#علمني_كيف_الحب_يداوي
طلعت من بيتنا كالعادة ويا صديقتي المقربة للمدرسة طريقها طويل نخلصها بسوالف وضحك ونعلق على الرايح والجاي جنت أسمع من صديقاتي اللي ويانا عن قصص الحب والأعجاب مجنت اعرف عيب لو ميصير أمي وابويه ناس على كد حالهم بسيطين ابويه يشتغل حرس بأحد المعامل وامي ملتهية بالبيت مشكلتهم ناس مو واعين وميحبون يختلطون بأحد منعزلين بحالهم عندي أخت أصغر مني بسنة جان أكو مركز على طريق مدرستنا دايما يوكفون بيها عساكر أغلبهم من غير محافظات اكو واحد بيهم طويل وأسمر كلما نمر من يمه يذبلي حجي مرات يمشي ورانا يظل يحجي واني اضحك متونسة وماافهم منه لغته صعبة يختلف بس أحس نفسي أفهمه ظليت هيجي شهرين وياه مرات جان يخلي ورقة بأيدي أنطيها لصديقتي تترجمه اليه لأن هي من نفس الطائفة دايما جانت تنبهني وتحجي عليه ميصير هو اكبر منج وهم من غير طائفة وحتى جمال ماكو بس اني مثل العمية مو بالي غيره هو عرفت أسمه جبار كرهت الدراسة والتهيت بجبار ورسائل جبار بأحد المرات وكفنا بنص الطريق بديت اتعلم على لغته من صديقتي كلي يحبني وطلبني من ابويه وهو مو موافق وراح ينتهي دورته ويرجع لمحافظته خيرني اروح وياه لو ينتهي حبنا واني كمراهقة وماعندي خبرة كرهت اهلي ليش يريدون يبعدوني عن حبيبي بقيت هالاسبوع مثل المخبلة خايفة يروح ويعوفني وخايفة اروح وياه شفت أهلي مو يمي الام ملتهية تنظيف وطبخ والاب مو متواجد وهو أستغل جهلي وتعلقي بيه يوميا جان يتوسل اروح وياه ويعيشني ملكة يحبني وميكدر يعوفني أخر يوم رجعت للبيت ظليت طول الليل اروح واجي للباب الخارجي وارجع سمعت صوته طلعت جرني من ايديه وركضنا وصلنا يم السيارة العسكرية وايدي بايده خايفة وفرحانة محجيت شي صعدت يمه باس راسي وحضني جان وياه
صديق باركلنا واني ماعرف شنو سويت بنفسي وبأهلي من الخوف والقلق نمت وهو حاضن أيدي وصلنا لمحافظته وتزوجنا رحنا بيت اهله هو بس يباوعلي مو مصدك واني كلمتين ماعرف احجي وياه بس ابتسم بوجهه البيت جان جبير وعائلته اهواية الصدمة ونظرات الحيرة فقط عليهم دخلوني غرفة بس اسمع صياح وهوسة ولا فاهمة شي ساعات ودخل جبار متلهف عليه اريد افهم منه اللي صار ماكو هو بغير عالم لحظات جنت مراهقة بريئة الى مرة تحت جناح رجال وبدت المعاناة هو يريدني وياه واهله ميسمحولي ارتاح شغل وتنظيف رغم ماعرف اهواية اشياء تعلمت او انجبرت اتعلم حتى ميزعل جبار ويضربني اي ضربني ثاني يوم زواجنا لان مقبلت يتقرب مني من الالم بس هو ولايمه لغة الحوار صار عبارة عن ضرب وأهانات صرت مرمطة بينهم حتى اصغر طفل بيهم يهني ولا افتهم شيكولون عليه شكلي غريب عليهم عاداتهم يختلف مرت شهور عليه واني بين الشغل والضرب وطلبات زوجي اليومية نسيت نفسي وهويتي وعنواني جنت اتمنى يطلع حلم وارجع لبيت اهلي كلما اغمض عيني اتذكر نفسي وين جنت وين صرت كلشي ممنوع عليه طلعة لباب البيت ممنوع حجي ممنوع طلبات ممنوع اوقات النوم محدد رفض ممنوع زاد عليه يريد جهال مني عباله الصوج بيه مجان يباوعلي كمراهقة متفهم شي بالحياة عباله