرفة قبل ليجيبون الاخشاب
حبي !!!!!!! اه يامعتز لو تدري شگد چنت انتظر هاي الكلمة يمكن عمري كلة چنت انتظرهة اروح فدوة لحلگك النطقهة
- ايلاف وين صفنتي
- ها اي صار
كمت عليهة نظفتهة وسعفتهة ومسحت الجام مبقيت شي صارت تلمع
ورة ساعة جابو الغرفة وبدو ينصبوهة طلعت الغرفة تجنن ،، صدك عجبتني ،، طلعو وطلع معتز صار عندة شغل مسحتهة ورتبتهة وفرشت الفرشة وعلگت البردات
يارب اجعلهة فاتحة خير بحياتنة وخلي من اليوم تبدي سعادتنة
حولت على غرفة ملاك هم رتبتهة بعد منصبوهة العمال حطيتهة بفراشهة وشغلت النشرات
وحطيت الجهاز يم راسهة حتى اسمعهة اذا بجت
خابرني معتز كال لتسوين غدة اني راح اجيب
فتت سبحت وسشورت شعري وحطيت مكياج ولبست فستان اشبه بثوم النوم خفيف ومخصر وقصير فوك الركبة
وعطرت نفسي وعطرت البيت
كلت بداخل نفسي اريد اشوف بلله شلون راح يصبر اكثر
كعدت على القنفة بالهول اباع على التلفزيون
سمعت صوت سيارتة سويت نفسي نايمة
دخل وحسيت واكف قريب مني طول بوگفتة واني گوة لازمة نفسي تالي تحرك گال
- ايلاف !! نايمة !!
- ها معتز شوكت اجيت
- يلله كومي دناكل
مد ايدة ولزم ايدي كومني عفتة على راحتة
- كملتي الغرفة
- اي روح شوفهة
- لا تعالي انتي راوينياهة
- اوكي
بقى لازم ايدي ودخلنة للغرفة
كال صارت كلش حلوة ،، دااشوفج بيهة ايلاف بيومين بس خليتي البيت كلة يشبهج
كل مكان بهالبيت بي لمساتج ،، ذوقج حلو ،، وكلش مرتبة انتي ،، واني تعجبني المرة المرتبة
عاشت ايدج
- شكرا خجلتني
تقرب مني وباسني من كصتي
- ان شاء الله تكون عتبتهة خير علينة
باوعت بعينة وكتلة
- ان شاء الله
بقى يباوع بعيوني ونظرتة تغيرت وايدة الي لازمة ايدي كامت ترجف ونفسة علة
وبصوت ناصي كال
- ايلاف ،،اني ....
چان نسمع صوت ملاك من الجهاز تبجي
بسرعة عفتة وطلعت رحتلهة
طول يلله طلع وراية اجة مبدل ملابسة وسابح
طلعت الاكل جان جايب قوزي رتبتة عالميز وكعدنة ناكل
ورة الغدة كعدنة نتفرج تلفزيون ونسولف مواضيع عامة ونلعب وية ملوكة
- ايلاف تعرفين تسوقين
- اي عندي حتى اجازة سوق
- صدك ؟؟
- اي والله لان ردت اشتري سيارة قبل متجي انت للعراق وبعد اتأجل الموضوع
- طيب ،، احب المرة الي تسوق ،، حتى اذا تضوجين او اني مموجود تاخذين السيارة واطلعين بعد ماتندلين الطرف
لان اني مااخذ السيارة للدوام ،، يجيني سايق
- ماشي
- يلله كومو غيرو ملابسكم خلي افركم بالسيارة
بسرعة بدلت لبست جينز وقميص ابيض طبعا بالحمام بدلت طلعت لكيتة
هوهم لابس جينز وبدي ابيض
- هاي شنو متفقين
- هههههههه حلبس ملوكة همين نفسنة
- ههههه
افترينة بالسيارة واكلنة لفات واحنة نفتر ملاك گضتهة نايمة رجعنة للبيت وديت ملاك لفراشهة وشغلت الجهاز
ورحت للغرفة ،، خفت ادخل مااعرف شصار بية سميت بالرحمن وفتت
دخلت لكيتة مبدل وباقي بس بالشورت ومتمدد على الفراش يلعب بفونة
اخذت من الكنتور ثوب نوم اسود ربع ردن وگصيف وقصير فوگ الركبة ودلعتة شوية عريضة وحطيت عطر وشوية طوخت الحمرة
اجيت وكفت گبالة منطيتة ظهري ،، سويت نفسي اطلع شي من الكنتور تالي سديتة واجيت على الفراش جبت الكريم وظليت ادهن ايدي ورجلي حسيتة كام يتحرك
- ايلاف
انداريت
- نعم
- حتنامين !!
- اي ،، محتاج شي
سكت
رجعت الكريم مكانة وحطيت راسي عالمخدة دااتغطى
كام من مكانة واندار من الجهة اللخ كعد على طرف السرير قريب علية ولزم ايدي
- يعني غرفة جديدة ووردي ومسويتلي هاي الاجواء كلهة وتريدين تنامين
چنت حاطة شموع معطرة وورد مجفف على طبلة جانبية بالغرفة وشغلتهم قبل لا اودي ملاك
- لعد شسوي
- كومي اوكفي ،، اتقرب مني كمت وكفت وهو همين وكف كال ايلاف عطرج ذبحني ،، وين مااروح اشتمة حتى بأيدي موجود
ايلاف اريدج تقرب مني اكثر وباسني من راسي ونزل على خدي وايدي تعصر بجسمي حيل تالي خلاني على الفراش ونمنة ..........
- حبيبتي ايلاف خو ما اذيتج
مااكدر اجاوب من المستحى من الالم شگد مچان رقيق وياية بس تئذيت
- الوفة كومي سبحي واني اسبح وراج
- ماشي
فتت للحمام واني اسعد وحدة بالدنيا ،، كملت وطلعت سمعتة يحجي بالتلفون
- الله يبارك بيك عمو ،، هلا بيكم تشرفون
لا والله تجون تشوفوهة اهلا وسهلا ،، بس مال تاخذوهة يمكم كم يوم لاعمو اعذرني مااكدر افارگهة ،، رجاءا عمي هذا الموضوع مابي نقاش
براحتك سوي الي تريدة
فتت للغرفة لگيتة صاير نار
- معتز شبيك
- ملاك ،،، اهلهة يردوهة ..............