سارة - Sarah

الجزء 3

من نهار قررت نبدل راسي وانا مرتاحة و من نهار لبست حجابي كنحس راسي ملكة ... فلول كانو عواقب كتار فهاد البلد كلشي كيشوف فيا كانني غنقتلهوم مي متسوقتش ليهم ...
روبرت و مايك لي هما مساعيديا و كانو اصدقائي مبقاوش ولات معاملتنا غير فلخدمة و حتى يعقوب لي حسيت بنظرات ديالو تبدلات من نهار لبست حجابي مبقيتش كان كتر معاه واخا مسلم و ملتزم ... كيبقى راجل
و انا وعدت راسي ...نحافظ على العفة ديالي... ومانبغي تا واحد من غير لي مكتاب يكون راجلي...
صراحة ... بعدت على يعقوب حيت حسيت راسي معجبة بيه و كتر ملي كينصحني فدين... مي الصدمة لكبيرة فاش عرفت مشا خطب عائشة ):
و تما عرفت قصة د الاسلام ديالهم كانو بجوج ... كانو كيبغيو بعدياتهم قبل الاسلام و كانو كيبحثو ف دين بجوج حتال قتانعو و أسلموا... وتفارقوا ملي عرفو حرام تكون علاقة بيناتهم من غير الزواج و تواعدو باش يحافضو على راسهم حتال يمشي يخطبها...
قصتهم اترات فيا... برغم من إعجابي ب يعقوب... فرحت ل عائشة حيت هي صديقتي لي عاوناتني...
للأسف مانحدرش لعرسهم لي غيكون شهر جاي حيت خاصني نرجع المغرب...
خاصني نصلح علاقتي مع واليديا...
خاصني نصحح أخطائي...
عمي لي كنت عايشه معاه استغرب بزاااف التغير لي طرا عليا و قالي : انت عكس الناس ...كيجيو بنات محجبات و دايرين فيها مسلمات بوصلو هنا يحيدوه مي انت غيرتي الموازين غترجعي لبلادك و انت أجمل...
كلمات دخلات قلبي فرحت بزاااف حيت كان بحال بابا هنا واخا علاقتي ب بابا عمرو ماكانت مزيانه هو عاوني و مرفدش يساعدني ويعلمني اي حاجة بغيتها نهار لي مكتكونش معايا عائشة....
أنا متوترة بزااااف و فرحانة... خايفه من ردة فعل واليديا ملي يشوفوني ب لوك جديد و فرحانة حيت غنشوفهوم من بعد عام د لفراق ..
نخليكوم دابا ...وصلت المغرب
الله على ريحة بلادي توحشتها
خديت حوايجي وكنتمشى ف لمطار كنقلب على ماما وبابا فين نلقاهوم...
ها هوما لقيتهوم...
وقفت عليهوم ... عيني عامرين دموع ماعقلونيش
سارة (عنقت ماما وكنبكي) : ماماااا توحشتك بزااااااف
الأم : سارة بنتي حبيبتي... الله اكبر يا لحبيبة دياليي هادي نتيي.... كتباني بحال شي ملاك الغزالة ديالي...
من بعد تعناق طويل و لبكا لي مكيتقاداش
مشيت عند باباا لي كان واقف بعيد
مشيت عندو كنجري و عنقتو
سارة :ابا سمحلياااا سمحليااا بزاااف... تالدابة لي عرفت علاش كنتي تغوت عليا... على مصلحتي أنااا ... سمحلياا حيت عصيتك...غوت عليك وعصبتك....
الأب: يابنتي صافي باركا ... انا مسامح ليك... مسامح ليك... لمهم رديت بالك وفهمتي كلامنا...
كان تجمعنا كولو بكا و دحك طريق كلها كانعاود لهوم على كيدرت تبدلت و واعدتهم نعلموهم اي حاجة عرفتها جديدة...