اني بكد امه اعرف وافتهم ولازم اسوي بدت الحجة الجديدة للضرب ليش متخلفين لو انتي عاقر مجان يعترف اني مراهقة عمرها 14 سنة بس جنت اشوفهم بالليل لو اوقات الاكل يحجون ويضحكون بيناتهم واني غير الضرب والشتايم ممحصلة منهم شي يصلون ويصومون يخافون من الله بس مجانو يخافون الله بيه دموعي هو راحتي الوحيدة العالم الوردي اللي تخيلته جان حلم واللي عشت بيه عالم اسود كبرت وبديت اتعلم لغتهم ودخلت عرايس جديدة لهذا البيت وبناتهم تزوجو كلشي تغير بس اني بقيت نورجان الرخيصة اللي عافت اهلها وركضت ويا رجال غريب حملت فرحت بيه لان الفرح اليه ممنوع جبت ولد سميته على اسم ابويه ردت يبقى عندي ذكرى من اهلي ميكدر يمسحها جبار طلعت تعذبت وتألمت لحد ماجبته لكن جبار جان فرحته ناقصة لأن يشبهني ميشبهه هو نسخة مني ابيض وعيونه ملونة وشعره أشقر جان غريب شكله يبين جهال اخوانه اللي يتميزون بسمار وعيون جوزية وشعر كستنائي مائل للسواد يريد ابن ثاني يشبهه بكلشي يكول طلعت غاسل ايدي منه لان يشبهج ياعار اي هاي اني اللي حبيت جبار وعشكته صار يناديني بأبشع الالفاظ والالقاب نسى هو السبب لأن اني صرت عار وجبت العار لأهلي أخوه اللي اصغر منه تزوج وحدة مو من اقاربهم بس عبالك ملاك والله عوضني بيها أسمها مدينة تحمل كل طيبة الدنيا بكلبها أنسانة محترمة ومتدينة ومثقفة علمتني على امور الدين جنت جاهلة عنها نسيت ضيمي وتعبي وياها جنت اكمل واجباتي حتى اكعد وياها واسمع سوالفها اللي جانت منفسي الوحيد بهذا البيت اللي اعيشه بس فرحتي انتهت من قرر جبار يشتري بيت بعيد عن اهله بمنطقة ثانية لأن وعتني مدينة وفتحت عيني على اشياء جنت غافلة عنها رغم تعامله ويايه ولا يوم جاوبته ولا يوم عاتبته مكدرت جنت أسيرة بيده المفروض اللي مثلي يفرحون بيت جديد واني وحدي بيه اخلص من الشغل والتعب والمشاكل بس بالعكس حسيت نفسي وحيدة من جديد بعدي عن مدينة هو السبب لهيت ويا البيت وطلعت زاد عليه يريدني احمل واجيب اولاد كبر طلعت صار عمره 6 سنوات حملت من جديد رغم هالسنوات اللي عشتها بضيم وقهر ويا جبار بلعت وسكتت علمود ابني تمنيت يوم يمسح دمعتي اللي هو سببها ويكولي أسف جنت راح أسامحه وامسح الماضي بس لا هو جبار رجال ميصير يتنازل ويكول للرخيصة نورجان اسف او اعتذر طول هالسنوات مجنت اعرف الجوارين غير اسمع سوالفهم من طلعت وسوالف اصدقائه بالمدرسة جنت اكعد ساعات اشاركه بكلشي هو الوحيد اللي جان يمسح دمعتي ويحضني علمته لغتي من جان يطلع جبار للشغل جنت اعلمه جنت اخاف انسى الشي الوحيد الباقيلي من الماضي حتى من اكبر طلعت يذكرني بيها وحامي كلش قوي ومأذيني اهواية توسلت بيه ياخذني للدكتور حتى اتعالج ولا جان يسمع شكول مرة هو تأخر بالشغل عنده مكتب عقارات طلعت للباب الخارجي الدنيا ليل وتمطر شفت طفل مبين اصغر من طلعت يبجي ويصيح لحكوني امي تموت بس شافني توسل بيه اساعده واني ماعرف هو منو وابن منو بدون تفكير صحت طلعت كتله اقفل الباب وجيب عبايتي اللي نادرا مااطلع والبسها رحت ويا الطفل وصوت نحيبه