دخيلة بنت شيوخ

اعادة جزء 12

عشگ_ايلول
بارت 12
بقلمي نوره ..

اي يمه وليدي لانروح ننكشف هي البنيه ماتصير الك
يعني ماحبيت اله وحده تصير بت خالي .. ومايصير اتزوجها لان امي شارده من الموت الي هم يردونه الها

اخخ ايلول انه شكد تسببت باذية ناس جن عبالي بس ابوك اذيتها .. انوب اذيتك يمه سامحني والله گلبي ماعاد يتحمل ..

سهله يمه سهله اهم شي انت وكلبج اطمئني تفرج وتخلص راح انهي وياهه كل شي واكللها انه اريد اتزوج ومنا النهاية هذا الشهر  اكللها تشوف غيري يوديهه .. وبعدهه نرجع للبصره ..

اي يمه هذا وليدي الي اعرفه انه ماخايفه بس على روحي خايفه عليك .. انت هم خاف يأذونك

الله كريم لاتحسبين الشي ابد انه تعبت واريد انام يلا تصبحين على خير

وانت من اهل خير

رحت لغرفتي .. وورثت جكاره وكعدت ادخن ..
واجت ابالي اسيل شون راح اجرحها شون راح اذيهه ليش انه مااكدر اعيش حياة طبيعيه .. من دون كل البشر مااجت بدربي غير اسيل يارب اكدر انساهه وهي هم تنساني وابتعد واخلص
وبقيت كاعد ادخن وانه على هالحاله دك تليفوني شفت اسيل .. تدك عفتها ماجاوبت كله رنة احسهه تدك بكلبي هي شون راح انساهه ..
واخيرا .. انكطع .. بعدها وصلت رساله منها
الو ايلول وينك اريد احاجيك مدام امي نامت

مااسيطرت على نفسي ومااكدرت اغلس عليها
خذيت التليفون واتصلت .. دك ردت
الو ايلول هلو شبيك ماترد
مابيه شي
شنو نايم وكعدتك
لا مونايم
جا ليش مارديت تدري انه استغل الفرصه امي نامت وخابرتك
تحسرت كتلها مااسمعته جنت بره
شنو هالحسره شبيك
مابيه شي ليش مبين عليه شي
اي هيج مبين
لعد باجر نحجي ماشي
اوك يعني هسه مانحجي
روحي نامي اسيل ..
اوك تصبح ع خير
وانت بخير

أسيل ...
شبي اليوم مو ع بعضه ومتغير سامع شي
يلا باجر تبين خلي انام مثل ماكال ..

كعدت الصبح بدلت .. ع وكت اريد اشوف شبي اليوم كعدت انتظره قبل الموعد الوب وافكر بي ماتحملت خابرته

ايلول ...
من الصبح ظلت تخابر .. عرفت تريد تكلي شبيك وماتصبر غلست ماجاوبتهه ..

بدلت ملابسي .. واريد اطلع شفت امي صبحت عليها وبستهه من راسها ..
يلا حبيبي سويت الريوك تعال تريك
لايمه تاخرت اكل بالسوك
بعدك ضايج عليهه تحبهه ايلول عذرتني يمه
حسيت بيج هسه ييمه
حبيتهه
حبيتي ابوي
اووف ابوك اله حراره بكلبي ماتنطفي حتى من اموت
الله يساعد كلبج ..بوستها ع راسها وطلعت ..

حركت السياره .. وطلعت وصلت لبيت اسيل دكيت هورن طلعت بسرعه يمكن واكفه يم الباب تنتظر
اووف بس تغيرت عليها شويه شصار بيها ماباوعتلهه ثواني ماتحملت .. باوعتلها اجت تمشي ومبينه متوتره .. 
دخلت صباح الخير ايلول (بحماس)...
صباح النور حركت السياره
ايلول شبيك مو ع بعضك ..
مابيه شي ...
متأكد والله جاي احس بيك شي ..
شكد تلحين الخاطر الله
يعني تتغير عليه بلحظه بدون سبب وماتريد الح انت بس كلي سامع شي انه مسويتلك شي
تحسرت باوعتلهه بالمرايه .. اسيل اسألج سؤال
اسأل
انه شنو بالنسبه الج
انت كل شي
يعني ؟!
انت حبيبي وروحي والله احبك ايلول فدوه لاتأذيني مووعدتني ماتاذيني بيوم ..
اتحسرت اسيل مابيه نصيب
شنو يعني
راح اخطب انه ومااكدر اكمل وياج
شنو تخطب .. شنو ماتكمل وياي ليش انه شنو لعبه
لا مولعبه بس خلص اعتذر على الي صار مااكدر اكمل وياج مابينه نصيب
اسيل ... بديت ابجي كتله صدك تحجي ليش شنو الصار ايلول وهيج تريد تعوفني
ماصار شي ارجوج سدي السالفه واعتبريني سايق اوصلج واجيبج الحد نهاية الشهر .. شوفيلج غيري