ياقدري واحلى قدر

النهاية

- معتز مخطووف
- انتي شدتحجي سلام ،، الله يخليك گول غيرهة
يعني شنو مخطوف وشلون عرفتو
- ايلاف هسة اتصلو علينة وبلغونة انو هو مخطوف اول مطالع من المطار ماخذي وهسة تسامو وية مرتضى وطلبو فلوس خلال يومين لازم ندبرهم
- يمة سودة بوجهي ،، سلام اني اليوم احجز واجي ،، يمة راح اتخبل ،،
- لتجين ايلاف جيتچ مابيهة فائدة ابقي بمكانج واني انطيج الاخبار ،، ان شاء الله ندبر المبلغ هاليومين وننطيهم ،، بس كون الله يطلعون اشراف ويطلقون سراحة
واسمع مرة عمي تصرخ
يمة ايلاف راح ابني اخذو الميخافون من الله
يمة ابني جوعان بردان ،، سودة بوجهي يووم
سديت التلفون وظليت اصرخ من كل گلبي ربي ساعدني ،، ربي ردة الي ربي مالي غيرة
ربي لاتحرمني منة وتيتمني من جديد
كمت الطم على وجهي حيل واملخ بروحي لحد مادخت ووگعت وماحسيت بشي
مااعرف شگد مر من الوقت واني مغمي علية اجة بذاني صوت معتز يگلي الوفة وينج
واريد اجاوبة واتذكرت معتز مخطوف هناك وسمعت صوت بچي مخنوگ
ملاك
كمت كوة والزم بالحيطان
ياربي شبية اني شديصير بية هسة مو وكتهة لازم اكون قوية لخاطر ملاك
رحت لگيتهة طاگة من البچي وصوتهة مخنوك
تعبانة هلگد مباچية
شلتهة وحطيتهة على صدري وظليت ابچي وياهة
ربي لخاطرنة احنة يتامى وهو ابونة
لاتحرمنة من دخلتة علينة
اجت ابالي شغلة الفلوس وحجاية سلام ندبرهم
كمت وخابرت على مرتضى
- الو ايلاف
- مرتضى ابوس رجلك راح اگلك شغلة ولتناقشني بيهة
- شنو ايلاف احجي
- باجر من الصبح تاخذ الوكالة الي مسويتهة اني لعمي وتروح تبيع البيت مال اهلي شگد ميجيب بيعة وترجعلي معتز
فدوة اروحلك رجعليا ،، اذا مو لخاطري لخاطر بنته
- والله ياايلاف انتي بنت اوادم وتربية ابوية ماضاعت وياج
- مرتضى هذا رجلي وحزام ظهري
اروح فدوة الك اخاف عمي ميقبل معليك بي
اني شسوي بالفلوس عندي خير من الله
اهم شي يرجعلي رجلي
والله دااموت هنا وحدي
مااعرف شيوي
- الله كريم ايلاف اهم شي اريدج تكونين قوية ولتنهارين لتخلين بالنة يمج كافي الي احنة بي وكافي علينة امي الي كل ساع راكضين بيهة للمستشفى
اهلي كبرو عشر سنين بهاليومين ياايلاف
لزمي القران وادعيلة هذا احسن شي تسوي
گعدت حطيت السجادة وظليت اقرة قرأن وادعي لحد مطلع الصبح وكل سا اخابر ومحد ينطيني جواب يشفي گلبي
مرت يومين من اسوءايام حياتي
وظلو يتساموون وياهم لحد متفقو على مكان يحطون الفلوس بي
الي عرفتة كل يوم ينطوهم مكان ويرحون يكوللوهم لا غيرة
خبلونة وجزعونة
بهاليومين زادت عندي الدوخة وظليت كل ساعة افقد الوعي خفت على ملاك ليصير بيهة شي
مخفت على روحي
اخذت ملاك وحطيتهة بالسيارة ورحت على بيت اهل رسل
طلعتلي مرة ابوهة
- السلام عليكم
- وعليكم السلام ياهلا ،، منهو انتي يابنيتي