وصلنا لدار عرفت بيلي لعائلة كلها مجمعة ... ماعرفت ردة فعلهم كي غتكون لمهم بسم الله
مع الدخلة د دار جا ولد خالي يعنقني و بعدت عليه انا : سلام محسن سمحليا مكنسلمش على الرجال 
محسن : هاي هاي مشيت لميريكان و رجعت فقيهة هههه واخا زيدي
دخلنا لدار و جاع لي كانو تما كيشوفو فيا بنظرات مختلفة شي كيقول سبحان الله يهدي من يشاء ... و شي كيشوف فيا بنظرات استحقار و كيقول دارت لحجاب باش تخبي فعايلها ):
*وقفة:المجتمع ديالنا مكيخلي حد ساكت و في بلادنا السعيدة أي حاجه درتيها را ماشي هي هاديك
ناخدو مثلا لبنت إلا كانت لابسة لباس بين قوسين (متبرجة) بنادم مكيعرفش غض البصر لا هو تم يتفرج و يقول ليك مامربياش ....
و من جهة اخرى إلا لبنت لابسة طويل و ساترة راسها و حتى فهاد الحالة بنادم حاديك كاين ليقول را معقدة و داكشي متخلف و لوقت تبدلات (هاد لوقت تبدلات خاصها جلسة طويلة) و كاين ليقول را داكشي غير مظاهر و باش تبان مؤمنة ...إلخ
إذن في جميع الحالات بنادم را يحديك يحديك دونك شنو تختاري انتي ؟
ليخاص تختاري هو ماشي ديري لحاجة حيت كلشي كيديرها او حيت بنادم غيشكرك او... لا خاصك ديري لترضي بها الله عز و جل و فهاد الحالة را باين شنو هو الاختيار المناسب و خا لمجتمع مكيساعدش.... *
ما تسوقتش لهدرة د لعائلة ديالي و أصدقائي لقدام لي تلاقيتهوم و رجاء منهم ... كلشي استهزء مني و عايرني و اعتبروني لابسة حجاب باش نخبي شي فضيحة درتها ... و بزاف قالو راها حاملة و بلا بلا... مارديت على حد و خليتهوم يهدرو...
بديت حياتي مع واليديا لي راضيين عليا و الدين ديالي لي كان حافظ عليه
ديما راني كنهدر مع عائشة لي توحشت الصحبة ديالها بزااف و را ها تزوجات وكتسلم عليكم...
من بعد أشهر من رجوعي من أمريكا وبحث طويل على لخدمة لقيت لخدمة لي بغيت و استقريت ... كان لمشكل ف شركات مكيبغيوش يخدموني رغم سي في ديالي لي عامر و إمكانيتي هو لباس يشوفوني لابسه عبايا و كيرفضوني بغاو هو تصويرة و دبكور فاش يتفرجو... الله يهدي ماخلق
مافقدتش الامل وديما كنت ندعي الله يجيب لي لي فيها الخير
تقبلت ف شركة من اكبر الشركات ف بلادنا وبديت فيها لخدمة و ماعندي تا مشكل...
كانت علاقتي مع الرجال محدودة و بزاف كيعيطولي غير لالا لحاجة و جوابي ديما كان : ياااه كنتمنى نحج دعيو معايا...
اما الناس لي كانو كيقولولي لحجاب كيبينك كبيرة إوا لبسي كسوة طويلة بدلي لعبايا...جوابي ليهوم كان : بصح انا كبيرة عند الله عز وجل حيت قربني ليه و ختارني نلبس حجاب ب شروطه
كلشي تاقلم مع شخصيتي جديدة واليديا تبدلو و عائلتي مابقاوش يهدرو و وليت مثل عند البعض و أعوذ بالله من الرياء ....
حياتي لحد لهنا تبدلات لأحسن كلشي كان مزيان ...
