گلت بلكي من يشوفني يطيح الزعل على گولتهم
باوعت للساعه راح يأذن الضهر يعني هسه على جيه
حاولت الم الغرفه واغير فرشها صار اسبوع ممعدلتها شگد مشتاقه الغرفتي ومكاني اول مره ابتعد هالگد
باوعت الغرفه محافظه على ترتيبها حته فرشة الجربايه مرتبه معقوله مداخلها لو هوه مرتبها
شويه وطلعت حته التهي وي عمتي
سمعت صوته ارتبكت حسيت روحي خجلانه من نفسي عبالك اول مره اشوفه
تبسمرت بمكاني واني اسمعه يسلم على بيبي ويسألها عن صحتها يوميه هوه هيج يتصرف
سمعت خطواته صارت بأتجاهنه چنت بالمطبخ
گال السلام عليكم
..ردينه وعليكم السلام
چنت مرتبكه وخجلانه وخايفه وبيه لهفه اله مشتاقتله هواي .. مشاعري مخربطه مااعرف شنو احساسي كل هالأمور احس بيها
نظرلي نظره بكل برود وحاچه عمتي
..يمه انه تعبان رايح انام لاتگعدوني ع الغده
حسيته تجاهلني او ماخذ على خاطره مني
عمتي گالتله براحتك وغمزتلي اروح وراه
دخلت للغرفه
شفته يبدل وعبالك مموجوده يتعامل ابرود وياي
تجرأت وحاجيته
..علي شلونك
..من الله بخير ..طفي الضوه وياج اريد انام
.ماگدرت اطوخ وياه طفيت الضوه وطلعت رحت يم عمتي وبدت هيه تنصحني گالت انتي ماتعرفين علي انتي تشوفينه يتعامل وياج بس هوه مو هيج هوه عنيد وروحه بخشمه بس يحبج انتي لاتخسرينه هوه ضال اباله شلون تنسينه كل هذي الفتره صح هوه ماحچه بس انه اعرفه
حاولي ترضي والرجال بسرعه يرضه خاصتا اذا يحب مرته يشوف منها كلشي حاوو بس لاتحسسينه اكو شخص اغلى منه عندج حته لو اهلج صعبه عليه
خاصتا اذا هوه حاسبج انتي كلشي بحياته
حجي عمتي نبهني هم صح اني طوختها بس هوه شدعوه عليه هيج
بيومها مااشتهيت اتغده ورحت وراه للغرفه
الغرفه ضلمه وهادئه مااعرف هوه نايم لو يتضاهر بالنوم
رحت گعدت بصفه صفنت عليه علي حبيبي الي عمري ممتصوره راح احبه وبهالطريقه بس ليش اني هيج تصرفت صح امي غاليه بس ع الأقل المفروض افهمه الوضع
رحت بشكله نايم ومخلي ايده على عينه والثانيه جوه راسه متمدد على ظهره ومخلي رجل على رجل
مديت ايدي وسرحت شعره
بودي احچي اگول اني اسفه مو قصدي وانت اغلى شخص على گلبي بس الكلام ميطلع مني
ظليت امسح شعره شويه مد ايده وبعد ايدي
..علياء انه تعبان واريد ارتاح عوفيني
..ليش اني شمسويه ارتاح على راحتك اني اسفه اذا ضوجتك
دار وجهه بدون ميحچي وانطاني ظهره اني هم گمت عنه لاأكدر ابقه ولا اگدر اطلع بس ممتعوده هيج يعاملني حسيت روحي اختنگت اخذت علاجي بدون اكل اخاف اتخربط واني اضوج من اتخربط احس نفسي عاله خاصتا وهوه زعلان اخاف يفكر استعمل مرضي وسيلة ضغط عليه
بقيت گاعده بالغرفه انتظره يگعد مجتاره مااعرف شلون اتصرف
المشكله مااعرف اصالح شخص حته لو اعرف بنفسي الغلط مني
گعد وره ساعتين اخذ ملابسه وغسل طلعت وراه اجهزله الغده بين ميطلع من الحمام
بدون مااسأله جهزت الأكل ومن طلع خليته گدامه
گال
..مااريد اكل شيليها
..علي ادري بيك زعلان بس الأكل ماله علاقه
..خوش كون تدرين وانه مو زعلان والأكل شيلي
..اءا مو زعلان ليش هيج تتصرف
..علياء گتلج مو زعلان بس مصدوم بيج طلعتي هواي تحبيني
..والله مووو... قاطعني بجديه كافي شيلي الأكل وحجيج هذا مو وكته وجهزي روحج حته اخذج الأمج اذا تردين
..لو اريد ابقه مااجيت
..خلص انه الخاطرج بكيفج بعد يعني يمها احد هيه
..يمها افياء ..جاوبته واني احس اعصابي تلفت وتوترت حيل مامتعوده على هيج شنو هالبرود العنده
شلت الأكل وهوه بدل وطلع
واني
ظليت الوب فكرت اليوم اتركه على راحته واخلي يرتاح يلله احاول وياه من جديد
صار الليل وهوه مااجه ع العشه گلت بعد ساعه اذا مااجه اتصل بي شويه وهوه اتصل على عمتي وگلها انه طالع للبصره يومين واجي ان شاءالله من خلال كلام عمتي عرفته يوصيها عليه وعلى بيبي احس گلبي كام يوجعني هيج صارت يسافر وميگلي
شنو السويته اني امي ومن حقي صح غلطت بس مااستاهل هيج جفه
أنت تقرأ
امقت اعرافهم لكنها حيتني
ChickLitلأني انثى اكره عاداتهم التي تقيد حريتي انا انثى قويه ليست مملوكه لأدم ايا كان حتى لو كان ابن عمي اكره اعرافهم التي قروها كي يعلو مني سلعة يتم الصلح فيها وتكسب فيها الخواطر انا انثى حره لكن هذه العادات التي طالما كرهتها هل تكون سبب في تعاستي ام سع...
