امقت اعرافهم لكنها حيتني

١٦

بوكتها الكل عينه عليه وعمي راد يتأكد اكثر اني من الأحراج گمت من مكاني سحبت نفسي ورحت للغرفه
واجن وراي البنات
فاطمه وزينب وافياء
گالن ها متفقين من ورانه ولج والله لو ماانتي ونحبچ چان تخبلته علي يخطب هيج بدون مقدمات
بس انتي لا شغلتج تختلف بت خالنه وحبابه هم عرفناج ربي يسعدكم
چنت اشوف مو فرحه كامله بوجوهن يمكن لأن مريضه ومطلگه بالنسبه الهن هذا الرادن يوصلنه الي بس حسيتهن فرحانات الي مو العلي علي يتمنون اله غير يتمنون بنيه وبكامل صحتها ومن حقهن اني مالومهن
افياء باركتلي وغمزتلي والله وجابت نتيجه مشاها الج الشيخ وضحكت
اني گلت بس لاتفضحني وهنه ضلن يباوعن شنو المشاها وشنو الجابت نتيجه عزه بس لا انفضح اني النهيت عليه
عمتي صاحت البنات من طلعن اجه عمي يسألني گتله اي عموو اني موافقه باركلي وطلع
بطلعته وگف علي مستند ع الباب ويضحك
گلي عمچ باقي باله يمچ عباله مجبوره والله مايدرون انه الطحت بيها مايدرون انتي نهيتي عليه وانه تورطت غمزلي وضحك
..اني من گد ماخجلت من الغمزه ردت ابيين نفسي قويه كتله.. اني ورطه هيچ تقصد يعني بكيفك تره مومجبور

..اي اني يبعد انه هههه هيه هيچ حلوه الأني مالتكم اول مره تعجبني

..ابتسمت وگلت خل اتشجع.گتله لا اذا انت ابالك غير وحده ربي يهنيك اني ماعندي مانع

..بعد انتي نهيتي تردين اكسر نهوتچ وراها حشم وفصول مو گد الطلايب انه مابيه حيل مال منهن هالسوالف هههههه

..يعني نهوتي ماشيه واكو نهوه ع الولد صدگ..من اشوفه يبتسم فطارية الكون تصير بيه

..ههههههه والله لو تدري العشيره وين اكوو بنيتي تردين تسنين سنينه جديده انتي انوب تخلين خلگ الله متحيره حلوه هاي كون الزلم تتگعد البنات عمومتها چا عبالج كلها تفرح مثلي النهوه منچ غير انه راضي بيها

..دنگت خجلانه

..حبيبه هاي الجمعه نعقد شتگولين

..اني ماصدگت وعيني صارت علي وحسيت روحي مبتسمه بدون وعي يبوو صايره هبله رسمي غير اثگل كوه سيطرت على عضلات وجهي وضبطتها گتله بكيفك