حتال واحد ليلة جلسات معايا ماما وقالت: بنتي سارة دابا انتي حمد لله ربي هداك و لخدمة لقيتيها و جاع لي بغيتي ربي عاونك و درتيها خاصك غير تسمعي هدرتي هاد لمرة و توافقي
سارة : علاياش نوافق ا ماما ؟
ماما: دابا انتي عندك 24 عام وهو سن لمناسب لزواج ... بلا ماتقولي تا حاجه راه ماكين تا سبب ترفضي وراجل كاين وباباك موافق خاصك غير تقبلي انتي
سارة : ماما... و لكن انا مابغيتش نتزوج بغيت نزيد نتعلم على الدين ديالي و مابغيت تا حاجة تلهيني (بدات تبكي)
ماما : بنتي حنا دابا كبرنا و ليوم حنا معاك و غدا الله اعلم
سارة : الله احفظكم ليا ماتقوليش هاكا
ماما : هادي سنة لحياة ا بنتي و انتي عارفة كتر مني... و زواج ماغيلهيكش على دينك بلعكس ... غاتعاونو بزوج باش توصل لداكشي لي بغيتو
سارة : ماما ... انتي عارفة بغيتو يكون ملتزم... كيصلي و...
ماما : سمعي ابنتي را باباك ماقبلو حتال عرف شنو فيه ...وراه ولد عمتك عبد الله
سارة : شنووو !!! لاا ا ماما انتي عارفاني كنت ديما كاندابز معاه و هو مكيحملنيش !!! كيفاش بغا يتزوجني
ماما : اشمن مكيحملكشي يا بنتي ... لمهم نودي استخيري و يكون خير عطيلو فرصة ياك انتي لي كتقولي "عسى ان تكره شيء و هو خير لكم"
سارة : واخا ا ماما غادي نصلي لاستخارة مي إلا مارتاحيتش غنرفضو
ماما : واخا ا لالا ... اه راه جايين غدا
سارة: يا ماما ديما كتصدميني ... خليهوم إجيو صافي
هدرت ماما صدماتني وحسساتني بيلي بابا قالهم راني موافقة صافي ...
ندت صليت ليلة كلها و انا كنستخير لعل الله يبعدو عليا إلا فيه شر...
فقت لغد ليه معطلة...
لبست فيساع و مشيت هابطة كنسمع ماما كاتقول وا اجي تاكلي را ماكليتي تا حاجه من لبارح...
ماسمعتش عندها و هبطت كنجري...
فواحد اللحظة تكربعت فعباياتي و حسيت راسي كنطير و طحت على شي حد و سخفت...
فقت فلبيت ديالي و ماما واقفة لي عند الراس....
سارة : شنو وقع لي ؟
ماما : وا نتي مكتسمعي لهدرة ما واكلة والو و كتجري من لفوق ... ربي ستر و جا عبد الله شدك... واخا قتلتيه فيدو هههه
سارة (تقلبات جهة لوخرى و هي تشوف عمتها حفيظة ماين عبد الله) : عمتي إمتى جيتي
عمتي حفيظة : ههه يالاه وصلنا واهنتي تشوفي جينا نشدوك لا طيحي ههههه
سارة : هههه شبعتو عليا دحك ياك (نادت و حسات لفولار طاحت) شكون حيدلي لفولار ماما؟
ماما : وانتي هاماك لفولار را كنتي كتموتي فكيتهالك انا و عبد الله غير حطك هنا و خرج ماتخافيش ... هاكي كولي دابا و سكتي
سارة : طلابتك اوامر ياست الكل ههه
بقيت كناكل وهوما خرجو سمعتهم كيهدرو مع عبد الله برا ... اووه اش هاد لموقف لي تحطيت فيه معاه
كملت قاديت لباسي و خديت صينية و خرجت ... لقيتهوم كاملين فلكوزينة
سارة : (ابتسامة خرجات بسيف) شكرا عبد الله رمز تعبيري (ماخلاتوش يرد عليها وقالت) ماما هاني مشيت را تعطلت
