أسعد الله اوقاتكم
الكاتبة دينا
الأخير
وعدت الأيام واني أفكر أن ارتباطي باابن عمي غلط والسبب أمي وكلما شافتني وكالت أني غلطت يوم وافقت بس انتي شرطتي اللا الوظيفة مالتج يلا توافقين على الزواج ونص الي تقدمولج مقبلوا ومااجانة شخص زين ولأن ابن عمج اولى بيج وأحسن الج....
وتعدي الأيام واني ايزيد قلقي من ارتباطي باابن عمي وخايفة من المجهول...
وبيوم من الأيام اندك الباب علينة وطلع اخوي الزغير يشوف منو
يمة يمة هذا عمي ابو أحمد اجى
شعنده الله يستر
هلا ولله هلا خوية فضلج
زاد فضلج ام مراد إلا وين ابو مراد
عندة شغل شوية ويجي
السلام عليكم
وعليكم السلام ورحمة الله
حياك الله ابو احمد
وبعد السلام والكلام بدء ابو احمد يحجي
خوية ابو مراد أني جايك رجال خير ابو مصطفى دزني عليك يكول انتة مهدده لو يتزوج نهاية الشهر لو يفصخون الخطوبة وينطوك المؤخر وهمة ناس معدهم وانتة تعرف البير وغطاء
اسمع يبو احمد ترضى امخليني مضحكة كل يوم وكالولي الشهر الجاي العرس ورحت البيتهم ناس ممرتيبن ولاعدهم حجاية عدلة واني منطيهم موعد وهاي صارلي اربع أشهر وهمة كل يوم يكولون الشهر الجاي
يا ابو مراد الناس ماعدهم فلوس ومايكدرون يصاروحك يستحون منك .....
شوف ياابو احمد اني من انطيت بنتي الهم موعلمود شي بس الخاطر الخوة
اخذ هاي الفلوس الهم خلي ينزلون بيها غرفة ويخلصون احتياجاتهم بيها ......
واجى خالي ابو ولاء وكاله ابوي على الي سواة
وكالة والنعم ماسويت ترى يبقى هذا اخوك مهما صار
بس امي وخالاتي مقبلن ولعبن لعب واني كلامهم اثر علية
لكن ابوي جان كلامه حلو ومخلاني اتأثر وكذلك خالي بقى يحجي على امي وخالاتي....
وراح خالي هو وأولاده لبيت عمي واخذو صبغ وصبغوا البيت...
ورتوبة وعدلو وصار بيت مرتب وحلووو وطبعا كان نص الفلوس من ابوي وقررو بعد اسبوع زواجي....
واجى موعد زواجي وكان احلى زواج بعيني رغم مكان بسيط بس الحياة علمتني ان السعادة مو بالفلوس..
اما زوجي فكان انسان جدا" راقي الأخلاق ومحترم عكس مااتصورته وأكيد اكو سلبيات بية فكلنا نعلم أنه لا يوجد هناك زوج يتصف بالكمال لذالك نجد في شخصياتهم بعض العيوب، ولهذا يجب علينا مراعاة ذلك عند التعامل معهم.
الى هنا حبايب قلبي انتهت قصتي وأكيد عرفتوا شنو العبرة منها هسة بعضكم يكولون الي سواه ابو لينا عين العقل واكوبيكم ينتقد واكو بيكم يكولون وين اكو هيج شي ابو يجهز بنتة ويزفها بيدة احب اكولهم اكو هواي ناس هيج واني شايفة ناس تشتري المحبة وصلت الرحم وناس لاوالله وهي لوخليت قلبت اتمنى اتكون هاي القصة عبرة إلى كل بنية انو موكلشي بالحياة فلوس ومظاهر ولااتصالات لصبح لا اكو اشياء أحسن واهم ....
اتمنى تكون عجبتكم القصة وانتظروني بقصة ثانية
دمتم برعاية الله وحفظه 😙
الكاتبة دينا.....