- اني زوجة معتز
- ياهلا فيچ تفضلي
- لا خالة اني مجاية اتفضل ،، معتز مسافر لبغداد واني مضطرة اروح للمستشفى ومااكدر اخذ ملاك وياية ممكن تبقى يمكم شغلة ساعة وارجع
- حاضر يابنيتي تامرين
عسى مافيچ شي
- لا خالة مابية شي تسلمين
رحت للسيارة وانطيتهة ملاك
- تبين اروح معاج ،، ترى ماعندي شي ونحط هالياهل مع ام محمد
لزمتني العبرة صدك الله ميگطع
- تسلمين خالة
صعدت بالسيارة ورحت للمستشفى حجيتلهم حالتي وسوولي فحوصات وتحاليل وبقيت انتظر بصالة الانتظار
سمعت اسمي گمت
- ايلاف احمد
- نعم
- مبروك حامل
ساعتهة مااعرف شلون اوصف الشعور لابية افرح ولابية ابچي
چانت اكبر امنياتي يصير عندي طفل من معتز
ياربي كمل فرحتي ورجعة الي ولجهالة
يارب بحق حبيبك النبي
ردلي معتز
وديت التحليل للدكتورة
كالت حملج ضعيف كلش واحتمال تخسري ومشكل عندي ضغط
كتبتلي مقويات وكالت اهم شي الراحة والاكل
طلعت ووعدت نفسي اصير قوية لخاطر جهالي
اي جهالي الله دزلي ملاك سبب حتى يصيرلي معتز
وهسة راح يجي الرابط الي يوثق عائلتنة
رجعت جبت ملاك واني احساسي غير
حسيت بمعتز راح يرجع لجهالة راح يفتح علينة الباب وافرحة
راح اعترف واكلة احبك
ميخالف معتز رزلني واحجي علية وشتريد تسوي بية قابلة بس ارجع
اول مرجعت اتصلت بمرتضى وطلعتلي نور
- الله يساعد گلبج ايلاف شلون باقية وحدج
احنة هنا ملمومين وواحد يواسي الثاني
- احجي نور معتز صار علي شي
- لا ماكو شي مندري شي ايلاف
وسمعت سمر عاطت بيهة
- لج انتي متعرفين تحجين حتخبليهة فوك قهرهة جيبي التلفون
- ها ياعمري شلونج
ايلاف لتخافين ماكو شي لحد الان
راح اليوم يسلموهم الفلوس
وكالو ورة ساعتين ابنكم يرجعلكم
- سمر ،، انهد حيلي ياسمر
مااعرف شسوي
- لتبچين يروحي ،، ادعيلة حبيبتي ربي يفك اسرة
اروحلج فدوة لتبجين
الساعتين مرت علية سنتين كل سا اخابرهم
حطيت السجادة والقران وبديت اقرة وابجي
الهي يامن رددت يوسف على يعقوب
ردلي معتز سالم
يامن اخرجت يونس من بطن الحوت
اخرج معتز من الضيق
يامن انقذت محمد بغشاء العنكبوت
انقذلي زوجي وحبيبي
دگ التلفون وگلبي دگ ويا ولزمتني الرجفة كوة دست الاوكي وجاوبت
- ايلاف
ظليت اصرخ بكل قوتي وابجي مااكدر اجاوب
اخخخخخخخ يا نسمة هوى بردت روحي
اخ ياصوتة العذب داوى كل جروحي
حبيبي ياروحي رحت فدوة لصوتك انت عايش ومابيك شي اخ ياعمري
- ايلاف حبيبتي لتبچين مابية شي والله
حبيبتي سكتي كافي والله زين
وهاي اني بنص اهلي
ايلاف ملاك شلونهة
- حبيبي لتخاف عليهة حطيتهة بنص گلبي
ارجعلنة سالم ياعمري لتشغل بالك
- بس ارتاح ارجعلكم حبيبتي لتجين انتي
- المهم انت سالم وراسك يشم الهوى
مااريد شي ابقى على راحتك
- يلله حبي اروح اني يمي عالم
كعدت بالگاع وسجدت لربي اشكرة