عمتي حفيظة : عبد الله ... ولدي سير وصل سارة لخدمة
سارة : لا بلاش ا عمتي نمشي بوحدي
عمتي حفيظة : سير انت معاها متسمعش عندها
عبد الله مادار حتى شي ردة فعل غير حرك راسو ب اه
مشينا هابطين فدروج ماهدرش معايا جاع
ملي وصلنا لشارع
عبد الله : اجي سيارتي راها لهيه
سارة : لا بلاش غنمشي ف طوبيس
عبد الله : كاينه سيارة علاش تمشي ف طوبيس ؟؟؟
سارة (تقلبات و بغات تمشي) : مانقدش نركب معاك بليز فهمني
عبد الله (بضحكة استهزاء ) : ههه موالفه طلعي غير مع صحابك و جايا ديري عليا أنا محترمة... ماشي عليا
سارة تقلبات عندو و عينيها عامرين دموع شافت فيه و مشات ركبات فطوبيس و هو تبعها دوزات نهار د لخدمة و ملي خرجات لقاتو كيتسناها عند لباب
رجعات لدار و هو موراها ماهدراتش جاع معاه
دخلات لقات واليديها و عمتها جالسين مجمعين غير دخلنا وهوما يطلقوها بتزغريته
سارة : ماما اش هادشي انا باقي ماموافقاش
عمتي حفيظة : اش كتقولي يا بنتي هو كاينة لي ترفض ولدي
بابا: راها غير كتدحك ... سارة اش هاد دحك لباسل ... اجي معايا
دخلنا لبيت انا و بابا وبدا يهدر
بابا : بنتي شوفي أنا عارفه شنو بغيتي و ولد عمتك فيه جاع لمواصفات لي بغيتي و ماغتلقايش احسن منو راه انا لي مربيه
سارة (كتبكي) : بابا ولكن را راه كيعايرني بلماضي ديالي... انا عارفة كنت خايبه و درت بزاف د لحوايج مانتغفرش عليهم ... مي انا تبت دابا علاش ناخد واحد مكيبغينيش
بابا: لا حبيبة راه غير ماعرفش شنو واقع ... و عمرو يجبدليك هاد لهدرة... شفتي بنتي راه هو لي غتلقاي يعاونك باش تزيدي تعلمي على الدين و احسن واحد تكملي معاه حياتك
سارة (حسات بيلي راي ديالها مايبدل والو وقالت) : واخا ا بابا لي بغيتو هي لي تكون
بابا : الله يرضى عليك ا بنتي
خلاني بابا فلبيت و خرج قالهوم بيلي راني قابلة وكملو سهرة مجمعين و كيدحكوا اما انا مالقيت لمن نشكي من غير الله....
دازت لمدة د لخطوبة بسرعة من بعد مادرنا غير عشا للعائلة بعد لاصرار ديالي منركبوش لخاتم حداهم حيت اكيد منخليهش يركبهالي راه باقي غريب وانا مكنسلمش على رجال
هاد لمدة د لخطوبة كلها و انا كنصلي صلاة الاستخارة لعل الله يجيب شي حاجه يفارقنا مي لعكس مرتحه
وصل لعرس بزربة و انا ماكن عندي حتى رأي فيه كلشي وجدوه هوما ... برغم من رفضي للموسيقى وندير امداح مي لا حياة لمن تنادي
داز لعرس من هاد لبسة لهاد لبسه و وصلت لكسوة لبيضا تقريبا مادرت حتى حاجة فوجهي من بعد مامسحتو بدموع مي كانت كسوة بيضاء و بلحجاب بيناتني بحال شي
ملاك عروسة وهادشي ماشي غير انا لي قلتي لكل اشهد على ذلك
كملنا كلشي و خرجنا تلاقينا مع بنت عمتو هو لي هي ختو برضاعة اسمها أمل لي تزوجات يوم قبل منا و قاليك ا سيدي نمشيو لشهر لبصل عفوا لعسل مجموعين....