وهو يمسح دموعه نسوني جبار وخوفي منه وصلت لبيتهم بيناتنا 5 بيوت امه واكعة وتجيب وماكو احد يمها ماعرف شلون صار عندي قابلية ولدتها وساعدتها بقت طول مااساعدها تبوس ايدي وتشكرني بقيت يمهم ساعات عرفت هم ساكنين جدد اهنا وزوجها بالعسكرية اضطر يعوفهم وينزل لواجبه وماعدهم تليفون ارضي تخابر أهلها طلعت باوعت على الولد وهو يتشكرني باوعت عليه حسيته رجال مو طفل وهو يحجي ويايه رجعت جبار جان موجود دخلت ماعرف الضربات منين جتني نسى اني حامل وبشهر السابع وين جنتي هايتة ويا منو متشبعين مني تديحين من ورايا انواع الشتايم واني اتوسل بيه لايضرني بس يسمع مني لحد ما طلعت وكف بيناتنا واخذ اكثر الضربات وهو يتوسل بيه ويكوله بابا جوارينه جانت تجيب امي ساعدتها اني اعرف ابنها وهو اجه اخذ امي بقيت ايام واني الوجع يزيد عندي وجهي معدوم من الضرب وخايفة احجيله بليلة رجع كال جهزي ملابسج وملابس طلعت باجر اخذكم يم اهلي أشتريت بيت بصفهم تذكرت اللي عشته بيت اهله كلش انقهرت بجيت لحد الصبح واني جمعت كلشي يخصنا اني وابني عفت هذا البيت اللي مشفت منه غير العذاب بس جان اهون ارجع يمهم وصلنا شفت بيت أكبر واجمل من كل البيوت الموجودة بالمنطقة بس بالنسبة اليه سجن اكبر من السابق دخلت لبيت اهله اللي ياما انضربت وانهانيت بيه هدوء وين الصياح وهوسة الجهال وين عمتي الظالمة وصياحها شفت مدينة وهي تبجي وفرحانة بأستقبالنا سنوات واني مشايفتهم كلشي بهالبيت متغير عرفت اخوانه اللي عازل بغير بيت واللي مسافر وامه اللي جانت تضربني وتفشلني كدام ضيوفها وتنعتني بأبشع الالفاظ نايمة وصايرة جثة على السرير تقربت منها شافتني بجت لزمت ايدي تبوسها انصدمت وين جانت شصار بيها مصدكت اشوفها بهالشكل وين راحت قوتها توسلت بيه أسامحها واني جبار واكف بصفي ملخ ايدي يريدني احجي بس دموعي تنزل جاوبتها مسامحتج ومن كل كلبي متحملت لحد الليل صار عندي الم مو طبيعي لأول مرة يحن عليه واخذني للمستشفى عباله اجيبله ولد طلعت بنية جان يحجي ويغلط اني مو يمه عيوني على طفلتي اللي بيها شبه مني ومن أختي ومن جبار سميتها فرح على أسم اختي أول لفظ وياها كاللها الله ياخذج ياعار صارت لقبها بنت العار كبرت فرح وكبرت معاناتي وياها الاب ميريدها يكرهها يجيب هدايا وغراض لطلعت هي توكف بعيد وبعيونها دموع وخوف واني مو بيدي شي اوكف اتفرج على مصيرها ويا هذا الانسان اللي حرام عليه كلمة الاب طلعت صار فرحته بالدنيا رافع راسنا باخلاقه وتربيته ويا الناس جبار جان نافخ ريشه بيه ويحبه اهواية مياكل اذا مو وياه مينام اذا طلعت مريض يفرح بفرحه ويحزن على حزنه واني وبنتي على الهامش صار عمر طلعت 16 سنة نجح بتفوق اشتراله سيارة رغم اعتراضي على الموضوع وضربه اليه جنت خايفة يصير بيه شي جان دايما من ابوه مو موجود يحجي ويايه بلغتي ويعلم اخته يحاول رغم صغره يعوضنا عن حنان جبار حسيته سندي بالدنيا أما مدينة هاي عوضتني عن أختي توفت ام جبار العائلة تشتت كل واحد راح بدربه بقينا أحنا وبيت اخوه أبو حامد بيتنا بصف اللاخ .