رحت للثلاجة وطلعت اكل وظليت اكل هسة يلله حسيت بالجوع
صار ايام ناسية نفسي وناسية الجوع
مر اربع ايام واني يومية اتصل علي ونحجي اني ويا ونسولف واطمن علي ويطمن علية
غيرت بالبيت ورتبته ويومية اسوي اكلة يحبهة واضمهة لحد ميجي
وبيوم جنت نايمة حسيت بدفو وايدين لزمتني فتحت عيوني وردت اعيط
حط ايدة على حلگي
- اش اش يمعودة لتكعد ملاك
- معتز يا گلبي شبگتة حيلللللل وبقيت اشم بي
ليش مكتلي راح تجي
- ردت اسويهة مفاجئة صار ساعة من وصلت وملاك قبلج تلگتني وبوستهة ولعبت وياهة وانتي نايمة
انتظرتج تگعدين تالي مليت واجيت اكعدج
كلت والله خوش حارس خال بالبيت
الحرامي يفوت يبوك وياخذ راحتة وانتي محاسة
- هههههههه والله دااعوض النوم الفقدتة بسببك
الحمد لله من الله رجعك سالم النة والله ردت اموت
- ايلاف بالنسبة للبيت
خليت ايدي على حلگة
- بروح ابوية ممحتاجتة محتاجتك اكثر منة انت سندي ومالي وحزام ظهري
مرايدة من الدنيا غيرك
- الله الله شو جديد هالكلام ،، لو ادري من اول مخطوف حتى الله يهديج وتكومين تحجين هيج وياية
رغم هذا حبيبتي هذا تذكار من اهلج مو لازم تفرطين بي لازم احاول ارجعة الج
ترى اني عندي فلوس بس ممسوي وكالة لاحد حتى يسحب
لهذا اهلي حارو شلون يدبروهة
ولد الكلب عساهم ميتهنون
- فدوة الك حبيبي المهم سلامتك
الله عليك خو ماضربوك اذوك
- لا بالعكس محد لزملي طرف خلوني بغرفة وكل سا يجيبولي اكل وجگاير بس محد يحجي وياية وملثمين
- يمة تنذكر ومتنعاد ان شاء الله عمري
- كوم اسويلك اكل اكيد جوعان
- لا مجوعان بس اريد افهم
- تفهم شنو ؟؟
- هذا
واشر على گلبي
-كلماتج طالعة منة
لو بس خوف علية
- معتز لتخجلني
- لچ شنو اخجلچ ايلاف
اني زوجچ وانتي زوجتي وروحي وحبيبتي
حبيتچ من اول لحظة وگعت عيوني عليج بعد كل هالسنين الي عفتكم بيهة
عفتچ طفلة ورجعتيلي مرة كاملة كلهة جمال وانوثة
تصدگين لو اگلج گلبي دگ الج بيوم زواجي
وحتى رسل حست علية
كل سا اباع عليج وتخبلت من شفتج واكفة بين الي يركصون
حاولت انساچ مكدرت لكن اتناسيتج والتهيت بمرض رسل وقبل لتموت گالتلي
اني اعرف انو انت محبيتني رغم كل محاولاتي
لكن اذا كان عندي معزة عندك اذا اموت اريدك تتزوج بنت عمك ايلاف
- يمكن چانت حاسة بية وعرفت شعوري قبل لا اني اعرفة
ومن رجعت لبغداد وشفتج من تروحين للكلية وترجعين وملابسج وماخذة راحتج على الاخير
كلت لا اكيد اكو واحد بحياتهة
وبقيت اراقبج واجي للكلية
خبلتيني ورجعتيني مراهق
وين متروحين جنت اراقبج وسئلت عليج الكلية كلهة
لحد مطلعلي هذا المصخم اثير
هنا ردت اموت
واضطريت امثل دور خطيبج
وعجبني الدور وحطيتج كدام الامر الواقع
حتى ماانطيج وقت تفكرين او فرصة بيهة ترفضين
وتحججت بملاك وحبهة الج
- اذا هلگد تحبني ،، لعد ليش بيوم عرسنة م....