بدلت لكسوة ديالي و ركبت السيارة معاه
و امل ركبات السيارة مع رجلها حمزة
كتسألو كيفاش كانت علاقتنا فلخطوبة أنا و عبد الله
كل يوم كيتزاد التوتر بيناتنا و مكنجلسوش بوحدانا واخا كونا دايرين لاكط حسيت واليديا خايفين نود صداع معاه و نرفضو
هادي أول مرة نكونو غير بجوج....
ركبت السيارة و بقا كيسوق و سكات...
انا عطشت و بقيت كنقلب على الماء
عبد الله : مالكي جلسي نيشان
سارة : وانت مالك سوق انا هدرت معاك
عبد الله : خليني ساكت حسن مانتقلب معاك
سارة (و هازا لقرعه د لما فيدها) : ههه باقي غتقلب ؟ باركه غير هاد جوج وجه لي عندك واحد معايا و واحد مع بابا
عبد الله : (فرينا بجهد ) غتسكتينا و لا نقلب هاد السيارة
سارة : قلبها ...نتهنا منك بعدا
عبد الله :ياربي تصبرني
سارة : و علاش تزوجتيني وانت مابغيتيش
عبد الله (تقلب شاف ف سارة و زاد)
بقينا كنتمشاو طريق كلها و حنا ساكتين وصلنا لاوتيل فين نرتاحو خديت حوايجي و دخلنا لحبس لي غنبات فيه وأمل وحمزة فلغرفة لي قبالتنا
دخلت دوشت و بدلت حوايجي صليت و جيت نمشي ننعس
هو خرج من دوش و شد فيدي
عبد الله : فين غادا ا لالا لعروسة
سارة: غادي نعس... طلق مني
عبد الله ( كيشوف ف سارة بنظرة مختلفة على قبل و هدر معاها بشوية) : انتي مراتي و هادي اول ليلة معايا أجي نصلي بيك موراها ديري لي بغيتي
سارة (مستغربة بتعامل ديالو لي ختالف): واخا يالاه...
صلينا ركعتين و فكل سجدة كندعي الله يفتح عليا و يبارك ليا فزواجي
ملي سلمنا تقلب عندي و قرب مني أنا مشيت نود هو شدني عندو حط يدو على راسي و قال "اللهم إني اسألك من خيرها وخيرما جلبت عليه وأعوذ بك من شرها ومن شر ما جلبت عليه"
مكنتش كنتوقع هاد لحركة منو نسيت كلشي و فرحت بزاااف و دموع لفرحة نزلو لي
قرب عندي كتر و مسح لي دموعي و بقا كيشوف فيا... انا قلبي بدا كيدرب بزاف من نظرات ديالو لي كنحسها كلها تأنيب حيت نود و قالي لهدرة لي صدماتني كتر وكفسات ليلتي ...
عبد الله : سيري تنعسي ... و ماتخافيش حتى واحد مايعرف ديعتي شرفك
سارة (مصدومة ) : شنو ... كيفاش ؟؟
عبد الله: إوا انتي عارفه
سارة : (شدات لو فتريكو و كتبكي و كتغوت) : علاش كتعاملني علاش كتحسسني باقي راني كي قبل ... انا عارفه كنت غلط قبل مي عمرو خليت شي واحد يقربلي.... انا تبت حيت ربي بغاني نتوب ماشي باش نخبي شي حاجه كيما كيقولو ناس... انا را كنعرف جاع لهدرة لي كيقولوها عليا مي أنا ممسوقاي ليهوم حيت نيتي مع الله صافية... و إلا الله كيغفر و يسامح علاش بنادم مايسامحش ؟؟؟ علاش قولي علاش.... انا سكت على كلشي مي منقدرش نسكت و نت كطعني ف شرف ديالي... ياك راني مراتك دابا حلالك... إوا تأكد تأكد انت ... خود حقوقك (بقات سارة كتبكي شدات على راسها و كتقول ) يارب رحمتك يااارب رحمتك و كتعودلها....
عبد الله حس بلخطء ديالو و ناد و خرج خلاها بوحدها ...

يتبع...