Sazaye ishq. سزائے عشق Completed ✔️

Book 2 Chapter 24

Book 2 chapter 24

New chap

Muje Se Kehti Hai Tere Sath Rahon Gi Faraz

Bohat Pyar Karti Hai Muj Se Udasi Meri

AHMED FARAZ

"Aap ka matlab hai ke sirf Mateen aur bhaabhi..!? Aur koyi nahien...? " Zoyan ne heraangi se Apnay Baba ki taraf dekhtay huway kaha. Baaqi sub bhi Zoyan ke is sawaal ke jawaab ke liye murad sahab aur fehmida beghum ki taraf dekh rahay thay.

" haan sirf Mateen aur Aayat... aur tum dono jao jaldi se apna saamaan pack kar lo aur jaldi jaanay ki tayaari shuroo karo , lumba safar hai jitna jaldi ho sakay utna jaldi shuroo karo. main apnay dost aur gaaoon main tumharay aanay ka bata deta hoon taakay wahan tumhain kisi cheez ki pareshaani na ho. " ye kehnay ke baad Murad sahab,  kaan pe mobile rakhay wahan se baahar jaanay lagay.

Kal raat jub fehmida beghum ne Mateen aur Aayat ke akelay gaaoon jaanay ki baat ki to Murad sahab ke taasuraat bhi Zoyan jesay hi thay , unhain bhi un dono ka akelay us naye maahol main jaana kuchh theek nahien lag raha tha , par fehmida beghum ne unki har na ko suna un suna kar ye keh ke apna jesay faisla hi suna diya ke Wahab bhaai ke naam se bannay waalay us school ki har eent par agar Mateen ka saaya bhi paray ga to Wahab bhaai ki rooh ko kitna sukoon milay ga.

aur is baat ke baad to Murad sahab ko Fehmida beghum ki is raaye se ittafaaq karna hi para.  Aur ab subha saat bajay Murad sahab ne sub ko lounge main bula kar is baat ki ittalaah ke saath saath Mateen aur Aayat ko apna saamaan pack karnay ka bhi keh diya.

Aayat to ye khabar sun kar saktay ki si kefiyat main aa hi gayi thi , par Mateen bhi Is achaanak khabar ke jhatkay se khud ko compose karnay ki koshish kar raha tha , jis ki nazar gaahay ba gaahay apnay barabar kuchh faaslay par khari Aayat pe jaa rahi thi jo yaqeenan is khabar ke baad aisi hi kefiyat se do chaar apni ungliyon ko masal rahi thi.

Is waqt wo kya soch rahi hogi....? Kahien wo sub ke saamnay kuchh galat na keh de.. Mateen ko ek aur pareshaani ne aa ghera.

" par chachi..! Kya Aayat ka meray saath jaana zaroori hai...? Mera matlab hai , main akela bhi to jaa sakta hoon , Aayat be wajah wahan naye maahol main pareshan hogi..."

" Naya maahol to tumhaaray liye bhi hoga aur tumhain wahan akelay jaanay denay par mera dil razamand nahien hai. aur tumhaari dadi ka bhi hukum hai ke tumhain akelay hargiz na jaanay dain . is liye agar Aayat tumhaaray saath hogi to humaray dil ko tasalli rahay gi ke tum wahan akelay nahien ho. Kyun theek keh rahi hoon na main Aayat...". Aakhri jumlay par unhon ne Aayat se bhi taaeed chaahi. Wo jaanti thien ke ab Aayat ke paas unki baat maannay ke siwa aur koyi chaara nahien tha.

" J..jee chachi.. aap theek keh rahi hain... " Apni kaanpti awaaz ko sambhaaltay huway wo halki awaaz main kehtay hi apni nazrain unsay chura gayi ke kahien wo uski aankhon main uska inkaar na dekh lain.

Aayat ke is jawaab par baaqi sub to hakka bakka usay takreeban ghoornay lagay thay par Fehmida beghum ki shafeeq muskuraahat uskay naam huwi.

Mateen heraangi ke saath saath ek khushi mehsoos kar raha tha. Jis ki wajah se wo abhi mukammal aashnaa nahien ho paa raha tha.

Jub undono ke saath jaanay ka program tai huwa to Fehmida beghum un dono ko lekar unkay kamray main packing main help ke liye chali gayi. Zoyan aur Zarish bhi unkay peechhay hi ho liye.

Aayat khaamoshi se apnay kapray cupboard se nikaalti bag main teh karti rakh rahi thi , fehmida beghum apni pasand se uskay kuchh suit nikaal rahien thien aur saath hi Mateen ke kapray Zarish ko pakraa rahien thi jo doosray suitcase main Mateen ka saamaan rakh rahi thi.

Itnay baray suit case dekh kar Aayat ka ghabraaya dil aur betha jaa raha tha.

Murad sahab ne unhain bataya tha ke unhain do teen mahinay wahan rukna paray ga , kyunkay wo chaahtay thay ke school ki construction main Mateen apna saara waqt us school main laga de, jo yahan karachi main reh kar mumkin nahien.