..هذا هوو جهزي روحج ع الجمعه

..بقيت ساكته وهوه طلع بطلعته اجت عمتي وحيل فرحانه عكس الي متوقعته هيه اكثر وحده يمهما علي وبمثابة امه اكيد تتمناله بنيه مو مريضه والمشكله الهسه محد يعرف اني بنيه الكل ابالهم تم زواجنه اني وعلاء حته افياء اني ممتعوده احجي وياها بهيج مواضيع وبوقتها الصار مومال اشرح كلشي اني هم مرضي بعدني هواي عنها وعن البنات وانطويت على نفسي فتره طويله اكثر شخص جان علي قريب الي بوقتها ومن هذا اني حبيته
عمتي باستني خطيه وباركتلي بوقتها ذكرت ابوي گالت شگد راد يتقرب العلي ويمحي الغلط السواه بس علي چان قافل من يمه هسه ماكو اقوه من هالقرابه اكيد يفرح وهوه بگبره كلش كافي علي يصير منچ وياسر جدهم
من ذكرت ابويه دمعت عيني وؤدت اعرف تفاصيل الخلاف گالت انوب كلشي تعرفين هوه يحچيلج لا تشغلين بالچ
مرن يومين وانتشر الخبر ابين عمامي وعماتي وچانت اغلب الردود بين الصدمه والأستغراب والي فرحان بوكتها فرحانلي لأن علي حب يستر عليه عبالك مسويتلي فد شي مو زين رغم الكلام يضوج والي اغلبه يوصلني صدفه ماحبو الي بالبيت ينقلون الي بس كلشي يوصل صح اضوج بس فرحتي جانت مغطيه على كلشي ومو هاميني لاهمه ولا حچيهم كل الي يهمني علي ونظراته بهاليومين ابد مابقينه وحدنه بس نظراته الي كافيه تحسسني بالحب والأمان
بيوم الخميس العصر وتجينيه زلزله من اكول زلزله يعني بكل معناها لاياربي هنا صدگ انغثيت
يعني باچر العقد مالتي مو وكتها هسه
بيومها جنه طالعين اني وعمتي بعد مااشترينه الذهب وكملنه كل التحضيرات للعقد اخذتني عمتي تذبلي الأسود وتاخذني صالون
رحنه اني وعمتي وريم الظاهر هيه تعرفم
گالت هالحلوه متحتاج هواي شغل اني شعري طويل اشقر عيوني كبار وطويلات لونهن اصفر على زيتوني بيها لمعة خضار چنت محتاره عيوني هيج على منو طالعات من اجيت وشفت بيبي شفت عيوني طالعه عليها لهذا جان ابويه يموت على عيوني حواجبي ثخينات
وشفافي مليانه خشمي متناسق وي وجهي جنت اشوف نفسي حلوه وكل اليشوفوني هم يگلون حلوه بس ابد ممنتبهه على شكلي ولامدققه بتفاصيله مثل هذا اليوم
بعد ما عدلت شكلي وحواجبي وشعري شفت نفسي غير رغم بعرسي الأول سويت اكثر من هيچ بس ابد منتبهت التفاصيلي يمكن الحب الصحيح يحلي اي شي واي تفاصيل ممكن تكون صغيره غير بنفسيتي قبل جنت اضن نفسي احب علاء بس ماحاسه كل هذا الأحساس يمكن متعوده تعويد علي والحب غير عن التعويد هسه يلله بديت افرق
علاء فكرت هواي يلله حبيته وعلي لكيت نفسي احبه بدون تفكير وبدون مااعرف
طلعنه من الصالون واني فرحانه واختاريت البدله يكون لونها تركواز ردتها تبرز شقاري ولون عيني فصالها بدون ردن وضيقه من يم صدري الحد الخصر مليانه حجر ناعم وحلوو ومن جوه منفشه بس نفشه بسيطه مو هواي
والتسريحه هم اختاريتها واتفقت اروحلها الجمعه ساعه عشره ونص تقريبا لأن اكو اعراس عدها هواي
طلعنه منها وريم هم صبغت وقصت شعرها وهيه كلش حلوه ملامحها
مو طويله تميل للقصر بس جيمها مليان وانثوي يخبل لون عيونها جوزي وشعرها اسود طوخ طويل حاولت تغيره صبغته وقصته
من رجعنه للبيت ودخلنه وعينه متشوف الغ النور لگينه عمتي ام بسام ماشاء الله مسويتها حفله مناحه مو عقد عبالك
وهيه شافتني اني وعمتي وهيه انهدت بينه
لج فرحانه فرحانه من كربستي هاي براس علي ولچ بت كتالت ابوو تاخذيلها فوگها مطلگه ومصروعه
ولچ وين راحت البنات بناتنه شبيهن مو احد ابو احمد بنيه مو عد خالد بنيه ولج يالعوبه جامنطيته فطومه بنتج
مو اخته كوه مسزينها اخته
اني عيوني رجعت العادتها وسيلتها الدموع
وبقيت على نفس وگفتي طيرت الفرحه كلها مني
وبيبي كامت تصيح عليها شجابج انتي كافي ولج سكتي وهيه ولايمها
عمتي مبينه من شخصيتها قويه طويله وضخمه بيضه على حمار ومن تعصب تصير دم هاي عمتي ام بسام
ماحاچيتها هالمره عفتها ورحت الغرفتي وهيه تحچي وتحچي
بوقتها اتصل بيه علي يمكن راد اعرف رجعنه من الصتلون مارديت وجنت ابچي صدگ اني ومرضي شنو شو ممفكره بي شني ذنبه يوميه اني متكومه بس اني بعد مداومت على علاجي وقراءة القرءان صرت احسن وحته من اسمع كلام يغث اسيطر على اعصابي
رجع اتصل مره واثنين الى ان رديت چان مبيين على صوتي ابچي
..الوو
..هلا يروحي شبيچ خو ماتعبتي علياء تخربطتي شنوو
..بلحظتها كلت صح حچي عمتي يعني هوه هيج يبقه قلق عليه بس شسوي اني حبيته مو بيدي جاوبته لا مابيه شي
..هااا ..مابيج شي ليش تبجين
..مو باجيه تعبانه عندي تحسس واتهيج من الصبغ ومواد الصالون
..اذا عندج تحسس ليش تصبغين ياعمري انه اريدج مثل ماانتي لاتكلفين روحج وتبالغين انتي گمر بالحالتين
..الله يخليك
..شبيچ تحسسيني متصل على عمي ابو احمد شو خل اشوف انه عليمن متصل
..ضحكت لا والله تعبانه وماعرفت شكول
..اي كولي بالي مو يمك انه جاي بالطريق هسه قريب ع البيت محتاجه شي
..سلامتك حبيبي
..اي اي هسه هذا رفم بنيه حته الصوت اختلف عندي هههه