مدينة : زوجة اخو جبار الأصغر منه انسانة متعلمة ومتدينة شافت الظلم اللي عاشته نورجان بس هي جانت تصبرها وتعلمها اول مااتزوجت والتقت بيها أستغربت من شكلها وجمالها اللي ماتملكها بهالبيت غيرها جانت تشبهها بشروق الشمس كلش حبتها جانت نورجان اصغر من كل الجناين اللي موجودين بهذاك البيت بس اللي عاشتها محد بيهم عاشته مدينة زوجها كلش واعي ومثقف يحترم النساء بشكل غير معقول عكس جبار بكلشي ياما تعارك وياه ولا فاد صار عدها حامد أول طفل بعدها قررت تدرس وتكمل كلية يالله تجيب الثاني اتفقت هي وزوجها على هالشي لكن القدر وكف بينها وبين احلامها زوجة احد اخوان ابو حامد جابت طفل جديد كلش تعبت بيه الطفل بس يبجي لا جان ليلهم ليل ولا نهارهم نهار عمر الطفل صار شهرين تعبت الام بيه اهواية اقترحت مدينة عليها تخليها يمها يومين ثلاثة لان هي ماعدها شي وحامد كبر حتى ترتاح راحت على بيتها هي وزوجها بعد ساعات أجاهم خبر بيتهم محترق واثنيناتهم مختنكين بريحة الدخان تركو وراهم نزار اللي اول ماجابته امه مدينة تعلقت بيه وحبته مقبلت احد ياخذه منها كبرته وخلته مثل ابنها تداري مثل عيونها لان يتيم والرسول وصانا بيه جانت معزة نزار بكلب مدينة مو معقول حتى لو امه جانت عايشة مجانت راح تهتم وتحبه مثلها وبعدها بسنوات صار عدها عفرا البيت اللي تزوجت بيه والعائلة الجبيرة اللي جانت عايشة بيناتهم بمرور السنين تقلصت الى زوجها وابناءها كلش جانت تنقهر من تشوف البيت يتغير والوانه تتغير وبناءها تغيرت لكن برجوع نورجان رجعت فرحتها من جديد .
أم أمل : اللي ميعرف داخلها ينقهر على خارجها أرملة وبحضنها طفلة رضيعة زوجها شهيد عمرها محبته جانت تكرهه كلما ينزل من اجازته تنقهر ومن يرجع تظل تدعي عليه يموت وميرجع بعد رغم طيبته وحنيته وياها بس مجانت تحبه اخوها زوجها رغما عنها جانت كلبها متعلق بواحد مطيرجي جيرانهم شاب مشكلجي كل المنطقة يتجنبونه وميحتكون بيه من ورا مكسراته وسوالفه رغم هاي هي جانت تشوفه فارس أحلامها وتكول الناس يطلعون عليه اشاعات ماعدهم نظر تحقق حلمها وتوفى زوجها ابو أمل تركلهم بيت ملك وسيارةالناس جانو يساعدوها وهي متكول عندي جانت تظمه لحتى تتزوج بيه بعدين من حبيبها رضا المطيرجي جانت تهمل بنتها وتنطيه للجوارين يهتمون بيها بحجة هي مكسورة وفاقدة روحها من بعد زوجها كل خططها نجحت وبعد سنة تزوجت من رضا وابتدت معاناة أمل اليتيمة
أم شامل : تزوجت عن حب زوجها من اقارب ابوها هي جانت معلمة وهو عسكري رغم حالتهم المادية البسيطة عايشين بسعادة وقناعة الناس تحسدهم على حبهم واخلاصهم لبعض عدها شامل وبعدين دعاء اللي بعمر أمل بنت جارتهم من مات ابو أمل الشاب الشهم والمتدين خافت على زوجها حلفته يتقاعد ويعوف العسكرية لايروح بيها مثل ماراح ابو أمل مجان يقبل ويكول الأعمار بيد الله رضعت أمل مع بنتها لأن اعمارهم متقاربة كلش جانت تحبها وتنقهر عليها وعلى امها من تشتري شي لبنتها تشتري لأمل همينه جانت تساعدهم اهواية وبعد دعاء بسنين صار عدهم نور جابت نور وهمه ساكنين جديد بمنطقة ثانية مجانت تعرف احد وزوجها اضطر يعوفها ويداوم بقت ويا شامل ودعاء جانو صغار من صاحت وصار عدها الالام الولادة كالت على روحها هاي نهايتي راح اموت بين اهاتها شافت وحدة دخلت عليها مثل النور ساعدتها ولدتها جانت مبينة اصغر منها ملحكت تشكرها على مساعدتها ايام وانتقلو بيت اللي ساعدتها فقررت تسمي بنتها نور عرفت من ابنها شامل هاي ام طلعت ومن رجع زوجها حاول يوصللهم بس بيتهم معزل ومحد يعرف وين راحو .
هاي نبذة عن حياة الابطال اللي راح نعيش وياهم روايتنا ياريت تصويت ونجمة يامتابعاتي الاعزاء