- متقربتلج ؟؟؟ حسيت بالندم
حسيت نفسي ظلمتج خصوصا من شفتج تمرضتي وكل مااشوفج تبجين جنت اموت لهذا چان دائما يطلع مني اسوء ماعندي
تصرفات بعمري ماسويتهة وية احد
- بس اني مجنت ابجي لان مااريد اتزوجك ؟؟
چنت ابچي لان كل متحجي تحسسني انو زواجنة بس لاجل ملاك
ماكو اي مشاعر
اي اهتمام
وحسيت انو مشاعرك دفنتهة وية زوجتك
محسيت منك بكل هذا الي دتگولهة
وخصوصا بيوم زواجنة
چان الطامة الكبرى
حسيت انو انت ابد مطايقني
وانو تندمت على زواجنة
- وهذا الشي اذاچ
- معتز انت اول شخص حبيته بحياتي
انت اول انسان يفتح عذرية گلبي ويدخل بي
حبيتك واني عمري ١٣ سنة
وبقيت عايشة على هذا الحب
نمى بگلبي وية نمو جسمي
كبرت واني بنيت جدار سميك حول نفسي اسمة معتز
محد يگدر يخترقة
ويوم زواجة چان موتي
متت الف موتة من اشوفك صرت مو الي
مع هذا مكدرت انساك ولاكدرت ادخل احد مكانك
تعبت من حبك ودعيت من الله
بس كون تطلع من گلبي
والنتيجة چانت العكس
كل يوم احبك اكثر
ومن رجعت يمنة جان العذاب بالنسبةالي
وجنت اصب هذا الحب بمحبتي لملوكة
- ياحبيبتي كل هذا بگلبج وساكتة هالسنين كلهة
اوعدج ياعمري اعوضج عن كل هاي الايام
الي اذيتج بيهة
بس والله موبيدي احبج واغار عليج
- مو مهم ياعمري المهم تحبني وهذا اكثر شي تمنيته بحياتي
حضني وحضنتة وخلينة عيوننة ودگات گلوبنة تعاتب بعضهة وتفرغ الي بيهة
من محبة وشوق ورغبة
بچت ملوكة كمت بسرعة افترت الدنيا بية
لزمني معتز
- الله الله حبيبتي شبيج ؟
الوفة شگد ضعفانة اكيد متاكلين
على كيفج من تكومين
- معتز اكو شي ابطني هو الي مديخليني اكل زين
- شنوة حياتي اخذج باجر للمستشفى
- لا عزوز رحت للمستشفى
- اي وشنو طلع
- طلع ... ابنة وكيح ومئذيني ومتعبني
- شنو ؟؟ الوف انتي حامل!!!
هههههه حبيبتي الحمد لله ان شاء الله تكومين بالسلامة
ايلاف الله عليج اريد ولد حتى اسمي ادم
- ههههههه حبيبي الي يجي من الله نعِم الله
المهم يجي سالم
- ان شاء الله
__________________
النهايــــــــــــــــة
اعذروني لان تأخرت عليكم
بس صارتلي ظروف
اتمنى عجبتكم قصتي المتواضعة
وعذروني عن الاخطاء
اول مرة اكتب
محبتي الكم
وشكرا للتشجيع
❤️shahaoflove❤️