ياقدري واحلى قدر

الجزء الثالث عشر

- كليلهم ماكو عرس والعروس بطلت تتزوج ،، مااريدة ،، سمر تعبت
- اتعوذي من الشيطان ،، واستهدي برحمانج ياعمري ساعة عصبية ،، والله مو دفاعاً عنة بس هو هالفترة مضغوط منا شغلة ومنا بنتة وزواجكم السريع
- واني شنوذنبي ؟؟
- مرتة ،، والمرة لازم تتحمل رجلهة ، اذا چانت تحبة
- سمر ...
- ايلاف اني ادري بيج تحبي ومن زمان وچنت اتمنى تجين تحجيلي ،، بس انتي كلش كتومة
سمر دامچ تحبي تحملي وصدگيني مو لان اخوية
بس معتز شايل گلب ،، چذب اكو مثلة
بس هو الضغط الي صاير عليّ ديخلي هيج يتصرف
- شنو الفايدة احبة ،، وهو كلمة حب وحدة مطلعت منة
يعني طول مااني گاعدة بالصالون اتخيل شراح يگلي من يشوفني ،، وياترى راح اعجبة لو لا
وتالي شفتي شسوة
- يجوز حبچ ولهذا هو ديكابر وميريد يعترف بهذا الشي لهذا ديتصرف وياج هيج ،، انتي اذا شاطرة راح تخلي يطلع من كبريائة ،، لولو انتي اختي وداعتج لو ادري بي يئذيج چان اني اول وحدة اعترضت على زواجكم ،، بس صبري علي دامج تحبي
سكتت مااعرف شجاوبهة ،، يجوز حجيهة صحيح ،، بس على هالحجي يرادلي صبر ايوب واني من هسة خلص صبري
- يلله الوفة راح انزل عدلي مكياجج ونزلي وراية عيب من العالم حبيبتي لتنزلين راس ابونة كدام هالناس
اتعوذت من الشيطان وعدلت مكياجي ونزلت وبدت الهلاهل رحت گعدت بالصالة وجتي خالتي اخت امي بخرتني
- فدوة لهالوجه يمة ،، عبالك دااشوف امچ نفس الوجه والنزاكة
- صدك خالة لهالدرجة اشبهة
- والله عيناً عبالك انعادت السنين كدام عيني ودااشوف امچ عروسة
دمعت عيوني وبهالحظة دخل معتز من شفتة زادت دموعي
- سودة بوجهي شجاني وهيج حجيت ياعمري دنطيني بوسة من فدوة رحت لهالوجه
مسحت دموعي وشفتة يباع علية وراح ورة شوية اجتي سمر گالت تحضري راح يزفوج فات معتز وجماعتة وعمامي وخوالي وولدهم وكلهم يركصون والنسوان تهلهل
اجة وگف يمي شوفتة ترد روحي والة بگلبي دگة خاصة كل ما يوگف گبالي
وكف يمي ورفع البرگع وباسني من گصتي رجفت بأيدة چنهة مو شفتة على گصتي چنهة جمرة وچوت جلدي
وكعدنة وكلهة تهوس وترگص ،، تعشو المعازيم واني مانطقت ولا كلمة بس اباوع بالوجوه،، بساعتهة بس حسيت بروحي يتيمة كل هالناس الي تقربلي ،، لكن ماكو امي الي تحضني بدموعهة قبل لا اطلع من بيتهة
ولا ابوية الي يلزم ايد زوجي ويوصي علية ويهددة اذا يزعلني ياخذني منة
حسيت بأيد ادغني رفعت وجهي گال يلله گومي لزمني من ايدي وگومني
ركبت بالسيارة هو يسوق واني بصفة چانت سيارة معتز سودة ومزينيهة بورد احمر
اول مشغل السيارة اشتغلت اغاني مشينة بالسيارة واحنة ثنينة ساكتين والسيارات داير مدايرنة كلهة اطوط وولد عمي يرگصون وصلونة للمصور اخذنة كم صورة واحنة مثل اللعابات شلون ميگلنة المصور نتحرك بدون احساس بدون شعور بس مجرد تمثيل وراهة
وصلونة للفندق
ودعنة الكل وصعدنة وصعدت مرة عمي وسمر ويانة
رتبو غراضنة وحطولنة العشة وبوسونة وراحو
كعدت عالفراش حواسي كلهة تخدرت حتى گمت مااعرف شدااحس يمكن لان حتى ملحكت افكر بهالليلة
معتز نزع سترتة وخلاهة عالكرسي چانت غرفة الفندق سويت هو گعد بالاستقبال واني گعدت بالغرفة بقيت كاعدة انتظر تالي كمت افتح بالتسريحة واذب الماشات وبعدين فتت للحمام
البدلة چان بيهة من ورة قيطان يصغر ويكبر
سمر شدتة اريد افتحة مينفتح
ياربي هاي شلون ورطة ،، لابية اصيحة ولابية اسكت ،، چنت اشوف هاي المواقف دائما تصير بالافلام بس مو وكتهة هسة تصير بية
ظليت ساكنة الحمام ،، مااعرف شگد مر من الوقت واني احاول افتحة متت حر
اندگت الباب
- ايلاف شدسوين صار ساعة
مجاوبتة
رجع دگ الباب
- ايلاف بيچ شي احجي
- لا مابية
- لعد شدسوين ،، بلله فتحي الباب
- هسة بس دقايق
- كتلج فتحي الباب
فتحتة ،، شافني صايرة حمرة وعرگانة
دخيل الله شردتي تسويين بروحج-
- شنو شسوي بروحي قابل راح انتحر ،، كل القصة ال ....
