ثمار العار بالحلال ج٢
للكاتبة nuha-d-h
((مساء الخير والصحة والعافية
عليكم يا احبتي
طبعاً جداً اشكركم على
سؤالكم عني وعن صحتي وهذا من طيب اصلكم ))
((اتمنى لكم قراءة ممتعة ))
طلعت من يم سهوة وانا خايف اضعف كدامها
وما اتمالك نفسي وارجع عليها اكلها
كون اخليها للصبح تون وما بقي بيها شي صاحي
اريد اطفي نار گلبي بيها
بس لزمت نفسي
من شفتها بالروب الابيض
جانت هاي اعز امنية على گلبي
اشوفها لابستلي الثوب الابيض مثل الملكة
وبهذا اليوم كنت ناوي اروي عطشي
وضمأ السنين
لكن موافقتها بالزواج مني كلبت كل الموازين
وخلتني اعيد كل حساباتي وياهة
اجت موافقتها بالزواج بالتوقيت الصحيح بالنسبة الهة لان شافت ان زواجها مني يخدم مصلحتها
صرت بالنسبة الهة وسيلة حتى احقق هدفها
مو لاجل حبها لثائر
يعني بأختصار كانت راح تتزوج بكل الاحوال انا او غيري اهم شي تتزوج
اذن ماكو شي خاص
.............
عدي : هاي شنو وحش شجابك علينا بهالليل
ولك جا مو اليوم ليلة عرسك شعدنك لاحكني لهنا
وعايف مريتك
كعدت على الكرسي مقابيل عدي
جان كاعد بمكان مخصصينة بالمزرعة نجتمع بي انا والشباب مثل الكعدة العربية بنص المزرعة
قرب ساكية(الساقية) الماي
مرات نلتم احنا والربع
نشرب نركيلة لو مرات نلعب دومنة
اسمع صوت صفير صراصير الليل ونقيق الضفادع جان يخترق سكون الليل
رفعت راسي جانت النجوم واضحة بالسما تلالي
هنا عدنا النجوم اوضح من نجوم بالمدينة
يمكن لان اضواء المدينة تعم على ضوة النجمة وسواد الليل
عدي: شبيك ياخوي مو على بعضك
ليش لافي هنا وعندك حرمة تنتضرك
: عدي احس بروحي مخنوك ما اعرف شبية
: شبيك وحش صار شي بينك وبين حرمتك يخلك تطفش منها من اول ليلة
: ليش هو بقى شي ما صار بيني وبينها حتى تجي هاي الليلة وتكملها
: وحش انت هذا عيبك بيك طبع
صعب تسامح غيرك
وبعدين تكعد تشتكي من سوء الحظ
يا اخي سامح حتى تعيش حياتك مرتاح
انا ما اعرف شنو صاير بينكم انت وزوجتك
بس اعرفك انت شنو لان اخوي وصعب العشرة
لذلك راح اكول الله يساعد المكرودة عليك
وهسة راح اطلع صدري مثل بيبيتي
وادعليها كون الله ينصرها عليك
ويقويها وحتى تقضي على الوحش الراكب راسك
لدرجة احس بيك راح يطلعلك گرون
التفتت ادور عالحارس
: زيدون جيبلي ستكان جاي راسي راح يطك
ردت اماطل بالوقت واتأخر لتالي الليل
حتى من ارجع الكاهة نايمة وما اظل اعاني
عدي : يالله وحش كوم لا توصل علومك لجدي
ويبهذلك ترة هذا جدك الله يسترة منة حاط بكل مكان عيون تترصد
: هذا هو كايم لان كلش تعبان ومتكسر استغفر الله
مو عرس جهاد هذا حرب البوم طاح حظي من الركضة والوكفة
تركتة لوحدة ورحت اتمشى بالمزرعة حتى اوصل للبيت
.......................
دخلت للبيت الساعة (٢ ص )
شفت جدتي مرت من يمي بدون ما تنتبه علي
جانت رافعة ردنها بوضعية الوضوء ومحللة شيلتها
ومطلعة مقدمة شعرها
هاي الصورة دائماً تتكرر بهيج وقت من الليل
استعداداً لصلاة الليل صارت عادة كل يوم اسمع صوتها الهامس بالتسبيحات
صعدت فوك ودخلت للغرفة جان الضوة مفتوح
انتبهت على سهى بنص السرير ومغيرة ملابسها بثوب ثاني عادي
وكانت نايمة بوضعية الجنين وحاضنة صورة
بدلت ملابسي
وكعدت على طرف السرير اباوعلها مديت ايدي وسحبت الصورة الحاضنتها
شفتها صورت ابنها
اخذت نفس عميق ما اعرفج انتي شنو
انسانة ضعيفة لو شيطان بجسد ملاك
جنت كلش تعبان وما مستعد اغير مكان نومتي
اتمددت بصفها
والتفتت عليها مديت ايدي وسحبت خصلة
من شعرها وشميت عطرها
ثائر مو هو هذا الي جنت تتمناه
وهاي سهوة صارت ام بيتك ليش ما
تاخذها لحضنك وتشم عطرها
اي بس وكرامتي الداستها وجرح گلبي الي بعدة ما شفى
صرت اخوض صراع بيني وبين نفسي
ونجح الجانب المتلهف لحضنها
يعني ترة صعبة تطلب من واحد جوعان
كدامة اكل ما يمد ايدة وياكل
ما حسيت على نفسي من مديت ايدي وسحبت جسمها الدافي لحضني
انتبهت عليها اتململت من نومتها مثل البزون
بدون ماتحس
وقربت راسها وخلتة بين رگبتي وراسي
حركتها قضت على اخرقطرة عقل عندي
لميتها كلها لحضني
ولاؤل مرة بحياتي احط راسي عالمخدة وانام مرتاح
................................