- الشنو ؟؟؟
- معتز تكدر ؟؟
- احجي مو فتيتي گلبي
- عفية تكدر تفتحلي القيطان من ورة مدااكدر افتحة
- بس هاي وصار ساعة تمتمتين چنچ مكينة مجيمة شو انداري
انداريت وايدة تفتح بالقيطان ونفسة عالي وكل ميطخ جسمي
انتفض وروحي تفرفح اووف ياسمر شورطتيني هالورطة
- هاي منو شدلچيا هيج بشرفج هاي شدة ،، يلله انفتح تريدين انزعج البدلة
اني گمزت
- لالا شكرا اني انزعهة ،، وركضت للحمام
ادري بي حجاهة من باب المساعدة وماعندة غرض ثاني بس مو بيدي خجلت وخدودي صارن حمر
بدلت لبست السيت الابيض چان قطعتين الجوة چان ثوب نوم طويل ومخصر من فوگ جان دانتيل ومن جوة بي چاكة طويلة كلش وفوگا روب شفاف ردن ورداناتة عريضة
فتحت شعري ومشطتة وحطيت عطر وطلعت ملگيتة بالغرفة بس لكيت قميصة ذابة عالفراش ظليت اروح واجي بالغرفة تالي متحملت رحت لگيتة كاعد عالكرسي ومغمض عينة يمكن نايم صدك وصلت حدهة عندي وبعد متحملت يعني لهالدرجة توصل ،، چنت اسمع ليلة العرس احلى شي عند المتزوجين الهة نكهة خاصة وحلوة
اني اتزوهرت بيهة من بدايتهة لحد هسة ،، يمكن جانت من اسوء ايام حياتي
احترگ گلبي واخر شي قررت اتجاهلة مثل مامتجاهلني رحت للفراش حطيت راسي ونمت مرات من القهر يتخدر عندك الشعور وتريد بس تنام وهذا الي صار بية غمضت عيوني ونمت يمكن ورة فترة حسيت الفراش انهز بس مابية افتح عيوني وبعدين صار هدوء ورجعت غفيت
فزيت الصبح واول مفتحت عيوني باوعت للسگف ؟؟ اني وين ؟؟ هاي اول اكعد واني مو بفراشي ،، شوية شوية رجع عقلي يصورلس الحقيقة انو اني اتزوجت وزوجني رفضني بليلة عرسي انداريت وشفتة نايم ومغطي نص جسمة والگلادة برگبتة بس هاي عشق من نوع ثاني
ظليت اباوعلة واتأملة بهاللحظة فتح عيونة حرت وين اودي عيوني كلش انحرجت
- صباح الخير
- صباح النور
- ابيش الساعة
- مااعرف هسة كعدت
- يلله كومي بدلي حتى ننزل نتريگ
- ماشي
گمت شفتة بالمراية ديباع علية اتعمدت ابقى ادور على فد شي بميز التواليت حتى يحترگ گلبة من يشوفني بهالملابس وظليت كل ساع رايحة جاية وبقيت الروب مفتوح واني امشي رجلي كلهة تطلع
مااعرف منين جبت هالجرئة بس گلت خلي اعذبة
اخر شي حسيتة زفر زفرة قوية وگام دخل للحمام
بدلت ملابسي لبست بنطرون ابيض وسترة سمائي
وبديت امكيج ،، اجة وگف يمي گال
- كملتي
- اي تقريبا
بيت عمي ناس ميدخلون ويدققون بكل الامور يعني محد سئلتي عن يوم زواجي او شنو صار رجعنة للبيت وورة يومين سافرنة وطبعا بهاي اليومين ابد متقربلي وكلش چان قليل الكلام وياية طرنة وچانت ثاني سفرة الي بالطائرة واني كلش اخاف منهة لكن كبريائي مخلاني ابين هالشي لحد مهبطت الطيارة ختمت القران واتشاهدت وملوكة جانت بحضن ابوهة لان اكيد حس بخوفي
نزلنة ورحنة على بيت معتز
چان كلش حلو ومرتب بس حسيتة مو بيتي انعصرت روحي من فتت
حطينة الجنط واخذت ملاك وكعدت بالصالة
صاحني معتز كال
- ايلاف تعالي ادليج الغرفة حتى تبدلين انت وملاك
گمت ورا شال جنطتي وفتح الضوة دخلت شفت غرفة كلش راقية ومرتبة لونهة اسود وابيض
وفجأة صارت صورة زواجهة گبالي اخذت ملاك وبدون مقدمات عفت الغرفة وطلعت وظليت ارجف من الاعصاب مااعرف شلون اتصرف
اجة وراية
- ايلاف شبيج شكو
- شوف معتز اني تحملت وياك هواية ،، لا اخذت رأيي بزواج ولا بذهب وحتى ليلة عرسي مگضيتهة مثل العالم
اتحملت عصبيتك اوامرك ،، لا تشرطت ولا حجيت
بس لهنا وكافي ،، تريد تنيمني بغرفة زواجك من المرحومة لا والف لا مستحيل اتحمل
يااخي اني بشر من لحم ودم
اذا كل هذا موهامك على الاقل راعي حق اليتيم بية
كااااااافي تعبت متت بعد مااتحمل منك ولا اي تصرف
وبدون مااحس على نفسي ماعت روحي ووكعت بالگاع
...................................................